اشكر جميع الاخوان القائمين على هذه المنتدى الرائع من مشرفين واعضاء.
انا بغيت اشارك بتجربتي اصدار فيزا من سفارة النمسا
طبعا جهزت كل الاوراق المطلوبة كم ذكر الاخوان في المواضيع السابقة
وحملت الفورم الخاص بطلب الفيزا من هنا http://www.aussenministerium.at/up-media/1629_sv_antrag_riyadh_en_ar.pdf
بالنسبة لحجوزات الفنادق انا حجزت من الانترنت ببطاقة الائتمان ثم بعد ما ارسلو لي تاكيد الحجز طبعته والغيت الحجز عشان ما يدفعوني شي.
رحت للسفارة كان يوم ثلاثاء الساعة 11 الصباح طبعا عند البوابة ياخذون منك اثبات واذا معك جوال ياخذونه ويعطونك بطاقة زائر ، بعد ما دخلت لصالة الانتظار ( كانت صالة صغيرة ولاتتسع الا لعشر كراسي تقريبا وكانت حارة) تصف بالدور على الكرسي الفاضي ، انا كان قبلي 4 ، فيه شباك واحد للتقديم على الفيزا وشباك ثاني للاستلام ، وعندهم موظفين واحد اسمه علي الظاهر انه يمني قمة في الاحترام وما يدقق كثير وواحد ثاني اسمة محمد سوداني بس كل اللي مرو عليه علهم ودقق عليهم بشكل مو طبيعي.
المهم انا سلمت الاوراق حقتي وعطاني كوبون عشان اراجعهم بعد 14 يوم ، طبعا انا كانت المدة اللي كاتبها في الطلب 19 يوم وهم عطوني شهر.
المبلغ اللي دفعته عشان الفيزا 167 ريال.
كلمتهم بعد 13 يوم على رقم التلفون حقهم 4808254 وقالو لي انها جاهزة.
بس الحين باقي لي حجوزات الفنادق ومخطط السفر ؟
ودي تعطوني رايكم في هالمخطط ( طبعا انا اول مره اروح لاوروبا)
انا ان شاء الله ناوي اطلع على الخطوط الامارتية الى فينا ومخطط ان اجلس في
فينا 3 ايام
زلامسي 5 ايام
انترلاكن 5 ايام
جنيف 4 ايام
زيورخ يومين
انا ناوي استاجر سيارة وانا طالع من فيننا الى زلامسي وراح اسلمها في زيورخ.
اللي ودي اسئل اذا ابغى اروح هناك من دون حجز فنادق هل بتفرق معي الاسعار وهل تنصحوني اسوي كذا والا لا.
واكرر شكري للجميع