- 5- البلد كله نصب على الخليجي ومحاولة استغلاله
السلام عليكم
الحمد لله وصلنا ليلة البارحة للرياض بعد 14 يوم ماليزيا
كلامي هذا عام وحيا الله الجميع, لكني اخص الاخوان والاخوات المعاريس الجدد اللي يبي يطلعون لماليزيا شهر عسل
اريد توضيح النقاط التالية:-
1- الناس ضخمت امر ماليزيا بشكل غير طبيعي اطلاقا, يعني مثل سالفة سوق الاسهم قبل لا يطيح كل الناس تتكلم عنه والغبي هو اللي يجلس يتفرج ولا يدخل, البلد عادي جدا ولا يهمك كلام الناس ولو كثر
2- البلد ليس بالرخيص اطلاقا, الرخيص فقط هو الاكل بشكل عام, ولا باقي الاشياء اغلى من السعودية , خصوصا المواصلات بين المدن غالية جدا
3- وهي اهم شي,
وهي ان البلد حار جدا جدا
لايغركم درجة الحرارة 32 ولا 34, لا نها مع الرطوبة تحسسك ان الحرارة 38 وفوق!!!
من جد حر, يعني الاستحمام مرتين امر لا مفر منه الا للي يحب تفوح ريحته
وربي ينفطر قلبي لما اشوف المعاريس الجدد هناك, لسان حالهم يقول وش جابنا من حر السعودية لحر ماليزيا ؟؟
من جد الواحد يتفشل من زوجته وهو يشوف العرق يتصبصب منها, وغير كذا هي بتستحي كل ربع ساعة تطلب شي تشربه, (اقل شي راح تشربه هو 3 لتر اذا اخرت لك تور نص يوم)
والله اني احمد ربي اني روحتي ماهي شهر عسل ولا كان مدري وين اودي وجهي من الحرمه
يا شباب ترا الحرارة تخليك تقفل وتعصب وتنسى كل هالخضرة اللي قدامك ولا تشوف شي
4- الشلالات اللي بيزعجونكم فيها عادية وكلها وحل ووساخة الله يعزكم
اغلب المدن فيها نفس الحدايق (حديقة الفراشات البايخة - القرود الله يعزكم - الطيور ولاتسأل عن ريحتها)
5- البلد كله نصب على الخليجي ومحاولة استغلاله
6- مدري بتصدقوني اذا قلت لكم اني ماسمعت الاذان خلال هالسبوعين الا مرتين بس!!!!!!!!!!!
جميع الاسواق مافيها مسجد رسمي, يعني غرفة رامينها لك في اخر السوق ولا تحت ولا فوق ولا مدري وين تجلس سنة تدور عليها, واذا رحت ماتحصل الا نفسك تصلي........(نفسي اعرف وين هالالف المسلمين وين يصلون؟؟؟؟؟؟؟؟؟) (وربي قاهرني قولة الناس بلد اسلامي بلد اسلامي وثاني اركان الاسلام لا ترى احد يطبقه)
حتى في اي جولة سياحية خذ معك بوصلة وسجادة ولا يطلع وقت صلاة الظهر, وجود المساجد امر نادر جدا, واهم شي لاتنسى الصلاة في وقتها
والله اني اقطع جولاتي علشان ارجع للفندق اصلي
والعاصمة كوالا مافيها اي مظهر اسلامي, يعني المقاهي اللي كلها اغاني جاز وبوب اصواتها تاصل اخر الشارع, والنساء لبسهم اي كلام
يعني احاول اقنع نفسي اني رحت لدولة اسلامية والله ماقدرت!!!!!!!!!
اغلب الاماكن السياحية مملوكة للصينين الملحدين, يعني صرفيتك ماراحت للمسلمين, حتى مرتفعات جنتنج كلها لملياردير صيني, لاتحسب نفسك تنفع المسلمين بروحتك هناك
طبعا هذا رأي شخصي وهذا اللي شفته
وانا شخصيا متأكد ان ماليزيا فقاعة وراح يعرفها الناس زين بعد فترة
طبعا الحمد لله انا غير نادم على سفري لها, يعني صعبة اجلس اشوف كل الناس تتكلم عنها وما اروح اشوف, الحمد لله شفتها ولا لي نية ارجع لها اطلاقا,
اي سؤال من الطيبين حاضر لكم
في حفظ الله
و لولا اختلاف الأذواق لبارت السلع!!