1. اليوم الاول : 24-7


2. الحين احنا بالفندق بني ننام .... وبكرا اكمل لك


3. اليوم الثاني : 25-7


4. اليوم الثالث : 26-7


5. اليوم الرابع : 27-7


6. تعشينا بعدها بماكدونلز ورجعنا للفندق ننام ...


7. اليوم الخامس 28-7


8. اليوم السادس 29-7


9. اليوم السابع 30-7


10. اليوم الثامن 31-7


11. اليوم التاسع 1-8


12. اليوم العاشر 2-8


13. اليوم الحادي عشر 3-8


14. اليوم الثاني عشر والثالث عشر والرابع عشر 4-5-6- /8


15. ملاحظات مهمة خلال الرحلة :

رحلة تاليند
من الفترة 24- 7-2006 الى 7-8-2006
قبل ما ابدا احب اكد نقطه مهمة وهي انه كل ما كتب هو عبارة عن تجربتي الخاصة ... بالنسبة للأسعار والعروض والطيران هي اللي وفقنا الله وحصلنها ... ممكن تحصل عروض افضل وفنادق افضل ....
افراد الرحلة : انا وزوجتي وبنتي على الخطوط الاتحاد ... سعر التذكرة 2100 للكبار وبنتي 1475ريال .

اليوم الاول : 24-7

انطلقنا الى مطار الملك خالد بالرياض ... الصالة كانت مزحومة ... ولكن مع تساهيل رب العالمين خلصنا ... واخذنا البوردنج . اقلعت الطائرة من الرياض على خطوط الاتحاد الى ابو ظبي الساعة 5 تقريبا ووصلنا ابو ظبي الساعة 7 بتوقيت الامارات .
الرحلة كانت حلوة . كنا راكبين درجة المرجان ( السياحية) . على الطائرة 777 تصنيف المقاعد 3-3-3 . قدموا خدمة وجبة خفيفة . لما وصلنا ابو ظبي تخمنا الاجوازات وبعدها رحنا الى مكتب خطوط الاتحاد علشان ناخذ اوراق الفندق . سكنونا بفندق ساندز وهو فندق جيد الى حد ما . واعطانا وجبة افطار ... بس العشا ء ما اعطونا ...
كان معانا بالرحلة امراه جايه من جده ورايحة لزيورخ .... والله يا سوت ضجة بالمطار ... شكل كل الخطوط عرفوها ...

الحين احنا بالفندق بني ننام .... وبكرا اكمل لك

اليوم الثاني : 25-7

قمنا الصباح مره بدري الساعة 6 و بعد ما تجهزنا رحنا للإفطار .... كان موعدنا الساعة 7 للباص اللي يبي ياخذنا على المطار ... رحنا بالباص الساعة 7:30 ص للمطار ... وسوينا البوردنج .... وبعدها للطيارة اللي اقلعت الساعة 9 و شوي تقريبا ... الرحلة كانت مره مليانه بس ممتعة .... خطوط الاتحاد حلوه ... من مميزاتها ( لأني اقرانها بالخطوط السعودية) المقاعد 3-3-3 - كل مقعد فيه شاشة باللمس . يوجد اكثر من 50 فلم عربي واجنبي قديم وجديد .. الطاقم مرة خدوم ... الاهم هو ان فيه انترنت مجاني على الرحلة ... فقط اشبك اللابتوب على الواي فاي او الكيبل وتصفح لمدة 30 دقيقة ... بعدها الساعة ب 9 دولار ( واعتقد انها رخيصة لان ما عندك منافس اخر بين السما والارض ) او الرحلة كلها ب 27 دولار على طول الرحلة ... وصلنا بالسلامة ... و بعد ما نزلنا .... توجهنا علشان نختم الجوازات .... طبعا كان معانا اوراق عبيناها بالطيارة بخصوص الجوازات ... بس كان لازم نستخرج الفيزا من مكتب خاص ... كانت جميع اوراقي مكتمله ... بس بسبب الزجمة شوي من الاخوان الخليجيين جلسنا بالمطار تقريبا 30 دقيقة .... بعد ما خلصنا واخذنا الامتعة .... طلعنا برا عند صالة القدوم ندور لنا على سكن .... كان فيثه عدد من المكاتب .... بس بسبب التعب مرينا بس على اربعة مكاتب بس ... طلبنا منهم حجز لليلتين بس ... . انا اعتقد ان اسعار الفنادق شوي غالية ... على العموم اخترنا فندق Grand Diamond اخذت الليلة ب 290 ريال تقريبا ... لما وصلنا الفندق و دخلنا الغرفة .... لقيناها مره مريحة .... فيها خزنة صغيرة – بوفيه صغير – مايكرويف شكل الغرفة حلو .... على العموم الاراء في المجال هذا تختلف ... اهم شي عندي النظافة – مو ضروري الفخامة ... لاني اقضي اغلب الوقت برا الفندق ... الفندق ايضا فيه مطعم حلو اكله ... واعتقد ان الاكل هو احد المشاكل اللي نواجهها هنا .... الله يعين

