صور من فندق جراند حياة دبي
السلام عليكم ورحمة الله وبركاته
هذه أول موضوع لي في هذا المنتدى الرائع
وبهالمناسبه أحب أشكر إدارة المنتدى المميز و كل من أفادني وكتب تقارير أو ذكر معلومات أفادتنا في سفرنا
كانت زيارتنا لدبي في الصيف وكان الفندق رائع بس الجو كان يروع حر ورطوبة مو طبيعيه
بس مع هذا ولو أحبك يا دبي الله لايخلينا منها
و قررت بعدها إني ما أطبها في الصيف عقب هالمره
السكن كان في فندق جراند حياة دبي
فندق خمس نجوم
خدمتهم ممتازة جداً والفندق نظيف عموماً
غرفته كانت كبيرة نوعاً ما وحمامهم أعزكم الله كان حجمه كبير يمكن كبر الغرفة إلاش
ملاحظة : الغرف المطلة كان حجمها أكبر من غيرها
اللوبي كبير والمنطقة المجاورة للفندق حلوه فيها مساقط مائية ومسابح ومزروعة بالكامل بس والله عجزت أطبها في النهار طبعاً أقصد الحديفة مو المسبح
من برودة الجو
بالليل ما تستمتع صح بهالمناظر لان كل شي ظلام
عموماً يقع الفندق في منطقة بر دبي
اعتبر موقعه حلو تقريباً في النصف والفندق هادي ومريح صراحة
وقريب جداً من الخور وسوق الوافي كنا ننزل له على رجولنا بعض المرات
جنبه بقاله تفك ازمه في واحد من الأبراج التابعة له صغيره بس حلوه
أخذنا غرفه كانوا يقولون أنها مطلة على الخور وخذوا زيادة في الحجز لأنها مطلة على قولتهم
تم الحجز عن طريق مكتب سفريات بالرياض وكان سعره ممتاز
نسيت بصراحة بكم لأننا كنا مسافرين بالصيف من 8 شهور تقريباً
و سكنت 8 أيام وكل يوم اطل أحاول أشوف الخور اللي يقولون عنه وعجزت ألقاه يمكن عشان الغرفة في الدور الرابع
عموماً الفندق ليس مطل مباشره على الخور بينه وبين الخور حديقة وشوارع فقط
إطلالته كانت حلوه على حدايق ومناظر حلوة بس كان نفسي بشيء يطل على بحر ولا خور أهم شيء نلمح ريحه مويه
ما أطول عليكم وهذي الصور معاكم أتمنى أنها تعجبكم
كل الصور الموجودة كانت من تصويرنا ماعدا صورتين الأولات صور الفندق من الخارج لأني بصراحة ماصورته
هذي صورة من النت لواجهة الفندق
صورة للاستقبال عند وصولنا
هذي صور للمرات
صور من داخل الغرف
وهذي صور يبين فيها إطلاله الغرفة وبصراحة الغرفة تصير شرحه إذا فتحنا الستارة
سوا الفندق فينا مقلب مدري مفاجئة بس كانت حلوه
رجعنا للفندق عقب في يوم مليان بالفرفره وتعبانين ونبي نريح وننام
ويوم دخلنا ونلقى الكيكه على السرير وجنبها صحن فواكه وشوك وكاسات
وقمت أناظر زوجي وأنا مبسوطة أحسبه مجهزها لي ومسوي لي مفاجئة
وتوني بتشكره على هالمفاجئة الحلوة مع أني مدري وش مناسبتها
بس هو اللي بدا وقالي وش ذا الحركات متى طلبتيها يامال العافية وأحرجني وقام يتشكر
سألني عن التاريخ اليوم يوم قلتله استغرب !! وقالي بس تراك غلطانة
وأنا والله ماادري وش يتكلم عنه
وقال ترى اليوم مو عيد ميلادي شكلك مخربطه بالحساب بس مقبولة منك يعتبره اليوم ولا يهمك
بعدها حسيت إن الدعوى فيها سوء فهم
قلت له والله تستاهل أكثر ومهوب حقك لو علي كان جت لك مع الكيكه مفطح بس عاد بلا إحراج
مو مني الكيكه
اثاري الفندق مرسلينها لنا والكرت طايح وما شفناه على طول
الله يسلمهم ويعافيهم ولا يهينهم ماخذين تاريخ الميلاد من الجواز وطبعاً مسجل غلط 1/7 مثل اغلب السعوديين
بس غلطه حلوه من صالحنا
بعد هالحركه قررنا نسافر كل سنه في هالتاريخ
نرجع عاد نكمل الصور
صورة الكيكه عن قرب
والله ما كلناها ذاك اليوم كنا شبعانين ومحلين وخلينها من بكره مزمزنا عليها
صورة للإطلالة عن قرب
وهذي صورة الحمام أكرمكم الله
من اليمن
من اليسار
وهذي لقطات من داخل الفندق والمطعم والكوفي الموجود به
هذي صور فندق قراند حياة دبي اتمنى أكون قدمت شيء يفيدكم ويعجبكم
هذي صوره أحبها مالها علاقة بالفندق التقطتها يوم كنا في دبي أتحدى احد يعرف وين صورت هاللقطه
؟!!!
تحياتي للجميع