قربوش
15-12-2022 - 12:18 am
السلام عليكم ورحمة الله وبركاته
اضع بين يديكم تقريري المتواضع والذي يأتي بعد سنة من سفرتي لسويسرا وايطاليا .. بالضبط سنة .. هذي السفرة اللي ماتنسى واللي فيها شفت شي مختلف عن مختلف البلدان اللي زرتها
البداية كانت بنية للسفر للمالديف .. مع رغبة داخلية بالسفر لسويسرا لكن رغبة الاهل .. ومع مرور الوقت وفي ابريل تحديدا تم تغيير الوجهة بطريقتي السحرية لاوروبا وتحديدا لسويسرا
بديت اقرأ واتابع تقارير الاخوة واللي اعترف وبصراحه انها فادتني بنسبة 80% ووفرت علي جهد وكنت مستبعد فكرة القيادة وتحمست بعد ماقريت تقاريركم وبالتحديد بعدما سبقني زميل لي بالعمل وزار سويسرا والنمسا بشهر 7 .
اول شي بديت بالتأشيرات وخلصتها وحددت السفر بتاريخ 8/9/2012 الى جنيف مرورا بتركيا والعودة بتاريخ 21/09/2012 من ميلانو مرورا بتركيا وجيت هنا وبديت احط مواضيع استفساراتي واسألتي المملة للاخوة الزملاء المشرفين واللي كلهم ماقصروا وبيض الله وجيههم لنصائحهم وتوضيحهم الكبير والمفيد واخص بالذكر الاخوة ميدو 77 اللي ماقصر ابد وكان معاي على مدى شهر كامل وهو يرتب لي الرحلة والاخ ابو عزيز اللي رد على استفساراتي الاولية.
بعد ما انتهيت من هم التذاكر بديت بالسكن .. كان رمضان اجازة فأستفدت منها وبديت اطقطق عالسكن ..
صرت ادخل بوكينق والمنتدى واشوف واحلل وارتب الين لقيت افضل سكن .. ولأول مرة في حياتي كل حجوزات السكن انا سويتها ورتبتها ولا اعتمدت على مكتب ..
كثير من المعلومات فقدتها ونسيتها وحتى بعض الاماكن بتلاحظون اني احط صورتها ولا اعرفها .. لكن اتمنى اني افيدكم وامتعكم ..
بالنسبة للامور المادية .. كانت حجوزات الطيران على التركية وكلفتني 5000 ريال تقريبا لتذكرتين
والسكن في سويسرا تقريبا 8000 ريال والسيارة من يوروب كار تقريبا 3400 وكانت اوتاماتيك وعلى فكرة طلبت نوع وعطوني نوع اخر وهي سكودا لكنها ممتازة واحس انا استفدت منها
كان جدول الرحلة كالتالي .. 3 ايام في جنيف والسكن في ديفون في شقق فندقية اسمها بارك سويت برستيج بسعر 420 فرنك
ثم انترلاكن 4 ايام في شقق هوليدي ابارتمنت بيوريجارد بسعر 880 فرنك
ثم قريندل وولد ليلة في فندق سن ستار اوتيل قريندل وولد بسعر 230 فرنك
ثم قشتاد ليلة في فندق اوتيل لي قراند تشاليت بسعر 235 فرنك
ثم لوقانو ليلة في فندق هوليدي ان في سنتر لوقانو بسعر 157 فرنك
اتوقف قليلا .. ثم اعود ..
بسم الله الرحمن الرحيم
كانت الايام القليلة اللي قبل السفر صعبة .. واللي يقولك كل ماقربت السفرة تستانس غلطان لانك تفكر وتخاف تنسى شي ومن جهة ثانية تنتظر يوم السفر على احر من الجمر ..كان يوم السفر فيه مباراة للمنتخب مع اسبانيا ودية واللي انصكينا فيها 5-0 مع الاسف .. طبعا المباراة كانت الجمعة 7/9 وانا طيارتي صباح السبت فرحت للمطار الساعة 11 وقت المباراة وانا احترق ابي اشوفها بس وش اسوي ..
طرنا على خير وكل شي كان زين ووصلنا اسطنبول الفجر وقعدنا فيها ساعتين الى ثلاث بعدين طرنا على جنيف وكان الوصول الصباح تقريبا 10 او 11 وخذنا شناطنا وتوجهنا لمكتب التأجير واللي كان زحمة واضطرينا ننتظر لمدة ساعة ونص لين وصل دورنا وكان موظف الاستقبال صعب التعامل وطلب طلبات معقدة .. يمكن هي بديهية بس مو مذكورة او انا ما انتبهت لها مثل ورقة مطبوعة من الحجز والمشكلة اقوله ما اقدر اجيبها لك وهو يقول ادخل واطبع واقوله من وين ..
المهم يسرها الله سبحانه واستلمت موتري وطلعت وطبعا تركب الباص وتروح للمواقف وتدور على سيارتك ..
ركبت السيارة وحملت الاغراض ورزيت الذيب القارمن اللي فعلا هو اساس الرحلة وانطلقت الى ديفون وتحديدا الى سكني الخاص والي كان زي ماهو مذكور فوق في شقق فندقية اسمها بارك سويت برستيج وكانت جيدة وضيقة قليلا بس معقولة وسعرها زين فيها مطبخ صغير وحمام بمرحاض وحمام للسباحة اعزكم الله وصالة صغيرة مع غرفة نوم مفتوحة على بعض واحلى مافيها جلسة البلكونة بالليل ..
المنطقة هادية واللي يحب الازعاج والخرشة لايروح لها ابد .. انا اعجبتني وحبيتها
يوم وصلنا قالت لنا اللي بالاستقبال تعالوا الساعة 3 الشيك ان قلت طيب وطلعت وطلبت القارمن وقلت له تكفى ابي ماكدونالدز وماقصر .. رحنا ماك وتغديت ورجعت للسكن ودخلت .. نمنا الين الساعة 8 من تعب السفر وبعدها رحنا جولة في جنيف وتعشينا على احد مطاعم البحيرة ورجعنا
باليوم الثاني طلعنا الصباح ووجهتنا كانت لوزان .. وقبلها قررنا نمر مطل بس ما اذكر وشو .. اعتقد روشر .. بس تلخبطت شوي ووقفت بمنطقة قبلها ولقيت مقهى رايق وقعدت فيه .. وكملت طريقي بعدها للوزان .. لوزان حلوة وعالبحر .. حارة شوي بس حركة وفيها روح .. ناس وسيارات ومقاهي ومطاعم .. انا قعدت عالبحر بس مارحت مكان ثاني .
الطريق الى لوزان
بعدها رجعنا للسكن .. وانتهى يومنا الثاني ..