qatar2007
23-09-2022 - 05:35 am
أغلبكم يعرف أغنية البحر المشهوره :
.
.
توب توب يابحر توب توب يابحر أربعه والخامس ظهر
توب توب يابحر توب توب يابحر هات عيالنا من البحر
توب توب يابحر توب توب يابحر
ماتخاف من الله يابحر ماتخاف من الله يابحر
يانواخذهم لاتصلب عليهم يانواخذهم لاتصلب عليهم
ترى حبال الغوص قطعت إيديهم
توب توب يابحر توب توب يابحر
ياليتني فوق الدقل حمامه ياليتني فوق الدقل حمامه
أبشر ياغواص بالسلامه أبشر ياغواص بالسلامه
ياليتني إدهينه وأدهن إيديهم ياليتني إدهينه وأدهن إيديهم
وياليتني خيمه وأظلل عليهم وياليتني خيمه وأظلل عليهم
.
.
هذي الأغنيه يغنونها حريم لأول قبل موعد القفال بحوالي ثلاثة أو
أربعة أسابيع
يعني ( شهر ) يعتبر يوم القفال يوم مهم جداََ خاصة عند الأهالي
اللي لهم عيال ورياييل داشين الغوص ينتظرون ردتهم الديرة على أحر
من الجمر
يبدون الحريم والبنات يغنون هالأغنيه مثل ماذكرت قبل موعد القفال
بشرط يكون عقب المغرب
بحيث يتجمعون صوب السِيف وتشرف على الغناء إمرأه قويه ونشيطه
تتحمل المسؤوليه عن جميع النساء
أما الحريم الباقي يبدون بجمع الحطب وسعف النخل ويستخدمونها لأشعال النار
وبعدها يوقفون على هيئة دائريه متحركه وينشدون بعض الأناشيد
والأهازيج اللي أهمها توب توب يابحر
.
.
القصد من هالأغنيه
تخويف البحر وتأديبه وتهديده !!
لأنه السبب في فراق أهلهم الذي طال عنهم أيام وليالي
وفي إعتقادهم إن بجيتهم للبحر وتخويفه بيرجع أهلهم لهم !!
سالمين غانمين بالولو والخير محملين
.
.
سبب حملهم سعف النخيل المشتعل
سبب طريف ويدعو للغرابه والإستغراب !! هالسبب يخليهم يطلعون
اللي في صدورهم وقلوبهم من مشاعر جياشه وعاطفه وفراق وغيره
حيث إعتادوا على ضرب البحر وحرقه وكيه بالنار ( يكونه )
علشان يحس باللوعه والفراق اللي يحسون فيه !!
.
.
ماسألتوا نفسكم !! شسالفه القطوه !!
هالقطوه الله يسلمكم يلبسونها قطعه من مشموم تتعلق على رقبتها
وتقوم وحده من الحريم بشرط تكون شجاعه وقويه
بثقب أذن القطه وتحط في أذنها خرز
وبعض الحريم يغطسون القطووه في البحر عدة مرات والقصد تنجيس البحر بها !!
وبعدها تقوم المره القويه بشد أذن القطه بشده فتصرخ من الألم
( مياو .مياو مياو ) فترد النساء أجمع بالقول ( ياو ياو ياو )
يعني جاؤا جاؤا !! والطرف الآخر من النساء يقومون بحرق البحر بالسعف
علشان يحس بالألم اللي يحسون فيه
والبعض الآخر يحذف ويلقي الحجارة :الحصا : عليه
أو يصبون فيه عشرج ( حلول ) كي يصاب بالأسهال !!
.
ويرجع أهلهم ساليمن غانمين بالولو محملين
.
.
وهذا رابط الاغنيه عشان تسمعونها
http://gulf.salmiya.net/songs/odaa/ram/odaa9.ram
تسلمين حلوة