1. السلام عليكم اخواني واخواتي اعضاء المنتدى الحبيب ..

السلام عليكم اخواني واخواتي اعضاء المنتدى الحبيب ..

حابة انقلكم تجربتي في تققديمنا ع الفيزا ف السفارة السويسرية < والله الصراحة هيا قصة
طبعن امس كان الموعد اللي انتظرو من شهر وكل يوم يمر كان يزيد توتري وقلقي انو خايفة ماتنقبل الفيزا وكلام من دا .. من يوم حجزي للموعد وانا اجهز الاوراق عشان كل شي يكون كامل وانا كنت مسوؤلة عن 7 افراد ماشاء الله يعني انضغطت بدرجة كبيرا الححمدلله ..
جهزت كل الاوراق وماكان باقيلنا الا حجز اخر ليلة ( ليلة العودة ) حجزناها قبل موعد التقديم ب 7 ساعات < كنت معتمدة ع الطابعة حقتي لكن اكتشفت انو ع حظنا الحبر خلص ف قلنا نصحى الصباح قبل مانروح موعدنا نمر ع مكتبة ونطبعها
موعدنا كان من الساعة 10 الى 10:45 وطبعن عندي اخو لكيع مرا وباررد بدرجة كبيرا ..
ماصحي الا الساعة 7 وع بال مايغيرو ويتجهزو سارت 7 ونص .. انطلقنا بحمد الله وطبعنا حجز اخر فندق ومعا تاخير المكتبة سارت الساعه 8 .. طبعن انا لحد يسألني ايش كنت احس وقتها < جاني نفس الاحساس لما كنت رايحة اختبر القدرات
وطبعن كأي عائلة سعودية لازم من وقفة المحطات مرا بنزين ومرا جيعانيين وانا جالسة اتأكد انو الاوراق كاملة < وسوسة
المهم وصلنا جدة الساعة 10 الا ربع < يعني باقي ربع ساعة ع موعدنا
جات مشكلة تانية .. فين مكان المكتب ؟؟
بعد بحث مطول افتكرت انو في موضوع متطلبات الشنقن حاطين الموقع دخلت المنتدى واخدت الموقع ومعا برنامج الخرائط وصلنا الحمدلله بس الساعة 10 ونص < ي سلام متاخرين نص سساعة ..
دخلنا وكان في كورنرين للسويسرية واحد جالس فيه رجال يستلم الاوراق والتاني فاضي
اعطيناه الاوراق وكان مبسوط جدا مننا قال اوراقكم كاملة .. واهلي يطالعو فيا مبتسمين < طبعن هنا حسيت اني جبت ف القدرات 85
بس ي فرحة ماتمت طلعلنا مشكلة مدري من فين جابها .. قال اخر ليلة انتو حاطينها ف فرنسا ولازم تكون ف جنيف لانو عودتكم منها < قلنالو كيف كدا واحنا اكتر ايامنا اساسن ف سويسرا دا شرط الشنقن
قال عندكم حلين .. ياانكم تروحو تغيرو الليلة الاخير وتخلوها جنيف
او .. قدمو ف السفارة الفرنسية ..
طبعن الحل التاني كان مستحيل لانو احنا مالنا موعد ف الفرنسية وكمان كل اوراقنا موجهه للسفارة السويسرية ..
سلمنا امرنا لله ورحنا نحجز فندق ف جنيف لاخر ليلة اخدو مننا 100 ريال عشان الحجز بس
..
دي المشكلة الصغيرا خلتنا ننتظر 5 ساعات اتخيلو .. راح دورنا وجلسنا نستنا الناس يخلصوو .. صراحة قهروني ليش حاطين كورنرين ؟؟ والمصيبة انو كورنر واحد اللي شغال الناس انزحمت مافي نظام مرا ..
الفرنسية والايطالية كلها 3 كورنرات وكلها شغالة وسريعين بشكل ماشاء الله الا السويسرية ..
الناس اللي بعدنا ف السفارات التانية خلصو وبصمو ومشيو الا احنا جالسين .. بعد 3 ساعات من الانتظار اخد اوراقنا وجلس عليها ساعه وتعامل الموظف سيء جدا كل شويا يقول تعبتوني وليش تقدمو معا بعض < كاننا حنسويها ع حسابو وكأنها مو وظيفتو ..
جا وقت التبصيم ونفس المشكلة حاطين للسويسرية غرفة تبصيم وحدة بينما السفارات التانية 3 غرف تبصيم ؟؟؟ .. واحنا جالسين واحد قال لاخويا انتو كيف تقدمو ف السويسرية وكان عندكم فرصة تقدمو للفرنسية وانو تأشيرتهم اطول وكدا .. فقلنا الحمدلله خيرة ان شاء الله ..
خلصنا ومادخلنا البيت الا 6 العصر .. البيت حالتو نفس حالة السعوديين بعد صصلاة العيد اغماء
خلصت الحدوته ومعليش لو صدعتكم ..
الأوراق اللي اخدوها مننا :
1_ حجوزات الطيران
2_ حجوزات الفنادق
3_ تكفل ب المصاريف
4_ كشف حساب
5_ صورة من بطاقة الفيزا
6_ صورة من ال3 صفحات من جواز السفر معا التوقيع قبلها
7_ الابلكيشن
8_ الموعد تبعهم
9_ التامين وهوا الوحيد اللي رجع
0- صورة مقاس 4.5*3.5
وقالولنا بعد 10 ايام الاستلام ان شاء الله ..