يتبع ...
بروح اتسحر و راجعه بإذن الله

باك ..
الخميس: ماينز وندر لاند
رحنا للسوق تبعه + الجوله الي في القارب .. و ما رحنا للملاهي... لأنه هنا في المنتدى ما مدحوا الملاهي فما تحمسنا نروح له ..
بس كانت طلعه مرره حلوه و هاديه .. خصوصا انه اليوم الي قبله كان يوم صاخب في جنتق ..
الجولة الي في القارب مرره تونس بالنسبة للسوق عادي .. اقرب الى انه سوق شعبي ..
عموما بقولكم رأي بأسواقهم بشكل عام في آخر التقرير
الجمعه: الذهاب الى كاميرون هاي لاندبالسيارة و سكنا في فندق ستروبري
آآآآآآآآآآآآه يا كاميرون هاي لاند .. جنة الله في أرضه .. اهلي اكثر شئ اعجبهم في ماليزيا الكاميرون..
ما ادري ليش ما مدحوه الناس، بس اشوا ما طعناهم ههه ..
يمكن عشان ما فيه ملاهي و لا اسواق .. بس تكفي الطبيعة الساحرة و الجو الي يفتح الناس ..جلسنا ثلاث ايام .,. و لو بنروح مره ثانيه بنجلس اسبوع او اكثر .,.
ملاحظة: بالنسبة للطريق، كنت متخوفه لأنه الناس تقول الطريق وعر و صعب .. هو صح شوي متعب .. بس كان الطريق بحد ذاته ممتع ..
على فكرة في الطريق يبيعون فاكهه ريحتها خياس بقوه .. بس مو فاكره اسمها ههه
السبت: تور تبع الفندق او رحلة الى مصنع الشاي و الفراولة و العسل ..
و كانت جوله هادية و ممتعه ..
الأحد : انتقلنا الى فندق اكوتريال لأنه بصراحه ما ارتحنا في الفندق الي قبل ..
و استغلينا اليوم بجولة في االمناطق القريبة من الفندق ..
الأثنين: رحله بالباص من الكاميرون الى بينانج

الثلاثاء: ركبنا الدببات البحرية الي في الفندق .وقت الصباح ..
و في الليل رحنا لسوق اسمه جوارني بلازا .,.
الاربعاء: انتقلنا الى فندقNAZA صاحب الفندق مسلم .. و كانت غرفتنا تطل على منظر ساحر ..
+ مصنع الأقمشة المزخرفة (أكبر مقلب ما يسوى كلمة مصنع) +محل شوكلاته و قهوة + مطعم هندي اسمه Patace at India و هالمطعم نصاابين بقوة .. و بكتب موضوع آخر عنه ان شاء الله ..
الخميس: رحلة الى جزيرة القرود.. الرحلة مره ممتعه .. بس عيبها ان نفس الجزيرة وسخه ..
بعدين تعشينا في تشيليز في جوارني بلازا

