اعزائي
طلعت من الرياض يوم 8 ابريل والعودة كانت 7 مايو .. شهر كامل
الرحلة كانت مابين جاكرتا والبونشاك وبالي والعودة لجاكرتا مره أخرى
نزلت المطار وذهبت لمكتب كاها وحاولت الحجز في اتريوم ولقيته فل ..
اخذت في فندق بوروبودور بمبلغ الف550 وكان مستواه حلو من ناحية الخدمة والريسبشن بس الغرفة متواضعه نوعاَ ما
بعدين نقلت ثاني يوم للأتريوم على كلام الأخوان انه فندق زين سعرة كان 535 الف مع الفطور .. بس للأسف كان سيى من جميع النواحي
الرسيبشين كأنك داخل بنك علشان تتكتتب زحمه واسلوب غريب في التجاهل وفي الأخير عطوني غرفه غير نظيفة .. على كلامهم الغرفة الوحيدة الشاغرة
الموكيت جميع انواع البقع والألوان .. طبعاً رفضت الغرفه وبعد شد وجذب معهم .. قالت لي الموظفة بكل استهتار تقدر ترجع لمكتب كاها وترجع فلوسك من عندهم
وفي الأخير طلبت المسئول عن الريسبشن وحاول يساعدني
وبالفعل بعد كلام معه اني من نزلا الفندق هذا من 3 سنوات (وطبعاً كذبت عليه لأني اول مره اسكن الفندق هذا)
بعدها حاول يساعدني مع انهم يقولون لي مافيه الا الغرفه اللي عطيناك اياها وبعدها عطوني غرفه احسن من الأولى بس للأسف تطل على المنطقة اللي خلف الهوتيل .. منطقة ماتشوف فيها شي يشرح الصدر
جلست خمسه ايام في جاكرتا .. حسيت اني طفشت ثم طلعت الى بونشاك .. وارتحت نفسيا .. سكنت في فندق سيروني .. وكان قمه المتعه وحسن الاستقبال وكان سعره 300 الف مع الافطار
وأنصح اللي بلحالة مثلي يروح للفندق هذا لانه يطل على مناظر جميلة جداً
جلست يومين في بونشاك وبصراحه حسيت براحه نفسيه فيه عجيبه وجو على كيف كيفكم .. وعشان انا دايم اطلع لبونشاك ماطولت هالمره مجرد تغيير جو وبعد عن جو جاكرتا المزدحم الصاخب
رجعت لجاكرتا وجلست خمسه ايام .. وبعدها رتبت للسفر إلى بالي واخذت تذكره الذهاب ب 270 الف والعودة ب 380 الف تقريبا .. على شركة ليون اير
وأيضاً حجزت في فندق جراند استانا راما بسعر 500 الف مع الأفطار
طبعاً في الجو مافيه لاخدمه ولا شي .. والرحلة تستغرق ساعتين فنصيحه خذو شي معكم في الطياره ولا كلو قبل الرحلة
نزلت في بالي واستقبلني السائق مسعود .. واللي دلوني عليه الشباب في المنتدى وبصراحه كان على كلامهم وأكثر .. شخص نزيه وطيب ومخلص
اخذني على فندق جراند استانا راما وكان فندق حلو كثير .. صح انه بسيط بس نظيف جداً
تجولت في بالي لمدة ثلاثة ايام .. وشاهد اجمل مناطق العالم جمالا .. وكنت أتمنى البقاء لاكن مرتبط بموعد رحلة المغادرة إلى جاكرتا
اليوم الأول :
شاهدت شاطى الالعاب البحرية وتهورت وغصت وبعدها ذهبنا إلى بحيرة Bedugul وكانت منطقة خيالية في الجمال
والعشاء كان في منطقة Jimbaran وطبعا العشاء مأكولات بحرية وكانت الجلسة على الشاطي ممتعه وبصراحه الواحد ينسى نفسه في هذا المطعم
اليوم الثاني
ذهبنا الى منطقة التجديف ورحلة وسط الأنهار ولمسافة 15 كيلو من الفلة والمتعة لمدة ساعتين ثم بعدها ذهبت إلى بحيرة Kinta Mani وهي منطقة بركانية جميلة جداً جداً جداً
ثم ذهبنا إلى شاطى Dream Land وهذا الشاطى يعتبر في منطقة استثمارية خاصة .. يتم دفع رسوم للدخول
بس شاطى خيالي ويعتبر لهواة ركوب الأمواج المحترفين وذلك لأن الامواج في عالية جداً
اليوم الثالث
ذهبت إلى منطقة نسيت اسمها كان فيها غواصة أسمها Odyssey وكانت ممتعه إلى حد ما .. تنزل في الغواصة لمدة نص ساعه وتشاهد الأسماك والشعب المرجانية
ثم بعدها تم التوجة إلى المطار والعودة إلى جاكرتا
ولما وصلت إلى جاكرتا لقيت الاتيريوم فل ونفس الشي ذهبت إلى بوروبودور وقضيت فيه ليله واحدة بس
ثم حجزت في أتريوم وكان حضي زين لأني لقيت شخص محترم في الريسبشن .. وقمت بأحراجه بأني المره الأولى لقيت معاملة سيئة وأني لو مالقيت معاملة زينه في هذه المرة سوف انقل كل شي لأصحاب كثيريون
الشخص كان طيب معي مره ومتفهم لاني بصراحة كنت معصب من أسلوب الريسبشن .. والله العضيم اني قاعد ساعه كاملة بدون مبالغة انتظر موضف يكلمني ويعطيني غرفتي
الشخص انحرج من كلامي وأعطاني غرفه من الغرف الجديدة في الدور السابع .. وكان الغرفه رهيبه جدا وواسعه والموكيت جديد وكانت واضح انها مجديده بالكامل ومعمول لها صيانة
وقضيت أخر عشرة أيام في جاكرتا ...
والحمد لله عودتي إلى السعودية كانت الأثنين الماضي 7 مايو
بعض النقاط المتفرقة اللي لاحضتها
1- سعر الصرف كان حوالي 900.000 تزيد خمسه الاف او سته الالف
2- الأتريوم سبب واحد يخليني ارجع له .. وهو قربه من اتريوم بلازا علشان التسوق والأكل في مطاعم البلازا والسينما والانترنت اللي في الدور الخامس
3- المعاملة سيئة جداً في الأتريوم والسيرفس سيى أيضا والرسيبشين ... والله العضيم اسواء ريسبشن قابلتهم في حياتي وفي جميع سفراتي
والله يعين اللي بيسافرون في الصيف .. لأنه بطبيعة الحال راح يكون مزحوم اكثر
السيكيوريتي في الاتريوم ممتاز .. ماحد يطلع من عندك الا بأذنك ولااحد يدخل الا باذنك
لاكن انواع التلزق واللقافة .. ونصيحه لاتعطونهم وجه
4- استون اتريوم الأن قاعدين يسوون صيانة لجميع الغرف (أعتقد ذلك) ولقيت المنطقة المقابلة لفت في الدور السابع مغلقة ومكتب عليها انها تحت التجديد
طبعاً بتقولون وين الصور ... اقولكم اليوم أو بكره بالكثير لأنها كثيرة مره
ويبيلها اختيار ورفع .. لاكن ابشروا
تحياتي