نشر في باريس

تقرير 1 عن باريس من بومحمد

Moyen Orient

07-12-2022 - 10:56 am

وأخيراً حصلت لابتوب ههه

أخباركم أن شاء الله بخير ..

والصراحة شعبهم جداً راقي في التعامل مع الناس ..

السلام عليكم ورحمة الله

وأخيراً حصلت لابتوب ههه

أخباركم أن شاء الله بخير ..

أكلمك الحين أنا من الشقة .. الأجواء في باريس حالياً فيها حرارة بسيطة .. لكن أول 4 أيام الصراحة الجو روعة روعة روعة .. وأمطار وخير .. لكن بعدها أختفت الأمطار .. وكان الجو مقتصر على الهوى البارد .. يذكرني بجو الشتا في قطر والخليج ..
زرت في رحلتي هذه ديزني لاند .. وكانت عبارة عن قريتيين كل وحدة أكبر من الثانية .. سعر التذكرة للقريتين هو 49 يورو .. لكن أنا خذت القرية الكبيرة بس .. وكان سعرها ب 39 يورو .. والحمد لله أني خذت قرية وحدة بس .. لأن القرية جداً جداً جداً كبيرة .. ويوم واحد ماتكفي لانك تلف ديزني لاند كلها ..
على فكرة . في محلات أهناك لبيع أغراض ديزني لاند .. وسعرها الصراحة أرخص من سعر محلات ديزني الي في باريس .. مثل الي في شارع الشانز ومجمع اللاديفانص .. يعني أنا فرضاً دش خاطري في دبدوب (شخصية من شخصيات شركة المرعبين) الأزرق والله ناسي أسمه ههه (صرت ياهل) ههه .. بس الي يشوف أغراضهم عن جد ينجن .. المهم خذته من قرية ديزني لاند ب 19 يورو ونص .. وحصلته نفسه نفسه حكم في شارع الشانز ب 25 يورو !!
المهم .. شارع الشانز جداً مزدحم وخاصة مابين الساعة 10 صباحاً و5 عصراً ..
أي صح ... الفرنسيين جداً متعاونين مع الناس وخاصة الخليجيين .. وأنا عني ماعرف كلمه فرنسي إلا بنجور وبنسوار وميرسي ... لكن والله أمشي حالي معاهم وعندهم طوله صبر وطوله بارض ينطورنك لين تفهمهم أيش تبغي .. ويساعدونك والله .. وحصلي أكثر من موقع .. ووجدت الي يساعدني ويدلني وهم مبتسمين ..

والصراحة شعبهم جداً راقي في التعامل مع الناس ..

وزرت اليوم متحف اللوفر الصراحة مافيه شئ فله .. كله تماثيل وأصنام لكن اللوحات جداً رائعة والله .. والمتحف جداً كبير والله .. جداً جداً .. طابق سفلي وطابق أرضي وطابق أول وطابق ثاني .. وكل جناح أكبر من الثاني ..
وزرت برج أيفيل .. الصراحة منظر حلو من فوق .. الدخول للتوب فلور (الطابق العلوي) ب 10 يورو و20 سنت .. والطابق الوسطي ب 5 يورو والطابق الأول ب 3 و20 سنت تقريباً ..
وباريس الصراحة مش غالية جداً جداً .. الصراحة كنت متخوف .. لكن الي شفته .. عكس ذلك .. من المطار لين الشقة في اللاديفانص ب 42 يورو .. بس !!
وتذكرة المترو ب 5 يورو ذهاب وعودة لشخصين !!
يعني أسعارها حق تمشيه جداً ممتازة ..
على العموم .. أنا عطيتكم نبذه سريعة سريعة عن باريس .. وأي أستفسار أنا حاضر .. وأنتظروا الصور بعد أسبوع تقريباً .. لين أرجع وأرتب حالي شوي .. وأدفع أشتراك الأنترنت الي في الدوحة الي أنقطع ههه
تحياتي لكم
بومحمد

رحلتي الى فرنسا

التعليقات (9)

