ههه يا حبيلكم اتلم المتعوس على خايب الرجا
يعني ما فيكم واحد مغنيه الله يتبرعلكم طفارى وتجمعتوا
عموماً شوف يا حبيبنا المبلغ يكفي ل 8 أيام بالراحة
يعني الف ريال كل يوم تكفي وزيادة وممكن تزيدوا الايام كمان
لكن تسكنون فنادق بسيطة وتاكلون وجبات سريعة وتخففون الموالصلات المكلفة
بعدين الاقامة ما انصحكم فيها بهالطريقة خلوها 9 ايام 3 لانكاوي 3 بينانق 3 كوالا
ونصيحة ثانية اذا ما فيه ارتباط بالدراسة ممكن تسافرون قبل الاجازة اوفرلكم
كل شي قبل الموسم بيكون ارخص عليكم خصوصا التذاكر تفرق معكم كثير
00000000000000000000000000000000000

لاياس مع الحياة ...الامل بالله كبير .....تبي تتمشى وتحرص على مالك ...وكمان تنبسط وتتهنى ..
تعال عندي الحل .
..ادخل بال8 الاف في المضاربه اليوميه اشتري وبيع بنفس الوقت يوميا
وانت مدوام عند البنك ...ولاتخاف ...
عندك اسهم محدده اسال اهل المعرفه ايش هى ؟؟؟؟؟؟؟؟؟؟؟
يعني وشلون تشتري
اشتر سهم ب35 ريال باي شركه معروفه وبنفس الوقت ارتفع وصار 36 او 37 بيع مثلا شريت 100 سهم ب35 .ب3الاف و500 ريال ............ارتفع السهم 37 بيع الاسهم ال100
3الاف..و700 ريال ...يعني دخلت 200 ريال مكسب ؟؟ وهكذا واستمر على هذا المنوال ....وصدقني تخرج باليوم اقل شيء الف ريال مكسب ....واسال غيري ...ومايجي اخر الشهر الا انت كسبان اكثر من عشرين الف .... ..
اعرف وحده سوت كذا ودخلت بالشهر 40 الف ريال من راس مال 5000 الاف فقط
جرب وشوف .. ..........
,,,وراح تصير باذن الله بعد اسبوع صارت عشرين الف ويمكن اكثر وتتضاعف اضعاف بصورة ماتتخيلها
واسال مجرب .. ..وصدقوني ..ماراح تندموا
.وبكذا تفلونها فل باي مكان ....
وبالتوفيق ورحلة سعيده ...

اختي رمروم ههه الشباب طفارى لو عندهم سالفة كان حالهم أفضل
أخاف يدخلون ثاني يوم ولا معهم شي
المضاربة تحتاج خبرة واحترافية لأن سوقنا صعب للمبتديء
وفيه ناس تعرف شلون تغرر بعواطفنا وتسحبنا على وجيهنا وتاخذ فلوسنا واحنا نتفرج

اولا اشكر الاخ مهند والاخت رمروم على التواصل
واقول الله يا مهند يعطيك العافية طمنتني ان الفلوس تكفينا
ياخي صح احنا مفلسين بس عندنا طموح ومن زود الطموح اخاف لا يطوح بنا
يارجال سافرنا اندنوسيا في الماضي جبنا للاندنوسيين الصرع هم وفنادقهم
بس قالو لنا ماليزيا غالية وماتقدر على الماليزيين
اوريك فيهم
اما اختنا رمروم جربنا العام السوق وعلقنا المؤشر انا واخوياي فتره طويلة بس خرجنا طار المؤشر
يالله خلوها على الله لو نجلس نبي نجمع فلوس نموت ما خرجنا من حارتنا
تحياتي لكم

ماشاء الله عليك يارمروم خبيرة بالأسهم ، شكلك هامورة من الهوامير اللي أكلتوا السوق
عموما والله ياأخوي مفلس أنا أشوف 8 الآف كافية وزيادة ، وعادي دام انكم شباب يمديكم تدبرون انفسكم اذا انزنقتم
عموما اتمنى لكم رحلة سعيدة

والله شكل رمروم ، موب مخلتهم طفرانيين الا بتخليهم مديونين ، ولا راح يشمون ريحة ماليزيا ..
اخي :
احسب القيمة اليومية للفنادق + اكلكم اليومي + مواصلاتكم + ترفيهكم اليومي + تسوقكم = وراح تعرف هل تكفيكم باليوم .
على سبيل المثال تقدير صرفكم اليومي 800 ريال
0فندق + اكلو مواصلات وترفيه 400 ريال = 800 ريال
0ريال صرفكم اليومي × 8 ايام سفر = 6400 ريال
يعني الامر يعود لشطارتكم ، ومدى صرفكم اليومي ..
تحياتي

تبي سلف؟؟؟
تراني امزح لاتصدق
على العموم أنا متأكد إنكم راح تصرفوا نصف الميزانية فقط وبيننا الايام...بحسبة بسيطة لو أفترضنا معدل الأيجار اليومي للغرف في الفنادق500 يومياً (المتوسط طبعاً)اقسمها على 2(انت وخويك في الغرفة) تطلع 250 ريال اضربها في 8 تطلع 2000 ريال في 8 أيام هذا بس السكن في فنادق5نجوم(لاحظ انا قلت 5 نجوم)يعني لو 4 نجوم حيكون المصروف اقل...وهل تعتقد إنك راح تصرف خلال أي يوم مبلغ750 ريال مستحيل ...مستحيل وإذا مارجعت ب30 % من الميزانية قول المحتسب ماعنده سالفة وأرجوك تتذكر وتكتبها في المنتدى بكم رجعت من ماليزيا أنا اعتقد إنك بهذ الميزانية في 8 أيام أنت رجل ثري وليس مفلس لكن بشرط ماتنساه وهو التدبير وليس التقتير على نفسك وأنا اقول لاتبخل على نفسك بأي شئ وسوف تعود ب 30% من الميزانية...بدون هدايا ...أنا اتكلم عن ميزانية شخصية فقط..وأسأل مجرب قبلك

اخي رجل شرقي يعطيك العافية وكلامك صحيح
وشاكر لك تجاوبك
الاخ المحتسب شكراً لشهامتك اتمنى تحط رقم جوالك علشان اذا سافرنا وتورطنا نتصل عليك
انت تقدر واحنا ان شاء الله نستاهل

مفلس يبغى يسافر
السلام عليكم
المبلغ كافي جداً مع إمكانية زيادة المدة بعد
أنصحك بزيارة لنكاوي
المثل يقول
رحت ماليزيا قال رحت قال رحت لنكاوي قال لا مارحت قال إذاً مارحت ماليزيا

أتمنى لكم زيارة جميلة إنشاء الله