بسم الله الرحمن الرحيم
الاخوة اعضاء المنتدى كان من زمان ودي ازور المغرب عشان اشوف اللي اسمعه من جمال الطبيعة و حسن تعامل المغاربة لكن لحكمة يعلمها الله وحدة ما حصل
لكن سبحانة و تعالى كتب اني ما ازور المغرب و خصوصا كازا الا خاطب
رحلتي بعد اسبوع و راح تكون لمدة اسبوعين بالزبط و دخت في النت ادور اماكن اطلع اتمشى فيها مع خطيبتي ما عرفت فلو سمحتو تساعدوني
يقول المثل ليس على كريم تشرط بس اسمحولي اوضحلكم اللي في راسي و انشالله ما تبخلو بالنصيحة
1- ابغى اماكن تكون اجواءها رومانسية و جميلة و يا ريت تكون على البحر
2- شواطي رملية جميلة حتى لو بعيدة مسافة بسيطة عن كازا (يعني اقدر اروحها تمشية بالسيارة) و يا ريت تكون كده بعيدة عن اعين الفضوليين يعني الواحد يمدية يجلس يشتري فطور او غدا و يتغدى براحتو على الشاطئ
3- مقاهي حلوة و مطاعم و ما عندي مشكلة في التدرج من المتوسط الى الفخم بس ما يكون مستواها اقل من المتوسط
4- مخطط اروح فندق مزاجان في الجديدة بس ما اعرف بيسمحولنا نستخدم شواطئ الفندق بمقابل مادي حتى لو مو نازل فيه او لأ
5- اذا فيه شواطئ خاصة تكون حلوة و يمكن السباحة فيها لأني شفت الشواطئ العمومية في جوجل ايرث غالبا مزدحمة و ما يخفى عليكم مياة المحيط بدون الكسارات الموجودة في الشواطئ الخاصة دايما تكون متقلبه فكرتي يعني ابغى شاطئ رملة حلوة و مياه هادية
6- هادا السؤال مخربطلي مخي اشتريت هدية بسيطة طقم ذهب و خايف الجمارك يسوولنا عليه حفلة و غرامات و دفع
فلوس فودي اعرف وضع دخول الذهب للمغرب لأني خايف احطو في الشنطة ينسرق ف غالبا راح يكون معايا في يدي
7- ايش فيه اماكن تسوق حلوة ممكن نروحها انا و الخطيبة و كيف التوين سنتر
8- اي معلومة ممكن تفيد محل كل التقدير و ماهو قصور في الاعضاء لكن زي ما يقولو اهل كازا ادرى بشعابها لو فيه احد من اهل كازا يا ريت ما يبخل علينا بالرد و اهم شي يا اخوان الاماكن اللي تدلونا عليها تكون محترمة لأني طالع مع خطيبتي مو احد تاني بس لا مانع من قليل من الشقاوة بس مو كتير
شكرا جزيلا سلفا للكل اللي يساعد او يكتفي بالدعاء بالتوفيق