آخر الفرسان

07-12-2022 - 02:16 pm

الحمدلله على سلامتك
انا رحت لباريس وعام 2000 وسكنت في فندق كاستيجيليون 4 نجوم وهو ارخص فندق هناك وفخم جدا وفي منطقة دبلوماسية ومقابل قصر الاليزية
لاتنسى تاخذ لك جولة ليلية على المركب في نهر السين
ورح لمقاهي شارع الشانز ، نصيحة اذهب للجزء الآخر من الشارع اللي مافيه عرب عشان تبعد عن دوشة الراس والمعاكسين
الله يسعدك في باريس ويوفقك آمين ونعم الرجل انت على التواصل والاهتمام باعضاء منتداك هذا
تحياتي لك وعقبال ماترجع لنا بالسلامة

Hesham

07-12-2022 - 03:17 pm

ياهلا والله ابو محمد ... وحمدالله انك لقيت شي نقدر نتواصل فيما بيننا ...
بيصير هالموضوع معلومه مهمه لكل من أراد زيارة باريس بجول الله ورعايته ..
ترجع لنا محمل بالهدايا ان شاءالله ابومحمد
تحيه وتقدير

ابو مضاوى

07-12-2022 - 04:18 pm

ابو محمد ياخى ارجع بسرعه اشتقنالك وولهنا عليك وعلى سواليفك الزينه تحياتى لك

AlSahab

07-12-2022 - 05:20 pm

هلا والله بو محمد ,...
من قدك يالفرنساوي ..لا وراعي دزني والله اتمنى لك الراحه والاستمتاع وننتظر الصور وانتبه تصير مصور اللوفر ترى صور الاصنام تهوس
تحياتي لك

ابو دغش

07-12-2022 - 06:21 pm

لايكون شريت الدب الأزرق كان شريت البنت الصغيره الي تطلع في شركة المرعبين
المحدوده حلوه مره .....
ترجع لنا محمل بالهدايا ان شاءالله ابومحمد ...
وترجع بالسلامه ..

معجب

07-12-2022 - 07:22 pm

ياهلا والله با بو محمد , والله اشتقنا لك .....
واشتقنا لمواضيعك الشيقة , ننتظر صور رحلتك على احر من الجمر .....
تحياتي

عبدالعزيز

07-12-2022 - 08:23 pm

هلا والله ببومحمد...
واخيراً لقيت الاب توب ... الحمد لله ... والله موجز جميل لرحلتك الفرنسية...
وننتظر منك المزيد تقبل تحياتى,,,

الكاسب

07-12-2022 - 09:24 pm

الحمد لله على السلامة يابومحمد

Moyen Orient

07-12-2022 - 10:25 pm

هلالا فيكم جميعاً ..

أن شاء الله قدرت أفهمتكم الوضع ...

هلالا فيكم جميعاً ..

