1. انصحج بعد تروحين سوق شنغرلا البري...

مرحبا يا دلوعة يعقوب...
حياج الله في ديرتج وبين ناسج و اهلج...
اذا كورس بشركة شلمبرجيه عيل اكيد الاخت بتروولية..
الله يوفقج مقدما..
بالنسبة للفندق.. اتمنى تتأكدين من اسمه وتقوليلنا..
مافي فندق في بوظبي بهالاسم..
شي ارجان روتانا ..
وشي العين بالاس ..
بس ارجان العين ابوظبي ما عندنا شي في بوظبي بهالاسم..
اذا عندج لمت معين قوليلي وانا بقترح لج عدة فنادق على مستوى عالي وبمواقع حلوه واسعار معقوله..
بالنسبة للمولات اللي ممكن تروحيلها..
طبعا عمدج مارينا مول عالكورنيش هو الافضل من حيث المحلات والموقع..
وانتي سايرتله لازم تمرين على كورنيش بوظبي اللي بصراحه اشوفه من احلا الاماكن في بوظبي..
شي مولات ثانية مثل أبوظبي مول .. والخالدية مول ... والوحدة مول... ممكن تجربين تروحيلهم في فترة المسا خاصة الوحدة مول فيه محلات وايده حلوة للتشري...

انصحج بعد تروحين سوق شنغرلا البري...

عبارة عن سوق جديد في بوظبي بس ستايله قديم (ستايله نفس سوق مدينة جميرا اللي في دبي اذا شفتيه)
فيه محلات متنوعه ومطاعم مختلفة .. منها اللبناني (عبدالوهاب) والصيني (نودل هاوس) والهندي (اوشنا) والايطالي (سرتو) والافريقي (ميت كومباني) والياباني (سوشو) والفرنسي (دي فروتس).. وشي محلات مختلفة وشي سوبرماركت ابيلا بعد في هالسوق... هذا بالاضافة الي ستاربكس وباسكن روبنز وبعض محلات الشوكليت..
ضروري جدا تروحين قصر الامارات...ولازم تكون معاج كيمرتج.. تحفة معمارية والدخول عادي جدا.. بيوقفونج عند الباب الخارجي قوليلهم رايحه مطعم من المطاعم اللي داخل.. ممكن تقولين (مطعم الاوبارج ولامطعم الصياد ولامطعم أنار)
كورنيش بوظبي حاولي تروحين له في اكثر من وقت.. يعني العصر.. وقت الغروب ... والمسا ... المكان ولا اروع للمشي.. وشي محلات في جزء معين من الكورنيش..
قرية التراث اللي على الكاسر... (الكاسر هو جزء من الكورنيش ... في نهاية الكورنيش وانتي رايحه المارينا يجي الكاسر في المنطقة اللي على اليمين.. ) المنطقة صغيره بس روعه للتصوير... من هالنقطة توقفين تحت سارية العلم.. وتشوفين كورنيش بوظبي بالكامل على الجهة المقابلة... وحلو المنظر في النهار وفالليل للتصوير.. تكون العمارات واضحه ومرصوصه جنب بعض..
بالنسبة لوسيلة التنقل.... اذا مب حابة تاجرين سيارة وتسوقين بروحج.. بيكون اعتمادج على التكاسي... خاصة ان بوظبي تقريبا تعتبر ملمومه على بعضها واسعار التكاسي لمشاويرج انتي ما بتكون غالية.... وغير هذا التكاسي موجوده في كل مكان...
ان شاء الله لي عودة وبقولج اماكن ثانية ممكن تروحين لها في بوظبي...
موفقة يا رب ...
اخوج سعود

دلوعة يعقوب
المارينا مول
مركز ابوظبي مول
الخالديه مول
الوحده مول
مركز المهيري
مركز فتوح الخير
السموحه هذه اللي اقدرت اجاوبج عليه
والبركه في الاعضاء