تقريرك رائع بس وين الصور ؟؟؟

الجمعه : السفر بالطائرة من بينانج الى كوالا +التمشية في شارع العرب في كوالا ثم الذهاب الى مطعم ناب الايراني
بالنسبة للرحلة بالطائرة غير صراحه .. منظر السحب حوليك رائع ...
السبت: الذهاب الى البرجين .. و طبعا مره حلو من ناحية اسواقه و مطاعمه
الأحد: الذهاب الى تايم سكوير (ملاهي+تسوق)
الملاهي حقه حلوو .. بس السوق عادي ..بعدين طلعنا منه و رحنا الى سوق اسمه Lot Tn ما اقدر اعطيكم انطباع عنه لأني ما اتذكره بس اظنه كله ماركات فخمه ...
الاثنين: الذهاب الى سن واي لاقون و مره حلوو .. احلى شئ اعجبني الجسر ههه .. و الالعاب المائية روعه على قولة اخوي .. مو انا يا حسره
الثلاثاء: رحنا ل افاموسى
كنا بناخذ شقة .. بس احسن شئ انه اخذنا فله مع مسبح ..
مرره جميل منظر الفلل يشرح النفس :x1:
الاربعاء: (السفاري) و رحلة حول افاموسى (الجزيرة) ثم عرض الطيور و عرض الحيوانات
ام الي اتذكره انه حر و السفاري حقتهم عاديه و عرض الطيور حلو لولا الحر و الرطوبة ..
و بنفس اليوم فازت العراق على كوريا
عموما افاموسى ..بس يكفيها لو تسكنوا في الفله الي تبعها .. فعالياتهم و رحلاتهم عادية ..
و مع ذلك اقول افاموسى ما يتفوت ابدا
الخميس: رجعنا الى كوالا .. بعدين رحنا لسوق اسمه Maju Junction عاادي جداا بس انه جنب الفندق الي كنا ساكنين فيه ..
الجمعه: موعد رحلتنا الى الرياض
بس يالصباح رحنا ل السوق الصيني ما يسوى ابداا .. غير أنه حر و رطوبة فضيعه
+جولة في منطقة بوتراجيا مسجد و سوق شعبي .. و جوله ما عليها حلوه ..
بعدين رحنا لسوق اسمه الماندا عاادي بس لأنه على طريقنا ..
و انتهت الرحلة ... و رحنا للمطار .. و رجعنا بالسلامه و لله الحمد للرياض

1. ف الله يجزاهم خير كل الي افادونا باي معلومة حول ماليزيا ..

الخلاصه او الزبده ::

• أستفدت مرره من التقارير و المعلومات الموجوده في المنتدى، و هالشئ الحمدلله ساهم في نجاح رحلتنا

ف الله يجزاهم خير كل الي افادونا باي معلومة حول ماليزيا ..

• أسواقهم بشكل عام ، مافي فرق كبير بينها و بين اسواقنا، حتى من ناحية الاسعار، لو بروح مره ثانيه ما راح اضيع وقتي بأي سوق باستثناء المول الي في البرجين ..هو الي فخم و فيه ماركات مو عندنا .. مع اني مدمنة شوبينق.

يعني قالوا لنا عندهم 1 شباشب حلوه و رخيصة .. اول شئ انها رديئة ثانيا الي يبي شباشب رخيصة عندكم الاندلس و صحارى احلى .
2 السوق الصيني .. و قالوا فيه تقليد ماركات .. بصراحه تقليد مكشوف جدا .. و ثلاث ارباع بضايعهم ماليه الرياض .
3 لا تحرصون تشترون من الماركات الموجودة عندنا، لأنها اذا ما صارت نفس السعر فأنها اغلى
مع اني شريت كثير، بس الي ما تحسفت اني شريته : الأشياء التذكارية مثل مجسم صغير عن البرجين، و التيشيرت الي قلت لكم عنه و غيره ._ و أختي اشترت عدسة كاميرا تقول انها مو موجوده هنا .. و الكتكات حقهم لذيذ ههه

• حتى الملاهي مافي فرق مرره من ناحية الألعاب بس الديكورشين تبعه هو الي يفتح النفس
• سن واي لاقون+جنتق+افاموسى+ متحف اكواريا+ماينز وندر لاند+كاميرون هاي لاند ..

ما تتفوت ..
بس الكاميرون الي يكره الهدوء لا يروح لها ، لأني شفت هنا ناس يذموههاا بقوه فما ابي اوهق احد ..

• تجربة البراشوت في بينانج او لنكاوي ما تتفوت
• بصراحه كانا نفضل نروح ل لنكاوي بدل بينانج اتوقع انها افضل بس ما حصل ..يله ان شاء الله نعوض في الرحله القادمة

و ان شاء الله يكون عجبكم تقريري المتواضع جدا، و الي ما يجي شئ عند تقاريكم ..
و ان شاء الله اذا في وقت راح أضيف صور ..
..دمتم بخير .. تقبلوا تحياتي ..
جوانا

مشكوره على التقرير وعلى المعلومات اللي ذكرتيها

تقرير جميل
برغم عدم وجود الصور
بس استفدنا كثير
مشكور ماقصرتي