1. أسوأ شي فيها


2. الأكل


3. معلومات ونصايح


4. وبالنسبه لبانكوك

السلام عليكم
رجعنا من تايلند امس ولله الحمد كانت رحله ممتعه وحلوه بفضل الله و الاعضاء والمشرفين اللي استفدت من المعلومات اللي كانو حاطينها وكانت اكثر من مفيده
رحنا بوكيت وبانكوك
وكل شي في بوكت حلو
امان
راحه نفسيه
انفلونزا الخنازير ( كذبة الغرب على الشرق)
الاسواق خطيره ورخيصه
الفنادق عد وخربط والاسعار على كيفكم
كشكات الرحلات بالهبل
التاكسي والتكتك بكل مكان
أحلى الأماكن فيها
الفانتازي
السفاري
ركوب الفيله
atv
بوكتzoo
جيمس بوند
الجت سكي عالشواطيء
الباراشوت على الشواطيء
القوارب

أسوأ شي فيها

الأكل

جزيرة بيبي آيلاند ( والله كنت احب البحر وكرهته عقب رحلتها) كانت اسوا رحله بحياتي ما انصح فيها نهائيا مافيها متعه وطريق 3 ساعات رايحين و3ساعات جايين وساعه ونص من الباتونج عشان توصل المارينا والموج قوي والسفن الله بالخير والماي يدخل علينا بالسفينه الله يعين لو نازل مطر بعد اللي بالقارب كلهم كانو مستائين والاطفال يبكون والله كان رعب والاكل موحلال والله لايعيدها نصيحه لله لاتروحونها نهائيا لاتفكرون
يدبلون الاسعار لازم تكاسر على كل شي

معلومات ونصايح

لاتحجزون الرحلات من الفندق اللي بتسكنون فيه يدبل السعر عليكم اضعاف الكشكات وايد
لاحظت العرب ياكلون بالمطاعم ولما اسأل عن أكل المطعم يقولون الخدمه انه غير اسلامي موحلال قلتلهم ليش إذا السمك حلال شلون يصير مو اسلامي قالولي ( الله يجزاهم خير ) انهم يحطون عليه صلصة تكون فيها زيوت سلاحف وعزكم الله كلاب أتمنى تركزون على هالنقطه
والتاكسي اللي بعداد إشرطو عليه يفصل العداد قبل ماتركبون واتفقو على سعر طبعا بالمكاسر
نصيحه للأمهات - أول ماتوصلون روحو حق اقرب big c واشترو حق عيالكم اكل راح تلقون مكتوب على بعض المنتجات حلال وشركة نستله منتجاتها متوفره وحلال والخبز سإليهم عنه وبيعطونج الحلال والاجبان كيري والبقره الضاحكه متوفره وحلال حتى الماي عندهم كاتبين عليه حلال وانصح بماي نستله وايس كريم نستله وأشياء وايد
نصيحه بعد إخذو معقمات الديتول من كلينكس وسائل معاكم لأنها غير متوفره عندهم
نصيحه بعد للأمهات- إخذي معاج قدر كهربائي متوفر بجميع الاكترونيات بسعر رخيص حاطين انه للعيش بس انا والله طبخت فيه كل شي عادي بس اهم شي اختارو غرفة الغير مدخنين عشان البخاروإخذي شوية عيش وشوربه معاكم واشتري خضره من هناك وسوي حق اليهال اريح والله
والغلايه اذا حطيتي فيها ماي خليها مفتوحه من فوق رح تغلي الماي بدون ماتفصل هذا إذا حبيتي تسوين قهوه حق ابو الشباب أو شوربه سريعه
أول ماتوصلون بعد روحو الصيدليه عندهم اشترو البخاخ حق الحشرات وكريم حمايه ضد الشمس حلوه عندهم ورخيصه والصيدليات موجوده بكل داعوس

وبالنسبه لبانكوك

شارع العرب ماعجبني نهائيا الشحاذين ماشفتهم الا هناك اشكالهم تعور القلب اللي ماعنده ايد واللي متقطعه ريوله والاطفال يلحقونكم يمسكون ملابسكم يطرون شي ماشفته الا في نانا وما انصح العائلات يروحونه مافيه راحه نفسيه العرب اللي فيه منهم موكلهم اخلاقهم سيئه ماعندهم احترام وغالي عالفاضي وشوارعه ضيقه والريحه :112:خلوها على الله بس
اما الاماكن الحلوه
السفاري
دريم وورلد
هذي اللي رحتها
والاسواق بلاتينيوم عجيبه بضاعته ورخيص بس مشكلته زحمه زحمه زحمه موطبيعيه يعني البسو كمام ولاتاخذون عيالكم فيه
وطوكيو حلو بعد
اما سوق الاحد ماتسوا العنوه له بضاعته عاديه وزحمه العن من البلاتينيوم والريحه والخنقه
النايت بازار لاباس حليو
والتكتك في بانكوك افضل من التاكسي اذا كان المكان اللي بتروحونه قريب لانه يزرق بين السيارات وتوصل بسرعه اما التاكسي يطلع الروح بالزحمه مايمشي
وهذا اللي اتذكر وان ذكرت شي بعد برجع اكتبه انشالله
اتمنى استفدتو ورحله موفقه للكل انشالله