الصور أن شاء الله راح أحطها .. بس مهلوا علي شوي لين أرجع وأرتب حالي شوي في الدوحة . لأن الأنترنت dsl مقطوع .. والأنترنت العادي موجود .. وأنا إذ بانزل الصور لازم أنزلها على الدي أس أل .. لأنه أسرع بوايد .. أنطروا علي شوي ..
على فكرة .. اليوم رحت غابة بولينا مادري بولون .. الصراحة غابة كبيرة جداً .. وومتعه وبالأخص عند البحيره . تقدر تأجر قارب أبو مجاديف وتجدف .. والله يعين يدك وكتفك بس ههه ...
وتقدر تأجر (سيكل) دراجة هوائية .. لكن للأسف أسمحولي يالربع والله ماوديت الكاميرا العادية علشان أصورها .. وديت بس كاميرا الفيديو ... يمكن أنزل صور منها .. مع أن صورها مش ولا بد ..
ورحت بعد جاليري لافاييت . الصراحة كبير جداً جداً ... 7 طوابق للقسم النسائي وعلى ما أضن 5 طوابق للقسم الرجالي .. الصراحة مالفيته كامل .. لأن شفت سعر شنطة نسائية ب 450 يورو !!!!!!!!!!!!
شنطة الي نحصل نفسها ويجيبون نفسها من ماليزيا ب 30 و 40 ريال أنا حصلتها في جاليري لافييت ب 450 يورو .!!!!!!
الصراحة الي طلع فيه من معلومات أن مجمع اللاديفانص هو المجمع المناسب في السعر والمناسب في البضائع وتجد فيه كل شئ من مطاعم وكل شئ ... وأفضل محل للعطورات والمكياج هو سافورا .. تجده في شارع الشانز وهو الفرع الرئيسي وأيضاً تجد منه محلين في مجمع اللاديفانص.. وميزتهم أنهم يرجعون لك التاكس إذا شريت أكثر من 300 يورو . وايضاً يعطونك هدايا قيمة الصراحة وتستاهل وهدايا وايد الصراحة ...
التاكس أو الضرائب أنا شريت من سافورا محل العطورات ب 320 يورو رجعولي 50 يورو وشوي ... أنا قريب 16.5% أرجاع الضرائب ... ولكن يعطونك ورقة تاخذ الضرايب من المطار .
الجو حالياً فيه نوع من الحراره والشمس تبط الراس والله جنها شمس الخليج .. حاره ... بس الصراحة أول 4 أيام كان الجو ولا أحلى .. والحين بدى يخترب
صحيح .. الحين في تنزيلات على جميع الملابس الشتوية والجاكيتات الشتوية فقط لغاية 5 أغسطيس ... بس الجلديات والله روعة ..بس مشكلتها غالية شوي ...
نسيت أقولكم اني ذهبت على القطرية . وكان أيرباص A330 وهي من أحدث الطائرات في الخطوط القطرية .. وكانت الخدمة ممتازة والله والأكل ممتاز والتكييف جداً ممتاز .. ولا مطبات هوائية ولا شئ اللهم كمن مطبه خفيفه عن الخاطر بس ماتعذبنا معاهم وايد ..
الخليجيين بدوا يتوافدون وخصوصاً من الإمارات والسعودية .. هذا الي شفته في اللاديفانص .. على فكرة .. أنا رجت شارع الشانز بس ماعجبني وايد .. وأنتبهوا من السودانيين والمغاربه والجزائريين في شارع الشانز .,.. أنا لين سمعت أحد يتكلم عربي ويقرب صوبي على طول أعطيه بنظره غضب وأقوله روح ههه شديد طالع على جدي ههه
عن المضايقات الحمد لله ماشفت أي مضايقة .. وأستخدام الميترو جداً سهل .. في باريس 15 خط ميترو تقريباً .. وكل خط يوقف عن كذا محطه حوالي 15 محطة وكل محطة لها أسم . وأنت أول ماتركب الميترو شوف الخاطة الوجوده على جميع الأبواب (أبواب الميترو) على فكرة الميترو كله أبواب .. يمين ويسار ... وفي الخط الواحد أكثر من ميترو .. المهم الميترو يوقف في كل محطه تقريباً لمدة 15 ثانية . ومن ثم يتحرك للمحطة التي يليها . وفي آخر محطة يرجع مرة أخرى وهكذا ... وفي بعض المحطات يوجد محطات للخطوط الأخرى مثل محطة شارديقول فيها محطة ل خط 7 و 9 وخط كنكورد فيها خط 9 و3 وهشكل .. يعني بتمر على جميع الخطوط ..

أن شاء الله قدرت أفهمتكم الوضع ...

أما عن الي سأل عن فندق نوفيتيل فموقعه قريب من اللاديفانص .. وتحته على طول نهر السين وتحت على طول أيضاً محطة الميترو .. يعني الذهاب إلى الشانز بيكون عن طريق الميترو ... عبر 3 محطات في الشانز .. جورج الخامس .. وفرانكلين .. وشانزليزيه .. وأنصحكم بفرانكلين .. لأنه في النص تماماً ..
الشعب الفرنسي كل واحد في حاله ... والشعب ضعيف في اللغة الأنجليزية .. بس والله تقدرون تمشون حالكم بكل يسر وسهوله .. وميزة الشعب الفرنسي أنه جداً متعاون .. جداً جداً ... ماتوقعته بهذه الصورة ..
على العموم .. أي خدمة أنا حاضر .. وتحياتي لكم
بومحمد

باريس المسافرون العرب