اليوم الثالث : 26-7

بعد الافطار انطلقنا مع السيتي تور , جولة مجانية في ارجاء بانكوك .... كانت مملة بعض الشي زرنا من حلالها عدد من مصانع الاحجار الكريمة والقماش .... طلبنا من المرشدة السياحية اعداد برنامج لبقية الرحلة يشمل التذاكر والسكن في كل من بوكيت و شانغ ماي ومن ثم العودة الى بانكوك .... الطريقة التي عرضتها المرشدة ما كانت موثوقة . بعد ما رجعت للفندق رحت للمكتب السياحي اللي في بهو الفندق و طلبت منه عرض للتذاكر والفندق . اخذنا لمكتب سياحي واخذت منهم عرض للتذاكر من بانكوك الى شنق ماش و من شنق ماي الى بوكيت ومن بوكيت الى بانكوك . مع الفنادق كل العرض كلف تقريبا 5700 ريال شنق ماي 3 ليالي بوكيت 4 ليالي بانكوك 4 ليالي فنادق 4 نجوم و مع الافطار . بالليل رحنا لشارع نانا شارع العرب .... مليان فنادق رخيصة .... ووصخة .... فيه محلات بدهن العود ... ومحلات شنط وساعات مقلدة ...
رحت لمكتب موسى البانكوكي للرحلات ... عطيتة نفس البكج اللي اخذته من المكتب الاول اللي في الفندق .... لقيت ان الفرق بشكل عام حوالي من 100 الى 300 ريال ...
رحنا بعدها الى محل فريدة علي للساعات .... كان المحل اول ما تدخل عادي مره بس لما تدخل زيادة تلقى باب بالجنب و فيه ناس واجد . المحل كله ساعات مقلدة .... ضفينا كم ساعة .... باسعار حلوه ... بشكل عام كان نانا مكان ( مزبلة) وصخ .... ومليان مناظر غير مناسبة للمسلمين . رجعنا الفندق و نمنا استعداد للغد لان عندنا رحلة الى شانق ماي .... الله ييسر

اليوم الرابع : 27-7

اسعار مكتاب المطار رخيصة .... هذا اللي اكتشفناه يوم وصلنا للمطار علشان نروح لشانغ ماي .... بس هذه احد الاشياء اللي لازم نتعلمها بالسفر ....
طرنا من بانكوك الى شانغ ماي على خطوط اسمها nok اول ما ركبت الطيارة تذكرت طائرة القصيم جدة MD90 او ( السرو) 3-3 بس طبعا ما فيه ايه خدمة .... النكته انهم يوم جابو مشروبات ووجبات قالوا انها بقروش مو ببلاش .... وصلنا لشانغ ماي ...ورحنا للفندق .... الغرفة اللي اخذناها حليوه بس ما فيها شطاف بالدورة ... بعد ما روقنا شوي رحنا للمكتب السياحي في الفندق ... اعطانا عروض لعدد من الرحلات مثل الفيلة ... الاثعابين ... القرود الاسعار كانت مرتفعة شوي .... رحنا مع سواق التاكسي نفسه اللي وصلنا من المطار .... ورحنا لنايت سفاري night Safari اخذنا التاكسي الى هناك ب 250 بات ... تذاكر الدخول للسفاري 500 بات للشخص ... اشترينا التذاكر وسوينا جوله لمنطقة مجانيه مليئة بالحيوانات بس المشكله انها بدت تمطر .... رجعنا لحقين التذاكر وقلنا لهم انها تمطر واننا ما نقدر نروح بجولة القطار ... فما قصروا الجماعة رجعوا لنا الفلوس ...
بعدها رجعنا للفندق و روقنا شوي وطلعنا الى النايت ماركت night market امام فندقنا .... سوق حلو و رخيص ... بس مزحوم شوي .... يسكر الساعة 11:30

تعشينا بعدها بماكدونلز ورجعنا للفندق ننام ...

