1. (*) " °¨¨¨¤ ~*¤]

السلام عليكم ورحمة الله وبركاته
تحية طيبة لكل أعضاء المنتدى الناجح...
سأقوم في البداية بسرد قصتي إلى

(*) " °¨¨¨¤ ~*¤]

عند قرب بداية الإجازة بديةُ بالاستعدادات لقضاء إجازة صيفية مع دراسة لغة إنجليزية في صيف عام 2003 .
فقمة بزيارة المكاتب السياحية والبعثات الدراسية للبحث عن عروض دراسية في " Canda " وكانت معلوماتي أن السفر إليها لا تتطلب فيزا ، وفؤجئت بأن الفيزا تأخذ في السفارة قرابة ثلاث أسابيع ولم يبقى على بداية الإجازة إلا ثلاثة أسابيع ومع اختيار المعهد وانتظار القبول وأخذ الأوراق يتطلب شهراُ كاملاً .
لدا انصح بمن اعتزم السفر إلى " Canda " أن يرتب سفرته قبل الوقت المحدد بخمسة أسابيع على الأقل .
استبدلتُ السفر من " Canda " إلى " New Zealand " بعد استشارة شباب سبق أن درسوا فيها وكان سعر الدولار النيوزلندي 1$=1.7 ريال وكان ذلك في عام 2002 .
وذكر لي بأن الدولة رخيصة مع ارتفاع في سعر الأجهزة وقام بتشجيعي للسفر إليها مع التسهيلات التي كانت موجودة ، وكان الوقت الذي يستغرقه المكتب لتسجيلي في المعهد 3 أيام تقريباً مع العلم بأن أيام التسجيل لا تكون في إجازة " New Zealand " يعني إذا سجلت يوم الخميس خذ حساب السبت والأحد عطلة الأسبوع وعن طريق مكتب يخدم الطلاب تم التنسيق مع معهد ويأخذ زيادة 1000ريال لأقل من ثلاثة أشهر و 500 ريال لأكثر من ثلاثة أشهر ولكن كان التسجيل منظم ودقيق .
وأوصيت صديق عزيز بالحجز وقص التذكرة بحكم عدم تواجدي في الرياض وعدم وجود مكاتب سياحية كثيرة في منطقتي وذكرُ لي بأن خطوط الباسفيك جميلة بحكم توقفها في " Hong Kong " فقط ولكن بعد ثلاثة أيام اتصلت عليها علشان يكنسل الباسيفيك ويغير لشركة الخطوط السنغافورية " Singapore Airline " لأني كنت متخوف من مرض السارس مع العلم بأن الخطوط السنغافورية تقف في محطتين الأوله في دبي والثانية في سنغافوره ، وقمت بالحجز في أول يوم في إجازتي وذهبت إلى الرياض وأخذت بعض الاستعدادات التي سأقوم بسردها بالتوصيات لاحقاً وتوجهت إلى المطار قبل الرحلة ب 4ساعات .
كان عندي في التذكرة 20 كجم شحن فقط وكان معي 30كجم لهذا قعدت افرفر راسي ادورلي على نشمي يخلصني من دفع الدراهم فوافقت موضف سعودي طيب عند قص كرت الصعود ومشاها لي بدون مفاوضات الله يجزاه بالخير، والشحن من الأفضل استلامه في أخر محطة وهي " Auckland " .
وكانت الرحلة من الرياض إلى دبي على الخطوط السعودية، وفي مطار دبي قمت بقص كرت الصعود من دبي إلى سنغافورا ومن سنغافورا إلى اوكلاند ، وأقابل رجال صاف معنا وبيني وبينه 3 إيطاليين وأنا أطالع فيه ويطالع فيني ويبادر السلام وأتعرف عليه وأعرفه بنفسي وتكون رفقه بيني وبينه حتى الآن وأخذنا مقاعد بجانب بعض في الطائرة والحمد لله وناسه والرجال حبيب جداً ورجل بمعنى الكلمة وكانت الجهة واحدة و المعهد اللي راح يدرس فيه نفس المعهد والحمد لله أني لقيته ومع أن الخط طويل لم اشعر بطوله وأستغرقت الرحله 8ساعات إلى سنغافورا وتوقفنا في سنغافورا ونزلنا في فندق المطار لمدة 16ساعة وعند نزولنا في المطار حاولنا الخروج من المطار لنتمشى في سنغافورا 3 ساعات ونرجع للمطار وقوبلنا بالرفض التام لأن السعودي ما يروح لها إلا بفيزا وقال رفيقي ما مشكله نتمشى في المطار نفسه وندور على رقم البوابة ألي نبي نركب منها، وكان المطار جميلا مقارب لمطار دبي ولكن اكبر منه وأكثر منه في التسوق وبعد ذلك ذهبنا إلى الفندق وأخذنا غرفنا ووصيناهم أن الرحلة في الوقت المحدد وكنا قاصين كرت الصعود من مطار دبي يعني ما نحتاج وقت قبل تسكيرة الباب كلها نصف ساعة نلحق وبالراحه .
صحيت قبل ما يصحوني " ذيب " وهات ياشنطه وننزل للمطار ونعطيهم مفاتيحهم ونتمشى شوي ونتوجه للبوابة قبل الإقلاع بساعة تقريباً ومشي ما دققو علي لكن صاحبي زادوه تدقيق لأن جوازه من القديم وركبنا الطيارة نسولف شوي وننام شوي والمدة 11ساعه حتى وصلنا " Auckland " .
