- الرحلة جاية من اسمرة والمقاعد الي على الشباك كلها مشغولة ..
- وصلنا مطار فرانكفورت 6،15 صباحا بتوقيت السعودية 7،15 بتوقيت المانيا
السلام عليكم
ابدا معكم اخواني رحلتي الى سويسرا من مطار جدة على خطوط لوفتهانزا انا والمدام.
جدة - فرانكفورت - زيورخ والعودة نفس الخط.
بسم الله.. الرحلة كانت الساعة 1،40 صباح يوم الأحد.. واخوكم من الناس الي يجيه دوخة اذا ماكان على الشباك لازم أشوف انا وين .. على العموم كنت مرزوع على الكاونتر اول واحد يقص بوردنج والطامة الكبرى
الرحلة جاية من اسمرة والمقاعد الي على الشباك كلها مشغولة ..
صراحة يوم قالي كذا قلت ابهون من السفره كلها .. الا ام فيصل تناظرني وتقولي تكفى خل نركب
عاد انا طحت بعد هالكلمة وصرت عنتر زماني وقلت طلعنا وقصيت البوردنج .. وسبحان الله لقيت ركاب جالسين بمقاعدي ولا نايمين ههه المهم صحتهم المضيفة وقالتلهم يرجعون مقاعدهم الا وطلعو على الشباك .. طبعا سويت شهم وحلفت عليهم مايقوموا من مكانهم الله يعين نأخذ المقاعد إلي على الشباك ههه ((جت من ربي سبحانه))
مقاعد طيارات الوفتهانزا ضيقة جدا وخصوصا اذا الي قدامك ماخذ راحته ومسند الظهر عليك ومن الحجم الكبير ههه.. المضيفات بعضهم طيبات وبعضهم تحسهن مغصوبات على الشغل مكشرات والله لا يوريك.. خدمة تعبانه
المهم بعد ساعتين من الاقلاع قدموا لنا ساندوتشات او بالاصح عينة ساندوتشات وطول الرحلة مويه وعصير لين انطقت بطونا.. ويوم صرنا اعتقد فوق البحر الادرياكي عطونا وجبة فطور اومليت/سجق/بطاطس
الحمدالله الرحلة سارت على ما يرام رغم المقاعد الضيقة والخدمة المتوسطة رغم اننا لم ننم طوال الرحلة بتاتا...
وصلنا مطار فرانكفورت 6،15 صباحا بتوقيت السعودية 7،15 بتوقيت المانيا
طبعا المطار منظم والتنقل بباصات بدون سائق وتبقى علينا رحلة زيورخ وكانت بعد ساعتين أي 9،15 وجلسنا على الكراسي وكان هاجسنا اننا ننام وتروح علينا الطيارة ... ولله الحمد نامت ام فيصل ولم انم انا الى ان جاء وقت رحلتنا الى زيورخ.. واتجهنا الى البوابة وفي الطريق الى البوابة كانت هناك طفلة مع امها طوال الوقت تناظرنا وتجي عند ام فيصل وتقول لها نيجرو وتنحاش وام فيصل رغم تعليمها العالي تبتسم للطفلة وتحسب انها تلعب معها وما ركزت على كلام الطفلة من ارهاق الرحلة ولكن انا فهمتها حسبي الله عليها هي وامها الزيورخيه
المهم ركبنا الطيارة وكانت رحلة جميلة جدا والطائرة مريحة واول مره اركب طائرة مقاعدها جلد وماخذين راحتنا
ماعكر صفو هذه الرحلة استمرار الطفلة بمضايقة ام فيصل بتحريض من امها الى درجة ان الركاب الي معانا واغلبيتهم سويسريين خاصموها وعاتبوا امها والى الان ام فيصل مو عارفه ليه وتفكر ان الطفلة تلعب معاها وطبعا بعد ذلك شرحت لام فيصل قصد الطفلة بسبب عبايتها السوداء ولثمتها على وجهها وقعدت تضحك على نفسها ههه
نرجع للرحلة .. كان المنظر من الطيارة خلاب حيث القرى المتناثرة ونهر كبير يعبرها والسماء ملبدة بالغيوم واستغرقت الرحلة 35 دقيقة تقريبا.
هبطت الطائرة رغم هذا الأجواء بسلاسة وراحة .. نزلنا مطار زيورخ وهو مطار صغير وجميل ولم تاخذ من الاجرات وقت طويل ولم يتم تفتيش حقائبنا كأنها رحلة داخلية ... فقط ختموا الجوازات وخرجنا .. وانطلقنا للفندق بتاكسي ووصلنا له .. وكان موقعه مخيب للامال ورغم انه 4 نجوم للكن نجمه تخب عليه .. الحدمة معدومة ربما لاننا وصلنا يوم الاحد ؟؟!! ولكن التعب اخذ منا كل ماخذ والجو كان بارد جداا ودرجت الحراة 7 درجات فنما حوالي 5 ساعات وصحينا من الجوع .. لنا يومين وماكلنا غير فطور الوفتهانزا.. المهم طلعنا ندور اكل ولقينا مطعم قريب من الفندق جذبنا لها الكلمات المعهوده ( كباب/ فلافل/شاورما) الحمدالله طلع مطعم حلال وصاحبه مسلم
طلبنا مكرونة بالتونة وسلطة ونودلس بالدجاج ومويه وببسي وتورتيلا سبانخ والحساب كان 48 فرنك واعتبره غالي جدا على مطعم بسيط .. رغم ان اكله لذيذ ونسيت اذكر انه رغم انه اخبرنا ان الاكل حلال ماكلنا الدجاج.. ورجعنا فندقنا
وبدات مرحلة التخطيط لجولات الغد ... والوجهه لوسيرن باذن الله..
وقريبا باذن الله التكمله مع الصور
ياني مقهور من الزويرخية وبنتها..بس زين انك ما رديت عليها
ما شاء الله مبين التقرير من أوله دسم تفاصيل كاملة بس أهم شي الصور
متابعين معاك الرحلة لاتتاخر علينا