اليوم الخامس 28-7

في الصباح بعد الافطار .... انطلقنا مع سائق التاكسي الى عروض الفيلة .... العرض كان مثير مره بعدها رحنا وركبنا فيل جولة لمدة ساعة ... بعدها ركبنا عربة الجاموس لمدة ربع ساعة ... بعدها رحنا على قاربي البامبو عبر النهر لمدة 40 دقيقة .... بعدها انطلقنا نشاهد قرية long neck ناس يحطون حلقات على ارقابهم علشان تصير اطول ( عجايب ) بعدهخا رحنا لعروض الثعابين اللي كان مره ممتع .... بعدها رحنا على عروض القردة وايضا كان حلو .... و بعدها رحنا لحديقة زهور الاركيد ... كل هالتمشية هذي كانت من الساعة 8:30 صباحا الى الساعة 4:30 مساءا كلها كانت ب 4000 بات لنا كلنا ...شاملة الغداء ( اللي ما اشتهيناه) ... ممكن صاحب التاكسي كان غالبنا بس ارخص من المكاتب اللي زرتها .... في الطريق وحنا راجعين للفندق وقفنا عند مركز الرماية .... تختار السلاح اللي تبغى ترمي فيه سعر التذكرة 1700 بات بس مع المكاسر ... اخذت مسدس 9 مل و بندق شوت قن shot gun كلها ب 1500 بات .... بالنسبة لي كانت مره ممتعة .... وصلنا الفندق ..... تقريبا الساعة 5:30 م وكلنا حطينا روسنا ونمنا ..... ما صحينا الا من بكرا الصباح

اليوم السادس 29-7

صحينا في الصباح الباكر بعد نومة البارح ....صحينا الساعة 5 ص .... بعد الافطار .... نزلنا نتمشى شوي .... بعدها رحنا الى منطقة الشلالات ..... منطقة حلوة و جميلة ... وحنا بالطريق زرنا عدد من الاماكن مثل مصنع الاحجار الكريمة ... مصنع الجلود ... مصنع الاخشاب .... مركز الرماية حق الامس ... طبعا السواق ماهو كله كرم علشان يمشينا .... بس علشان ياخذ العمولة من هالمصانع ... بعد ما رجعنا الفندق طلعنا الى كمبيوتر مول .... بعدها رحنا للغداء في مطعم عربي بس ما جلسنا فيه ولا 10 دقايق ... ما قدرنا نتحمل عدم النظافة .... بعدها طلعنا ورحنا تغدينا بماكدونلدز ..... بعدها درنا في النايت بازار ( سوق الليل) ..... و اخر شي تعشينا في بيتزا هت ..... بعدها رحنا للفندق ... نجهز الاغراض لرحلة بكرا الى بوكيت

اليوم السابع 30-7

انطلقنا من الفندق الى مطار شانغ ماي للسفر على الخطوط التايلندية الى بوكيت ... رحنا على درجة رجال الاعمال .... الرحلة كانت قرابة الساعتين ... بعد ما وصلنا بوكيت اخذنا تاكسي وتوجهنا الى فندق تارا باتونق Thara Patong ....فندق كبير و موقعة قريب من شاطي الباتونق .... بس حدثت مشكلة .... لما وصلنا الاستقبال ... قالوا لنا ان الغرفة اللي حجزناها هي superior ما هي deluxe و المشكلة الثانية انه لازم ادفع فلوس مقابل افطار بنتي . .... طبعا ... رفضت تماما ان ادفع .... كلمتالمكتب اللي في باكوك وقلت لهم اللي صاير ... طبعا بالبداية ما تعاونوا معي بس كلمت الوسيط اللي بيني وبين المكتب و بالنهاية بعد الهوش وافقوا انهم يعطوني الافطار لبنتي .... اسم المكتب اللي ببانكوك Thongchai TC Tour مكتب سيء فيه عجوز اسمها سونيا اعطتنا الاسعاء اغلى من مكاتب ثانية في جميع الفنادق اللي اخذناها ... بعد ما انتهت المشكله طلعنا على الغرفة و ريحنا شوي ... بعدها طلعنا للتعرف على المنطقة .... رحنا للشاطس اللي كان مره رايق .... بعدها رحنا نتمشى على المحلات اللي على الشاطي ..... لاحظنا ان الاسعار غالية ... اكثر من بانكون وشانغ ماي ..... وصلنا الى شارغ بانغلا ... اللي ما انصح احد يدخله وخصوصا العوايل ..... رحنا بعدها الى مطعم دبي .... مطعم لواحد باكستاني .... المطعم حلو مره .... بكرا ان شاء الله رحلة بي بي

