- التاكسي
- واهني في الطريق
- تابع
- السياره المعلقه في ووكينق ستريت
- فوق الاجواء التايلنديه
السلام عليكم ورحمة الله وبركاته
هذه رحلتي إلى تايلند
والتي زرت فيها ( بتايا + بوكت + كاناشابوري + سارابوري )
المطار
داخل المطار
التاكسي
واهني في الطريق
تابع بعد ركوبنا التاكسي تقريبا ساعه ونص من مطار ببانكوك الدولي الى بتايا الحلوه طبعا كانوا الفنادق كلها فل في عيد الاضحى حتى فندق بي ان بخشيش 2000 بات مو راضي يسكنه واخر شي سكنه بفندق ناسي اسمه على الواكينق ستريت بس فاشل قليل الي ساكنين فيه بس شنسوي اربع ساعات ندور على فندق مو لاقين وسكنا يوم في الفندق واليوم الثاني دورنا على فندق واخيرا لقينا غرفه وغرفه ديلوكس والفندق اسمه سوالاي على شارع مون لايت وفندق صراحه حلو وجديد واخليكم مع الصور للفندق للغرفه والغرفه الديلوكس
الفندق هذا فيه سيفتي وفيه مغسله وفيه حق الناس الي تبي تطبخ بلكويتي جوله ماادري عاد الخليجيين يفهمونها ولا لا المهم انه فيها طبخ وفيه بلكونه وغرفهم كل يوم تنضيف وريسبشن محترم وناس خدومه وفيه وايرلس ببلاش تاخذ رقم الوايرلس من الريسبشن حق سبع ايام واذا خلص تروحله مره ثانيه يعطيك رقم جديد المهم انه فندق ممتاز ومكانه حلو بعيد عن الزحمه بس غرفته وسيعه وكبيره وبلكونه فيها قعده حلوه بس طبعا الي يبي المكان الزين ياخذ الغرف الي تطل على واجهة الفندق حلوه حيل نفس ماتشوفون تطل على بابا الفندق وبلكونتك تفتح على المسبح الي بالصوره
تابع
وهذا سوق رويال قاردن ( ابو طياره ) سوق فيه العاب وفيه مطاعم وفاتحين متحف للشمع بس مو قوي يعني الشخصيات مو قريبه حيل يعني على قد حالهم على الاقل جربو مو احنا مانسوي حتى سراميك وفي المتحف شخصيات معروفه مثل مشاهير هوليوود ويل سميث + جاكي شان + بروس لي + جوني ديب بطل فلم القراصنه وهو ممثلي المفضل + باريس هيلتون ويعض الرؤوساء مثل اوباما ورئيس روسيا وباقي رؤووساء شرق اسيا
بعدها طلعنا لسوق ميجور وفيه احلى بولينغ ولعبنا ساعتين وطلعنا والا تحت في وحده عندها حوض فيه سمك الربع ساعه ب 99 بات يعني 100 بات بس سوالف التجار مايخلونها بس حلو والله المساج اول ماتحط رجولك تحس بهزه كهربائيه وبعدين عادي تقريص على الخفيف ههه
وبعد السمك رحنا مرينا كارفور صراحه سوق زين بس مو نفس رويال قاردن وسنترال السنترال احسنهم طبعا وبعده بق سي ورويال قاردن وبعد كارفور رحنا اكلنا بالمطعم اللبناني بالسنترال صراحه مطعم اقل مايقال عنا ممتاز موجود بالطابق الرابع من الخارج من صوب الشارع الخلفي للأسف ماكان معاي جهاز اصوره بس اكيد الاغلبيه يعرفونه واكلو منه بالعافيه عليهم
مناظر من مدينة بتايا
ووكينق ستريت
مكس
السياره المعلقه في ووكينق ستريت
هذا القفز من الطياره ماادري منو بالمنتدى سأل عنه قال ابي النزول من طياره المكان هذا عندهم حجز طيران ونزول من الطياره مع مساعد طبعا لأنه مايصير نزولك بروحك وسعره 12 الف بات بس احس فيها خطوره تقط نفسك من طياره انت رايح تستانس وتنبسط وتغير جو اخرتها نازل من طياره ههه
بعدها بكم يوم حجزنا من فندق بوتيك رحلة لثلاثة اشخاص لكشنابوري طبعا رحله طويله حيل وراعي الرحلات نصاب درجه اولى اول شي انتم رحلتكم ساعتين ونص رايحين وساعتين ونص رادين يعني اموركم ميه بالميه واخرتها 6 ساعات الروحه جنه طايرين من الكويت لي تايلند ورادين 6 ساعات راح يوم على الطريق بس والله المنطقه تستاهل الي يروحلها فيها مناظر وطبيعه عجيبه طبعا قعدنا هناك يوم واحد سكنا في كشك نفس الكوخ فيه سريرين وعندنا نهر قريب صراحه منظر عجيب ركبنا على المركب وفرينا المكان كله وكان كله اجانب وصورنا بعض الصور
هذا الكوخ الي سكنه فيه يوم شكله من برا الي يشوفه يقول ماياخذ الا واحد بس من داخل ماشاءالله وسيع وكبير اخذنا كلنا ثلاثتنا
هذا وانت راكب المركب نفس البيت بس يسحبك قارب صغير وفيه قعده حلوه وكل شي موفرينا لك بالمركب حتى الحمام عزكم الله فيه وتلف النهر كله
سامحوني مافي ولا صوره لسارا بوري بلجهاز كلهم بلكاميرا والكاميرا عند رفيجي ورفيجي ماخذه الكاميرا اخته وسالفه طويله عريضه سارا بوري رحنا لها يمكن ثلاث ساعات من بتايا لازم تمر بانكوك وبعد بانكوك يمكن ساعه ونص وانت فيها بس فيها شلالات بس منطقه مافيها شي كلها تايلنديين بعد ماردينا من سارا بوري بخمس ايام حجزنا على التايلنديه لبوكيت التذكره رايح وراد 3900 بات
فوق الاجواء التايلنديه
وهذا الفندق الي سكنه فيه توني ريزورت اخذنا سويت كبير ثلاث غرف ومطبخ وحمامين كبار عزكم الله بس مافي صور للغرف سكنا فيه 3 ايام باليوم حسبه لنا 4500 بات بس فندق من افضل فنادق بوكيت صراحه فندق نضيف حيل والغرف حلوه
وهذي شواطيء بوكيت الجميله
واهني بعض الصور من رحلتنا الى جزيرة جيمس بوند
واهني اختم هذا التقرير البسيط والسريع عن سفرتي الى تايلند وسامحوني على قل الصور وقلة التفاصيل لأني انا موب شاطر في التقارير لا في دراسه ولا في منتديات ههه
