اخي * مسافر جديد *
نتمنى لك سفره سعيدة
بالي ياطويل العمر الكل يمدحها
وانا ان شاء الله بعد بكره رحلتي على طيران الاتحاد
واتمنى ان الميزانية تكفى جاكرتا + بونشاك + بالي لمدة 14
اربع اشخاص والميزانية 28.000 رس من غير التذاكر
هل تكفى الميزانية ام نقتصرها على جاكرتا والبونشاك
دمتم بود

لا تكفي وانا اخوك
اما بالنسبه للاخ
بس عطنا كم المزانيه ووقت الوصول والاقلاع

أهلين أخوي سلطان ..
بالنسبه للميزانيه فهي 15 ألف وبأذن الله بنحاول نزيدها إلى 18 ألف ،،
وزي ماذكرت المده تقريباً 18يوم
والمناطق اللي بنزورها ( جاكرتا - بونشاك - بالي ) مع أني ودي أزور باندونق بس خايف الوقت والميزانيه ماتكفي .. وش رأيك ؟!
إما وقت الرحله بيكون أن شاء الله كذآ /
# الذهاب: يوم السبت 6/2 السآعه 4:30 العصر الاقلاع
والوصول لدبي السآعه تقريباً 7 مساء
والإقلاع من دبي لجاكرتا بنفس اليوم آخر الليل تقريباً السآعه 2:30 والوصول هناك يوم 6/3 السآعه 2:00 الظهر !
# إلاياب : يوم الثلاثاء 6/19 السآعه 6 مساء او حولها الاقلاع والوصول لدبي السآعه 11:00 .. والإقلاع من دبي للريآض السآعه 2:30
والله يسعدك يآرب ، ويكتب اللي فيه الخير أن شاء الله
أخوك عبدالرحمن ..

وعليكم السلام ورحمة الله وبركاته
بالنسبة للميزانية كافية وزيادة ولاتشيل همها
الجدول تقدر تشوف تقارير الاعضاء وتختار بنفسك الأماكن الي تستحق الزيارة سواء في بونشاك او بالي او باندونق
8يوم كثيرة في اندونيسيا رأيي انك تقللها شوي وتخليها على 14 يوم كافية
الجبل بونشاك 3 ايام
باندونق يومين
بالي 6 ايام
اخر وجهة ( جاكرتا يومين )
الاماكن الي تستحق الزيارة تقدر تشوفها في التقارير افضلك
بونشاك ( البراشوت - الشلالات الست - حدائق الزهور - حدائق الفراولة - حديقة الحيوانات )
بالي ( كثيرة صراحة وتقدر تشوف تقريري فيه اجمل البرامج وافضلها )
جاكرتا ( منطقة انشول ) منطقة سياحية جميلة فيها كل الي تحتاجة
رحلة موفقة ولاتحرمنا من دعواتك

أخوي العزيز عبدالرحمن ...
أولا :- حسب التواريخ اللي ذكرتها اعلاه فمدة مكوثكم هي 16 يوم فقط وليس 18 يوم كما تفضلت ..
ثانيا :- باأمكانك أضافة مدينة باندونق لخط سير الرحلة فالوقت يسمح والميزانية كافية ..
ثالثا :- المبلغ الكافي لشخصين باأستثناء التذاكر الدولية للطيران هو مبلغ 16 ألف ريال يعني قطة الشخص الواحد 8 ألاف ريال ..
رابعا :- خط السير المناسب وتوزيع الايام بين المدن أقترح عليك أن يكون كالتالي :-
جاكرتا يومين > بنشاك الجبل 5 أيام > مدينة باندونق يومين > جزيرة بالي 5 أيام > جاكرتا يومين !!
خامسا :- أنصحكم بحجز السكن قبل ذهابكم الى هناك وتحديدا من موقع بوكينج الالكتروني باأستثناء الجبل بنشاك ..
سادسا :- الله يوفقكم ويستر عليكم وتروحون وترجعون بالسلامة يارب ..

هلا آخوي علي ..
بالنسبة للميزانية طمنتني الله يطمنك ، صراحه ماكنت متوقع آنه بتكفي لزيارة باندونق
والله يوفقك ويسعدك يارب .. ولاتحرمني من نصائحك ترا آخوك جديد على الديرة

هلا بأبن السعودية البارح رحت آنا وخويي نحجز رحلة
لقينا طيران الامارات ب 3400 والقطرية ب 3500 وأرخص شئ طيران الاتحاد ب 2500 بس ماهي مسترجعه !!
آقترح علينا موظف المكتب ناخذ على طيران الاتحاد بس الفئة اللي فوق السياحيه ب 3100 وتقدر تسترجعها وتوكلنا على الله وآخذناها ..
وعدلنا بوقت الرحلة خلينا الذهاب ب 6/1 والاياب ب 6/19
يعني راح تكون الايام الفعليه من الاحد 6/2 إلى الاثنين 6/18 .. 17 يوم
وبأذن الله راح امشي على الجدول اللي حطيته مع زيادة يوم لباندونق
لكن بغيت آسالك ..

• بكم تتوقع سعر الرحلات من جاكرتا إلى بالي على آرخص خطوط ؟؟
• وهل فيه تأشيرة ل آندونيسيا ومن وين آخذها ؟!

والله يجزاك آلف خير ويوفقك يارب ..
يعلم الله آنكم سويتو فيني خير ماقصرتم جميعاً ،

garwsha
حياك ياغالي مره ثانية
بعد اذن مشرفنا القدير
اسعار التذاكر لاتشيل همها حتى وقت الرحلات شركات كثيرة متوفرة يعني مابتعوق عليك ان شاء الله
عندك طيران جارودا وهو الطيران الرسمي بس غالي شوي تقريبا سعر التذكرة مابين 400 ريال للشخص
طيران اير اسيا وهو ممتاز ورخيص تقريبا السعر مابين 250 الى 300 ريال سعودي
طيران ليون وهو ارخص طيران بس مواعيدهم لك عليها ممكن تتاخر شويات سعرها تقريبا 200 ريال
طبعا الاسعار تقريبية وممكن تكون ارخص على حسب الوقت يفرق اذا ويكند او موسم
ايه فيه فيزا تاخذها من المطار اذا وصلت هناك اهم شي عب النموذج الي بتستلمة في الطيارة
واول ماتوصل راح تحصل لوح ارشادات بالعربي وقيمة الفيزا للشخص 25 دولار
واي استفسار حاضرين ياغالي

أهلين أخوي علي .. والله حلوه أسعار التذاكر مع أني بجي ببداية الموسم بس لاتصير تقصد وجهه وحده مو ذهاب وإياب ؟!
وأبي أسألك فيه رحلات من باندونق إلى بالي ؟؟
وبالنسبة للفيزا اللي أقصده وأنا أخوك هل أخلصها قبل أروح للمطار أو حتى أركب الطيارة ؟؟ ولا مجرد أوراق توزع علينا بالطيارة ؟!
وأبي رأيك بالجدول هآذا ..
يومين جاكرتا - والفندق استون مارينا ، رأيك فيه ؟
5 أيام الجبل
3 أيام باندونق
6 أيام بالي
يوم جاكرتا واليوم الثاني العصر رحلة العودة
مشكور أخوي علي ماقصرت ..
ولاتحرمني من نصائحك
الله يسعدك يآرب ،