- خط سير الرحلة: دبي - ديلسدورف و العكس
السلام عليكم و رحمة الله و بركاته
و يا هلا و سهلا بالجميع
أعزائي المسافرين في رحاب الصرح الرائع بكل ما في هذه الكلمة من معنى
اتقدم لكل من ساهم و ساعد و بذل جهد في اعداد و ازدهار هذا الموقع
فلكم مني جزيل الشكر و التقدير و الحترام
جولة في Düsseldorf في مارس 2011
بأذن الله اليوم راح اخذكم بجولة حلوه طبعاً راح تكون سريعة
و المشكلة أني ما كنت أصور في الرحلة ولكن الحلو فالموضوع اني صورة هذي الجولة بالصدفة
و اتمنى اني افيدكم بهذه الرحلة
لمحة سريعة للرحلة :وقت الرحلة: شهر مارس 2011
خط سير الرحلة: دبي - ديلسدورف و العكس
الناقلة: طيران الامارات ( لانه الوحيد الي يروح بشكل مباشر لديسلدورف ) على السياحية ام قيمة التذكره 3700 درهم
الاقامة في ألمانيا: بون - فيرسدورف ( كانت الاقامة عند الاهل) طبعاً المنطقة قريبة جداً من منطقة العرب الي بادقدسبرق و الي عاد يكونون فيها المسافرين للعلاج ( الله يعافيهم ) لان المنطقة قريبه من عدة مستشفيات
و فيها يتركزون العرب من كل الجاليات و فيها مطاعم عربيةو كذلك بقالات يمتلكونها عرب
الطقس في شهر مارس : كان بارد اول كم يوم و بعض الاحيان مجرد ما تطلع الشمس يصير دافي بس بالمجل بارد معتدل و بعض الاحيان يكون ممطر ( يعني لازم معاكم مظلة )
معلومات عن فريسدورف:المنطقة تعتبر هادئة و تتكون من مجمعات سكنية
الي لاحظتها انها تخلو من العرب ( طبعاً لانهم كلهم ببادقدرسبرق لانه كل شي قريب منهم )
و هذي صور من حديقة موجودة فيها بالقرب من انهر الراين
طبعاً وعدة نفسي من بعد هذا اليوم أصور سير الرحلة كامل
جولة في Düsseldorf
طبعاً كنا مخططين قبلها بكم يوم أنزور ديسلدورف يوم السبت
ودخلنا على موقع القطارات علشان نشوف الرحلات و الاوقات و هذا الموقع أن شاء الله بفيدكم
http://www.raileurope-world.com
الي أذكره كان قطارنا الساعة 10 الصبح و خذنا ساعة كاملة لين ما وصلنا ( لانه كان يتوقف في عدة محطات )
و لما رجعنا كانت الساعة على ما اعتقد 7 و خذنا 48 دقيقة فقط ( لانه ما توقف غير في محطة كولون )
و هذي خرايط خذتها من قوقل عشان أراويكم مسار الجولة
و هذي علشان نوصل لشارع Konigsallee يعني شارع الملوك ( لمحبي الشبنق اسمه شارع الماركات )
نشينا الصبح و طبعاً أحلى شاي أخضر بعد الريوق حياكم تفضل ( الصورة من بلكونة شقة الاهل )
طلعنا و تمشينا لين ما وصلنا محطة القطارات الداخلية طبعاً التذكرة لين محطة بون الرئيسية 2,50 يورو لفرد الواحد
طبعاً القطار الداخلي يمر على اكثر من 10 محطات في منهم تحت الارض و في منهم فوق الارض
و نصيحة لازم تطلعون قبل الوقت اقل شي بساعة (عاد لا تقولون ما خبرتكم )
وصلنا المحطة الرئيسية و اشترينا التذاكر و مرينا ماكدنلز و خذا كوفي و كوكيز لزوم الرحلة بالقطار
و مثل ماتشوفون القطار وصل
و ركبنا القطار و انطلقنا و هذي صورة ع السريع
وصلنا محطة ديسلدورف و كانت زحمة ناس في كل مكان لانه عندهم اجازة
و بسرعه بسرعه أندور مكتب سياحي علشان ناخذ خريطة توصلنا لشارع الماركات و خذنا الخريطة و طلعنا من المحطة
و بدينا مشوارنا لشارع طبعاً يبعد مسافة مب بسيطة و خذناها جولة بالمره على ريولنا و كان الجو مشمس حلو
و الحين بسني من الكلام و بخليكم مع الصور لشارع
هذي الحديقة الصغيرة وايد فوسط الشارع
و هذا الصورة من وراء الحديقة وايد حلو التصميم و المحلات على جانب الشارع
و الشارع طبعاً في ماركات كثيرةو هذه الصورة تشهد
و كانت هذي جولتنا و هالصورة واحنا رادين
و قبل عن أرد البلاد لازم امر السوبرماركت اشوي لزورم الصوغة
سرد بادقودسبرق سوبرماركت توم مشهور بالمانيا و هالصوره خذتها قبل عن اوصله
طبعاً هو موجود اخر الممر
و كانت الوالدة موصتني على دلاهم لانها وايد زينه و هذي كانت نتيجة الشبنق
و في نهاية هذي الجولة السريعة نودعكم من سماء ألمانيا و تمنياتنا بأنه قدمنا الفائدة البسيطة لكم
نلقاكم على خير
تحياتي لك...