اليوم الثامن 31-7

صحينا الصبياح بدري و بسرعة افطرنا ورحنا للوبي علشان موظف المكتب السياحي ينتظرنا ... بدت الرحلة الساعة 7:15 ص بالباص الى المرفأ اللي علية القارب الكبير. ركبنا القارب كانت الرحلة مليانه و مادرينا اننا راح ننزل نص الناس اللي معنا لان تذكرتهم اتجاه واحد .. وصلنا جزيرة بي بي بعد ساعة ونص في البحر .... نزلنا الناس اللي معانا .... ( حنا تذاكرنا رايح جاي مع الغدا الفرد ب 700 ) وبنتي ببلاش ... بعد ما نزلنا الناس اللي معانا رحنا لمنطقة ثانية لمشاهدة الاسماك ( snokelling ) سبحنا شوي بجانب الاسماك بعدها رحنا الى جزيرة بي بي و نزلنا فيها .... ودونا الى مطعم للغداء و بعدها تمشينا في الجزيرة لمدة ساعتين .... رجعنا بعدها للقارب و مشينا الى بوكيت ... كنا مرره متعبين لدرجة ان كل واحد منا حط راسة ونام ... بعد ما وصلنا الى بوكيت وصلنا للفندق ... ريحنا شوي .... بعدها طلعنا الى مركز بق سي BIG C المركز حلو سعر التوصيل من الفندق الى المركز 250 بات بعدها رحنا الى مطعم دبي .... تعشينا هناك ورجعنا للبيت ونمنا ....

اليوم التاسع 1-8

صحينا الصباح متأخرين و يالله لحقنا على الفطور .... بعدها ندور على عروض الى فانتاسي و حديقة الحيوان .... كان الجو ممطر .... رحنا للمكاتب القريبة من فندق هورايزون .... فيه مكتب اول ما تطلع من فندق هورايزون تلف يمين وتمسي 100 متر الى ان تجد مكتب اسمه cyber tour مكتب سياحي فيه انترنت .... عروض فانتا سي بعد الخصم صار ب 1200 بات للفرد شامل التنقل من والى العروض + العشاء ( بوفيه مفتوح و فيه قسم خاص لوجبات المسلمين ) يعني انا وزوجتي ب بات2400 و بنتي ببلاش .... بالنسبة لحديقة الحيوان تشمل عروض الفيلة + عروض القردة + عروض التماسيح + التنقل من والى الحديقة = 500 بات للفرد وبنتي ببلاش . رحنا السااعة 7:30 م الى عروض فانتاسي .... تعشينا و بعد العشاء روحنا للمسرح وشاهدنا العرض اللي كان اكثر من رائع .... رجعنا بعدها الى الفندق ...

اليوم العاشر 2-8

بعد الافطار .... انطلقنا الساعة 12 الى حديقة الحيوان ( سعر التذكرة 500 للفرد شاملة التنقل من والى الحديقة ) الحديقة جيدة الى حد ما عندهم ثلاثة عروض الفيلة – القرود – التماسيح ) العروض كانت متواضعة .... بعدها رجعنا الساعة 4:30 م الى الفندق جلسنا شوي و بعدها انطلقنا الى مطعم جوهرة الخليج وهو تقريبا 3 دقايق بالسيارة من الفندق . المطعم لعائلة اردنية ... الاكل عندهم جيد بس انا عندي ان مطعم افضل بكثير .... بعدها تمشينا شوي في الاسواق المجاورة للمطعم الى الساعة 9:30 تقريبا .... بعدها رحنا الى مطعم دبي .... تعشينا عشاء خفيف هناك ... ورجعنا للفندق نجهز اغراضنا استعدادا السفر بكرا بإذن الله الى بانكوك ...