نزلنا في المطار وكان ما معي إلا دولار أمريكي فقط وفيه صرافه واسحب منها من بطاقة الصراف السعودية 500$NZ ونمر الجمارك ومسكُوني آنا وخويي من جهة الخط الأحمر وكان معي سيدي منسوخ وتخوفت ولكن ما جالهن الطاري ويوم وصلني الدور عطيت اللي يفتش العفش جميع الأوراق ألي عطانيها المكتب و فيها اسم المعهد والعائلة وأرقام التليفونات وراح شوي بعد ما عطيته الأوراق حملها في يده وتوقع انه كلم يتأكد من صحة الأوراق وجاني بعدها وقال ضف عفشك ورجعني إلى الخط الأخضر للي تفتيشه على خفيف:
وقالي do you have food or Cigerettes ?
وقلتله i don't have وانا اخوك وفتحت الشنطه له ويناظر وتبين علبة التمر ويطالع فيها ويفتحها ويكرشني ما داري أيش الكلام ألي قالي لكن معصب وفهمت انه يقول تكذب علي
قلت I'm so sorry ياصاحبي i think this is vegetables ومادريت انها ممنوعه " مخدرات العرب " .
وياخذون عينة ويفحصونها في ما يبدو لي ممكن عن مرض سارس ويمشوني .... :rolleyes:
ولما طلعت من التفتيش والجمرك إلى الصالة ولقيت ذاك الشايب اللي معه لوحه ومكتوب اسمي عليها واسم خويي وسلم عليه وعرفه بنفسي قالي انتظر شوي منشان فيه واحد معاك ولاني جوعان واقز بورقر كنق قدامي وانصاه أنا وواحد تعرفت عليه في المطار هذا وصار من منشأي ;) ونور على نور ارتحت ورتاح كثير لكن الي استقبله شخص ثاني ودي جالس معاه أطول لكن ركبت مع الشيبه اللي استقبلن ومسكت باب السواق بركب ولا قدامي الدركسون النظام البريطاني وانا اللي اضف وجهي وارجع اركب في محلي وجاي قبل موعد العائلة ب 3ايام وداني لسكن طلاب في غرفه وكان السعر 63$ في اليوم .
وانام ذاك النومه واصحى و أتذكر ايش هي الصلاة اللي فايتتني ولا داري ايش الوقت والمهم أُبرمج ساعتي على الوقت واطلع من غرفتي ولا ذاك الماليزي :rolleyes: في نفس الآين ونظامها " غرفتين مدخل واحد ودورة مياه وحدة ومطبخ وثلاجه صغيره " وسلم عليه وياخذبي جوله في مجمع السكن الطلابي ويتوقع إني مطول في ذا الشقق المهم طلعت بعد مغيب الشمس ولفيت حوالي 3ساعات طلعت أشوف الديره وكان عطلتهم الأسبوعيه وخذ ياتمشي وأستكشاف لمركز المدينة " سريع سريع " في السنتر ومتخوف بعض الشيء لأن جوازي وفلوسي في الشقه ولا داري عن مدى أمن سكن الطلاب قلت ياغريب خلك اديب وارجع لشقيقتي احسن لي ، ونوم بدري واصحي بدري واتمشى في المكرز مره ثانيه أدور على بنك اودع فيه دراهمي :rolleyes: " وش عندي يالراجحي " وكل البنوك مسكره المهم ترجلت في السنتر وجولة وكان الجو بارد 10درجات مريت بعض الأسواق والمطاعم وأخذت فكره بسيطه عن المركز .
في اليوم الثاني جاني اتصال من العائلة قالوا موعدنا غداً في الساعة 10صباحاً وفعلا انتظرتهم في بهو السكن وفي نفس الموعد جاني ذاك الجثة الأشقر وقالي انت فلان قلت yup
وفهمت انه يقول قم تبوبح معي للبيت وصلح تشك اوت وركبت معه في لومينا ورحنا للبيت وبالطريق قام يعرفني على نفسه وعمله، وقابلتنى زوجته ورحبة وهلتبي ولآها مزبطه عصائر وقطعة كعك ويحتفون فيني ويقدمون لي العصير وماصدقت خبر مع اني لحد الآن مستحي ومآ أخذت وضعي الطبيعي وبعدها وروني غرفتي وعطتني مفاتيح البيت وعطوني ورقة تعليمات ما فهمت إلا help yourself .
وفي أول يوم في الدراسة أقلتني أم العائلة إلى المدرسة على ذيك السياره من نوع اودي موديل 82 " كشخه " وانا راكب اقول من يبي يرجعني وكيف مع أنه معي خرائط لكن المسافة بعيده تقريباً 40دقيقه بالباص المهم أول مره ضيعت ال stop bus نقطة توقف الباصات اللي قبل البيت بشوي وطلعت الخارطة المهم دقيتها رجليه حول 20دقيقه وكانت برد ومطر خفيف المهم ما وصلت إلى أنا بردآن المهم غيرت ملابسي وتدفيت ونادوني يقولون dinner dinner بيناتهم يقولون وش ذا السبهه اللي جانا واخوكم بعد ماصدق خبر وخذ يا عشوه ويقولون good boy " يربوني " وأفله معهم وقلطوني على العشاء وتعشيت ونومه واركب الساعة على 6 صباحا واقوم واصلي وافطر واروح لستيشن الباص في تمام 6:55دقيقة والساعة 7:40 دقيقه اللي في مركز المدينة وأوصل المدرسة بعد ساعة مع مشي 10دقايق لكن كل الطريق طلوع " بعضه رقي درج " والمهم أني لاحظت أنهم يقولن للكلب good boy ويقولون لي نفس الكلام good boy ههه بس مشيها لهم ...
طبعاً بهذا البرنامج استمر حالي يومياً خلال أيام الدراسه أما أيام العطل فهي مختلفه وسوف اسرد عليكم الجانب السياحي في حلقات قادمه مدعمه بالصور كي يزيد التقرير جمالاً بأذن الله .
تحياتي للجميع أخوكم

• - --^^-- - -