- 3 : عدد 2 صورة شخصيه 4 * 6
بسم الله الرحمن الرحيم
حبيت أني اقدم لكم تقرير بسيط لتجربتي لاستخراج الفيزاء البريطانية وبالمرة للي ما عمرة قدم يستفيد من الاوراق المطلوبة والتجربة
اول شي هذي مو اول مرة اقدم على الفيزا
المره الاولى كانت زي الوقت هذا شهر نوفمبر لعام 2012 وكانت 6 شهور
طبعاً كنت افكر زمان ومليون سؤال عندي وخايف من الاجرائات والاسئلة و و و و و الخ
والاهم والسؤال الي توني لقيت له اجابه
كم لازم يكون فحسابي رصيد ؟؟؟؟؟
هذا سؤال فتاك من الدرجة الاولى ويشغل بال ذوي الدخل المحدود ( المطفرين يعني مثلي )
طبعاً الاوراق المطلوبة و المهمه :1: تعبي الابليكشين من الموقع الرسمي وسهل جداً ما يبغاله مكتب يعبيه لك
واذا اللغة عائق استخدم مترجم جوجل وما راح ياخذ من وقتك شي
2 : تعريف بالراتب يوضح فيه مسماك الوظيفي والراتب باللغة بالانجليزي ومصدق من الغرفة التجارية
3 : عدد 2 صورة شخصيه 4 * 6
4: كشف حساب لاخر 3 شهور مختم من البنك ( وافضل طريقة بالنسبة لي بنك الراجحي سويت كشف حساب عن طريق مباشر للافراد ورحتلهم وختموها بس ) اذا رحتلهم وطلبتهم كشف الحساب فيه رسوم عليه حوالي 50 ريال او 75 ريال وكشف الحساب طبعته باللغة العربية وما صار اي شي الحمدلله
جهزت اوراقي وتوكلة على الله لمدينة الرياض وحجزن موعد بتاريخ 10/11/2013
موقع مكتب التآشيرات في حي ام الحمام خلف هايبر بندة كنت حاجز موعد الساعة 9:40
طبعا اول مادخلت فيه تفتيش خفيف تطلع كل الي معك وتدخل من خلال الجهاز وبعدها تاخذ كل اغراضك
و بعدها توجهة للدور الاول وكان فيه قدامي 3 اشخاص والموظف يعطيك الرقم بنا على موعدك يعني الساعه كم حجزت و بعدها تروح للمكتب الخاص بالتاشيرة البريطانيه
كان رقمي 4 وانتظرت 10 دقايق وجاء دوري :014:جلست بحدود ال 10 دقيقة يعبي بيانات واخذ اوراقي
طبعا جهزة حجز بوكينج وحجز طيران وما سئلني عنها وقلت ما دامني جبتها خلني اقوله تبيها ولا لا
قلتله معي حجوزات قال اعطني
بعد ما خلص قال تبيها مستعجله تدفع 581 ريال ولا عادي قلت عادي كم تاخذ وقت قال 10 ايام قلت خليها اجل عادي
وبعدها قال انتظر للبصمة
جلست دقيقة وجت موظفة قالت الاخ مهند مشيت معها ودخلنا غرفة التبصيم
سئلتني عن تاريخ ميلادي فقط
وكان فيه كاميرا فالسقف وكاميرا قدامي قالت طالع فوق واخذت صورتين وحده بالكاميرا الي امامي والثاني بالكاميرا الموجوده بالسقف
بعدها البصمة وبعدين قالت توكل على الله خلاص
والحمدلله كلها 3 ايام وخلصت لكن علشان مو ساكن فالرياض اخذت يوم فالشحن على ما وصلت
طبعا اشتركت فخدمة الرسائل بقيمة 8 ريال
وصول الجواز عبر ارامكس وهذي خدمة تطلبها منهم اذا كنت مو نفس سكان الرياض
بمبلغ 40 ريال
هنا بيني وبينكم قبل لا افتح الطرد جليت المسه من براء وشفت فيه اوراق كثير
قلت بس تم رفض الفيزاء وهذي اوراق سبب الرفض
والحمدلله تمت الفرحة
مقتطفات ***
بالنسبه للحجوزات الفنادق والطيران ما سئلوني عنها لكن قدمتها علشان لا تنرفض الفيزا لسبب بسيط
سمعت من ناس كثير انو صورة من ال الفيزا او الماستركارد تغني عن كشف الحساب
وسئلت الموظفة قالت لا ما تغني عن كشف الحساب
طبعا حبيت الكل يستفيد وياخذ فكره عن الاجرائات وكنت اول متخوف وكان نفسي اشوف تجربة لشخص وش صار معه داخل مركز التأشيرات وش قالو له و و و الخ
فحبيت للي كانو مثلي انهم يستفيدون ويعرفون ان الامور بخير وما يحتاج الواحد يكون قلقان
طبعاً ذكرت فأول الموضوع كم لازم يكون فحسابك
جواب السؤال هذا بسيط جدا للفيزاء السياحية
الي هو مبلغ يغطي تكاليف عدد الايام الي بتجلساها فبريطانيا
وعلشان يستفيدون ذوي الدخل المحدود او الي ما بيكون في حسابه مبلغ كبير عن التقديم والي حلمة يروح بريطانيا عندي طريقة سهله جداً
فمثلاً عند تعبئة الابليكشن فالموقع فيه سؤال كم بتجلس في بريطانيا و وين بتسكن وكم تتوقع مصروفك اليومي
بما اني من ذوي الدخل المحدود كان في حسابي فقط 8000 ريال سعودي :009: حطيت مدة اقامتي 5 ايام ومدينة وحدة بزورها الي هي لندن
وشيكت على موقع البوكينج وحجزت ففندق رخيص جداً ما يكلف شي خلال ال 5 ايام
وحطيت مصروفي اليومي قليل كمثال حطيت 500 ريال
بالنسبه لي ما اصرف واجد والاكل قليل يعني ما فرقت معي وجبة وحدة تفي بالغرض الباقي سوائل
طبعاً بعد ما يتم قبول الفيزاء خذ راحتك خطط على المدن الي تبغاها وكم يوم بتجلس وغير الفندق
بس انتبه لنقطه مهمه انك اذا نزلت لمطار هيثرو بيسئلك الموظف كم يوم بتجلس ووين بتسكن
اجابتك خلها نفس الي كتبته فالابلكيشن الي قدمته للفيزاء
وبخصوص حجوزات البوكيج والطيران سوي حجوزات عاديه بدون ما تدفع سوي حجز وهمي
الي بيقول يمكن تصير لك مشكله علشان كاتب 5 ايام وغيرت المده او حجزت ففندق رخيص وبعدها غيرته
احب اطمنه واقوله لا يهمك مو صاير الا كل خير
لان اول فيزا قدمتها عام 2012 كتبت مدة اقامتي 6 ايام وفقط لندن
والحمدلله جلست شهر كامل وزرت مدن كثير ما بين انجلترا واسكوتلندا ولا احد قال وين رايح
اتمنى كنت واضح بالطرح وحبيت اكتب تجربة كامله لكي تتضح الصورة وتحياتي لكم
تروح و ترجع بالسلامة يارب
في الأيام المقبلة ان شاء الله بنروح نقدم على فيزا و كنت متخوفة طمنتنا