اليوم الحادي عشر 3-8

طلعنا للمطار متأخرين شوي ..... كنت مره قلق ان نفوق الرجلة .... الحمد لله وصلنا يآخر لحظة .... وبسرعة طلعنا كروت الصعود للطائرة ..... الرحلة كانت ساعة وعشر دقايق .... المقاعد ضيقة ...الخطوط NokAir .... وصلنا الى بانكوك واخذنا تاكسي الى قراند دايموند سعة الغرفة ديلوكس 2600 بات .... بعد ما ريحنا شوي طلعنا لسوق اسمة نايت بازار .... night bazaar الاسعار كانت مرتفعة شوي بعدها طلعنا الى سوق اسمه نايت ماركت night market في منطقة اسمها باتبونق Pat Pong اسعاره قريبة من اسعار باتونام .... بالنهاية رجعنا للفندق ...

اليوم الثاني عشر والثالث عشر والرابع عشر 4-5-6- /8

في هذه الأيام اغلب شي نسويه هو التسوق ... من مميزات الفندق قراند دايموند ان سوق باتونام اقل من دقيقة عنه .... فنطلع من الفندق مشي الى باتونام .... فيه سوق اسمة باتبونق ذكرته من قبل هذا اسعارة مقاربة جدا لباتونام وكلهم يتميزون بالرخص ... طوكيو سنتر اشوف ان اسعاره غالية شوي .... بس فيه مطعم روعة في الدوؤ الخامس اسمة Fifth Avenue عبارة عن عدد من المطابخ العالمية مثل الهندي – الفيتنامي –الايطالي – العربي – التاي – الصحيح انه اعجبنا مرره .... مركز طوكيو و إم بي كي لازقين ببعض يعني تطلع من واحد وتدخل الثاني وانت ما دريت فانتبه .... مركز بوبي سنتر مركز بيع جمله اقل شي ممكن تاخد ثلاث قطع .... ممكن تاخد اقل من ثلاث بس بسعر اغلى شوي من الثلاث قطع .... من المراكز الجيدة ...بلاتينيوم Platinum شكله من برا غالي بس لما تدخل الاسعار حلوة مره ...
اليوم الخامس عشر 7-8
طلعنا من الفندق الساعة 6 الصباح للمطار .... و الاقلاع الساعة 9 ص وصلنا ابو ظبي الساعة 12 توقيت ابو ظبي و من ابو ظبي طلعنا الساعة 2 م ووصلنا الساعة 3 بتوقيت الرياض ..... والحمد لله على السلامة ....

ملاحظات مهمة خلال الرحلة :

• في الرحلة من بوكيت الى جزيرة بي بي خوذوا معاكم شوي اكل سندوتشات و اشياء خفيفة لان الغداء ممكم ما يعجبكم ...
• دايم لا تاخذ اول عرض تشوفة .... رح لأكثر من مكتب و قارن العروض ...
• لاحظنا ان شانق ماي افضل بكثير من بوكيت من ناحية التسوق والاسعار ... فأننا اؤيد ان الشخص يجلس في شانق ماي مدة اطول من بوكيت ...
• الجو متقلب في بوكيت .... الشمسية مهمة ....
• يوجد في بوكيت مطاعم عربية اهمها (دبي .... وانصح فيه بشدة ) و جوهرة الخليج و علي بابا لم اجربهما ....
• في كل من بوكيت و بانكوك و شانق ماي يوجد سافاري و فيله و قرود انصح ان تكون بانكون للتسوق و شانق ماي للتسوق وعروض الفيلة والقرود و بوكيت لفانتاسي و عروض التماسيح والراحة .
• بالنسبة لفروض الفيلة والقرود اللي في شانق ماي افضل بكثير من العروض الموجودة في بوكيت .... اما عروض التماسيح فهي موجودة فقط في بوكيت واعتقد ان فيه عروض للتماسيح في بانكوك ..... بس عروض التماسيح اللي في بوكيت ما تسوى من يحضرها ...
• اسعار التسوق في بوكيت اغلى بكثير منها في بانكوك ... لذا انصح المتسوقين انهم يشترون من بوكيت او شانغ ماي افضلهم .
• فندق تارا باتونق في بوكيت متواضع .... الفندق ضخم وباتساع افقي .... كم مره اشوف عدد من الاخوان الخليجين تصير لهم مشكله في الفندق .... والاستقبال غير متعاون معهم .... فما انصح بالفندق هذا ابدا .

وفي الختام .... اعتذر عن الاطالة ..... وارجو أن يستفيد الاعضاءي من تجربتي هذه كما استفدت انا من تجارب الاخرين ... واخص بالشكر الاخت بنت البحرين .... وجزاكم الله خير جميعا