دلوعة يعقوب
بالنسبة للسؤال الأول : ياليت لو نؤجّل الإجابة عليه حتى بكره لأني مش متأكد من مكانه , ألحين الوقت متأخر وباكر بناخذ لنا لفة , وبعدها برد لكم خبر .
السؤال الثاني :
الشق الأول::::::::
المولات هي (المارينا مول / أبوظبي مول / الخالديه مول / الوحدة مول / المهيري سنتر / ليوا سنتر / الراحة مول وهذا الأخير خارج جزيرة أبوظبي)
الشق الثاني::::::::
الأماكن السياحية هي: ( فندق قصر الإمارات / حديقة الشيخ خليفة / حديقة الخالدية / وأهم هذه الحدائق هي حدائق الكورنيش الجديد , وهي عدّت حدائق على طول الكرنيش / كورنيش أبوظبي الجديد والشاطئ الجديد / منطقة الكاسر /
إضافة إلى المولات التي ذكرناها في البداية .
السؤال الثالث : بالنسبة للمواصلات فهي وكما يقول أهل أبوظبي ( بين كل تاكسيّين سيّارة )
أي أن الأجرة أكثر من الخصوصي . ففي العاصمة أكثر من شركة مواصلات ولله الحمد , يعني لو تأشر بيدك يوقفون لك إثنين مش واحد . وإن أردت أن يأتونك إلى الفندق ماعليك سوى الإتصال بالشركة . وإن أردتم الباص فهو في كل شارع تقريبا في أبوظبي. لكن الباص شوي دوشة فيه .
وأي إستفسار إحنا في الخدمة للمنتدى ولأعضائه وكذلك زواره الكرام

جزاكم الله خير ماتوقعت السرعه بردوود تصحيح اسم الفندق هو
Al Maha Arjaan by Rotana, Abu Dhabi
وفندق محجوز من الدوام ماقدر اغيره.....
جماعة الخير ودي بس تساعدووني باسواق شعبيه تكون المنتجات صناعه اماراتيه من شغل وايد اهل الامارات
ومشكورين وبانتظاركم

دلوعة يعقوب..
جي فرحتيني الله يرضى عليج..
ارجان روتانا فندق حلو وموقعه حلو.. كان اسمه بالسابق المها روتانا..
يعتبر بين ال 4 وال 5 نجوم... خدمته جدا راقيه وغرفه حلوه.. وخدمة الغرف ماعليها كلام..
سالتي عن الموقع.. طبعا المها ارجان روتانا في شارع حمدان اللي يعتبر في نص بوظبي وكل شي حولج والتكاسي متوفره بشكل كبير في هالمنطقة.. شارع حمدان كله محلات عدال بعض وشي سينما مقابل الفندق. باختصار الموقع جدا رائع..
بالنسبة لسؤالج عن الاسواق الشعبية... ذكرتلج في ردي اللي فوق.. قرية التراث اللي في الكاسر..
اي تاكسي يعرفها.. قوليلهم قرية التراث ولا كاسر الامواج ومن توصلين هناك بتشوفين لوحات..
تقريبا كل شي فيها صناعة اماراتية...
اذا عندج اي استفسارات ثانية انا حاضر... ^_^

ولد بلادي الله يبشرك بالخير وجزاك الله خير فرحتني علي الصبح ....الحمدالله انه الدوام متوصي فينا ))
بس علي حسابنا ((.......ماعليه
سمعت انه في فعاليات حلوه بالفتره الا بكون فيها منها عروض الافلام العالميه في سينمات وغير سباق السيارات ممكن تفيدني عنها يمكن ارووح ))
واذا في غيروا ماعندنا مشاكل )).... ماقصررت

الله يعينك على زحمة بوظبي

يا مبدع لا تكون متشائم , والأخت جاية جاية يعني ما فرقت .
وإذا عن الزحمة تراها في كل مكان.
وبالنسبة للفندق فعلا مميز ومكانة أيضا مميز . لكن الإطلالة مش ولا بد