- السلام عليكم ورحمه الله وبركات
السلام عليكم ورحمه الله وبركات
بالبداية حاب اقولكم قصتي مع استراليا كونها المفروض تكون شهر العسل سنه 2009 ولكن مع انتشار مرض انفلونزا الخنازير وكان في دكتور يتكلم بأحد القنوات المحلية عن هالمرض وطريقه انتشاره بالنسم اتصلت شخصيا بالدكتور وسالته عن امكانية السفر الى استراليا لانه كان نقاشه عن هالمرض وانتشاره بشرق اسيا قالي انه اذا بتسافر لازم ما تلمس أي شي اهناك وهالشي مستحين كون استراليا مشهوره بالاماكن الترفيهية فشدد علي اني الغي سفرتي ولغيتها قبل 3 ايام من السفره وعلى هالشي خسرت حوالي 280 دينار كويتي رسوم الالغاء . وبعد مرور 5 سنوات حاب اني احتفل بعيد زواجي الخامس اهناك وبعد قراءة جميع التقارير وللامانه كلها كانت ممتعه ومفيده جدا جدا جدا فراح اعطيكم جدولي وفيه بعض الاستفسارات ان شاء الله تقدرون تساعدوني فيها لانه سفرتي راح تكون شهر 5 ان شاء الله ولازم احجز حق كل شي قبل منتصف هالشهر 1- السفره راح تكون على طيران الامارات كوني املك العضوية الفضية وكوني ما جربت اكون بالطيارة اكثر من 10 ساعات قررت اني اطير لي سنغافورا راح اقعد فيها 3 ايام وبعدها راح اروح حق جولد كوست على نفس الخطوط من مطار بريسبين وراح اقعد فيها 10 ايام وبعدها سيدني 4 ايام والرجوع الى ارض الوطن الكويت * الاستفسارات : - هل هالجدول ممتاز كونها اول زياره لي حق استراليا مع العلم انه عدد الافراد شخصين انا والزوجة واخترت هالمنطقتين لانهم اهم مناطق استراليا مع العلم انه ماراح تكون اخر سفره لعشقى لهذه الدوله من خلال التقارير والصور - طريقه الذهاب الى جولد كوست من مطار بريسبين هل استخدم التاكسي او الباص او القطار شنو افضل طريق واسرع طريقه - في احد تقارير الاعضاء المميزة ذكر طريقه حجز الشقق الفندقيه وتكون ارخص من بوكينج بالنص والموقع اسمه http://www.stayz.com.au/ هل هالموقع مضموم اول لا وهل في احد جربه كوني حصل الشققه المطلوبه بنصف سعرها في بوكنج وبعض شركات السياحه . بس المشكله طالبين مني ادفع كامل المبلغ قبل الوصول ب14 يوم وفي بعضهم قبل شهر من الوصول فاتمنى من الاعضاء الي جرب الموقع يبلغني عنه و طريقه استلام الشقة لانه كل شركه لها قوانين ولوائح - الطيران الداخلي من جولكوست الى سيدني شنو افضل طيران من ناحيه الرفاهيه لانها راح تكون سفره خاصه مقاربه لسفره شهر العسل وحسب اقتراحات بعض الاعضاء افضل مكان في سيدني هيلتون و 4 سيسون لمكانه المميز هل هالشغله صحيحه او لا - بطريق العودة من استراليا لي الكويت راح تكون من مطار بريسبين هل تنصحوني اقعد فيها كم يوم والا نفس اليوم اوصل من سيدني اطير فيه الى الكويت ( ملاحظه اخترت العودة الى الكويت من بريسبين لأنه الرحلة راح تكون على مقصورة رجال الاعمال وراح تكون ارخص من سيدني بحوال 200 دينار للشخص تقريبا ) وبالختام اتمنى اني ما ازعجتكم وشاكر لكم مروركم لهذا الموضوع وبانتظار الردود بأسرع وقت
هلا أخوي وحياك الله ببوابة استراليا
بالنسبة لاستفساراتك :
1- طيران الامارات من افضل الطيران على مستوى العالم ، بس ليش اخترت انك تروح من سنغافورة إلى بريسبان !!
وبعدين بتروح سيدني 4 ايام وبترجع بآخر يوم إلى بريسبان !!؟؟؟
لا عزيزي الافضل انك تروح من سنغافورة إلى سيدني ، تقعد فيها 4 أيام وبعدين تاخذ طيران داخلي من سيدني إلى قولد كوست وتقعد فيها 10 أيام وبعدين ترجع الكويت من مطار بريسبان
أو
انك تروح بريسبان من سنغافورة وتقعد في قولد كوست 10 أيام بعدين تطير بطيران داخلي إلى سيدني ( بس رايح مو رايح راد ) ومن سيدني ترجع الكويت
2- لك حرية الاختيار سواء بالباص أو القطار أو التاكسي
بس طبعا أفضل وأسرع طريقه هي التاكسي
3- نعم عزيزي الموقع ان شاء الله مضمون ، انا مجربة بسفرتين مره بسنة 2010 ومره بسنة 2013 والحمد الله بكل مره ما أواجه مشاكل معهم نهائيا
والموقع ارخص من بوكنق بوايد وتقدر تكلمهم وتشوف الشقه الي بتحجزها وتقدر بعد تطلب منهم خصم إذا بتقعد عندهم فترة طويلة
لا تحاتي الموقع ان شاء الله مضمون
بس العفو ليش تبي تحجز شقة ؟؟؟؟
بدام انت وزوجتك بس الي مسافرين وعلى كلامك تجديد شهر العسل فالافضل انك تقعد بفندق مو بشقه !!
الفندق ارخص وفيه تنظيف يومي وانترنت وكل شي
هذا رأيي وانت حر
4- لا ما انصحك تقعد يوم في مدينة بريسان خصوصا وان مدة سفرتك محدوده وقليله بالنسبة لاستراليا
إذا عاجبتك بريسبان تقدر تروح لها برحله من قولد كوست ، رحلة من الصبح لي بالليل وترجع قولد كوست
بس تقعد فيها وتضيع يوم من أيام قولد كوست العشره !! لا ما أنصحك
وان شاء الله تروحون وترجعون بالسلامة