1. تاريخ الرحلة 27/5/2001 الى 3/6/2011


2. طيران : الاتحاد( ابوظبي - اسطنبول )


3. الاتراك بصراحه 90% منهم طيبين ويساعدون بعكس ماسمعت عنهم من قبل


4. لاتروحون للمطاعم اللي مافيها قائمة اسعار لانهم بيدبلون السعر عليكم..

السلام عليكم
بداية .. ارحب بكم جميعا واشكر كل ما ساهم في هذا المنتدى الرائع من مشرفين واعضاء ..
انا سوف اكتب تقرير مبسط ومختصر عن سفرتي الى اسطنبول وبالاضافة الى بعض النصائح المهمه..

تاريخ الرحلة 27/5/2001 الى 3/6/2011

طيران : الاتحاد( ابوظبي - اسطنبول )

السكن : فندق CVK ( فندق 4 نجوم نظيف يقع في ميدان تقسيم وعلى بعد خطوات من شارع الاستقلال .. صراحة افضل ما في الفندق هو الموقع .. بجانبك جميع الاشياء .. المكان جدا امن .. سعر الغرفه ب 160 يورو مطله على البحر ( ولو انه بعيد بس يمشي حاله) الحجز كان من قبل مكتب الحران وهو كان ارخص من بوكنغ )
الاماكن التي زرتها : قصر توبكابي - ايه صوفيا - بلو موسك - رحلة بحرية الى مضيق البسفور - جواهر مول - فورم مول - وايضا مول كله ماركات وجلساته الخارجية روعه لكن نسيت اسمه ولكن انصحكم بالزيارته - تلفريك الجلسات اللي مطله على اسطنبول - تلة العرائس - مينا تورك - شارع بغداد ( شارع عادي محلات تجارية وما احس انه يصلح للمشي او للزيارة)
شارع الاستقلال .. من اجمل الشوارع اللي مرت على ..( شارع حيوي ما تمل منه صبح ومسا العالم تمشي .. مطاعم وكوفيات على يمينك ويسارك .. بصراحة اكشن )

الاتراك بصراحه 90% منهم طيبين ويساعدون بعكس ماسمعت عنهم من قبل

Simit Saray هذا مدري كوفي مخبز مطعم .. بس رائع جدا خاصة اذا بتتريق فيه .. اكله لذيذ ( معجنات ) وبتحصله في كل كورنر
نصائح مهمه: لاتركب تكسي اصفر مهما كانت الحاجه .. خاصة التكاسي المتوقفه في ميدان تقسيم وبالاخص موقف التكاسي اللي مقابل فندق CVK لانهم نابين ومحتالين على العرب ( انا اعرف انه ينصبون بالعداد وقلت بجرب استخدم التكسي وبالفعل ركبت تكسي من الباركن اللي مجابل الفندق وقلت ابا اسير فورم مول .. اول ماتحرك خطوتين وقف لشخص ثاني وقالي هذا راح يبدل الشفت عقب ماينزلني .. قلت مافي مشكله ( على نياتي ) المهم مشينا وكان العدا يرتفع سعره بشكل مخيف 30 وفجاه يقفز 48 يعني عيني عينك .. ماعلينا من هذا ... وقف مقابل المول ونزلت والعداد كان ب 92 ليرة وعطيته 100 ليرة ( ورقتين 50 -50 ) وفجاه خذاها وحسيت بحركة غير طبيعية ورجع يقولي انت عطيتني 5 -5 يعني ورقتين خمسه مب خمسين ... هنا انا انصدمت .. قلت لنفسي انا عطيته خمس ولا خمسين .. شككني في نفسي .. لكن انا كنت متاكد اني عطيته 50 وقلتله انا عطيتك خمسين وربيعه يدافع وياه .. المهم كلمه من كلمه ونا كنت مصر اني عطيته 50 .. شاف ماشي فايدة وكلمته بقوة .. راح سوا فلم اونه زعل وقال لربيعه اركب ونا قفيت عنه وتم يقولي حرام حرام ... بصراحه انقهرت نصب قوي .. المهم عقب كم يوم لقيت اخوات عربيات وبالصدفة قالولي على نفس الحركة اللي صارت معاي .. وهم يحليلهن شككهن وعطوه 100 مرة ثانية ... الخلاصة لاتركبون مع التكاسي مهما كانت الحاله

لاتروحون للمطاعم اللي مافيها قائمة اسعار لانهم بيدبلون السعر عليكم..

اول يومين كنت اخذ سيارة مرسيدس ميني مع سايق ب 130 دولار .. وعقب قلت بجرب الاندر جراوند .. وبصراحه كان رهيب وسهل وسلس .. واللي معاه عربانة اطفال لا يحاتي ... الامور طيبه ( استخدموا القطار وايد اريح واوفر )
الجو كان روعه ...
الحياة غالية عندهم مطاعم مواصلات فنادق ... الخ
الرحلة كلفتني 20 الف درهم تذاكر ل شخصين وفندق واكل وتسوق ومواصلات
بشكل عام الحمدالله انبسطت فيها وهي تستاهل ارجع لها لكن عقب فترة يعني 3 او اربع سنوات ولمدة 3 ايام بالكثير في اسطنبول
اتمى اني قدرت افيدكم ولو بشي بسيط
تحياتي