1. الشوربة خطيرها فيها فطر وبصل وثوم وفلفل واشياء كثيره ما عرفتها

السلام عليكم
مرحبا بالجميع اعضاء وعضوات وزوار وزائرات
بالأمس ما داوتم لأني مجاز فستغليت الفرصه وقلت في نفسي ورا ما أجرب مطعم جديد هندي قريب مني خصوصاً وقروب الاصدقاء يا مداوم يا مسافر يا نايم !
ركبت السيارة ودقيت سلف وتحركت ومن شارع لشارع ومن اشارة لأشارة ومن طريق لطريق ومن خدمه لخدمه في عز القوايل حتى وصلت للمكان المشهود مطعم الصيف الهندي
دخلت المطعم وحبيت ابلش بالتصوير على اساس تشوفون ديكور المحل وتتفرجون عليه بس توقفت لأنه كان فيه زبائن ويمكن ما يحبون يتصورون عاد بالصيف الواحد نفسه في راس خشمه وكملها المطعم اسمه الصيف والاكل مفلفل فمالها داعي تنمسح بي صالة المطعم بسبب صور
قلت ياولد مالك الا الطاولة وخذ راحتك فأخذت طاوله في الزاويه اليسرى لمن هو اتي من الخارج وداخل للمحل
جلست وتعال يا منيو وعاد وش تفهم لتفهم بس مثل ما يقولون العين تعشق قبل القلب فأخذت اتفرج على صور الأكل فطلبت شوربة حار وحامض

الشوربة خطيرها فيها فطر وبصل وثوم وفلفل واشياء كثيره ما عرفتها

مع الشوربة شلة الشوربة وهم زبادي على خبز مقرمش قرمشه ما طلبتهم بس جايين فزعة للشوربة
بسم الله نبدء, الشوربة خطيره وفيها طعم خيالي صدق الفلفل بدء مفعوله علي بس سيد زبادي والخبز المقرمش يخففون شوي من الحرارة بعد فترة وصل طلبي والحمدالله اختياري كان صائب بس حقيقه الاكل حق نفرين مو نفر واحد
متحمسين لعرض الطلبات سم ابشرو, طلبت دجاج يهبل على قولة البعض منا واسمه تيكا
طبعاً السعودي ما يستغني عن الرز
والذ بطاطس ذقتها في مطعم
ولا يهون الخبز
ورفيقي في الاكل الببسي
يالله لك الحمد على نعمائه
بسم الله بدئت وبحمدالله انتهيت
عاد الواحد لأكل وشبع وش يفكر فيه,بالحلا صح يفكر بالحلا عاد حلا الهنود غير واسمه لاص ما لاي
الصراحه الحلا عجيب
عاد الواحد بعد ما اكل وانبسط لازم شئ ينغص عليه, صح عليكم الفاتورة
تبون الصراحة بالنسبه للمطعم والاكل والخدمه يستاهل والحساب كان 108ريال سعر معقول بس الي كدرني اني متعود على ربع كبسه والحمدالله تشبع وسعرها فيها بس مثل ما يقولون التغيير زين
قبل ما انسى موقع ووصف المطعم
الرياض - الدائري الشرقي - مخرج 15 - حي الجزيرة
مع السلامه