- أسكتنا قلنا نمشي أمورنا لين آخر يوم..
السلام عليكم جميعا ,
عدت للتو من لندن و قضيت أيام جميلة و جميلة جدا.. الحمدلله حمدا كثيرا.
في يوم كنا جايين مبسوطين راجعين من بستلر فليج مسوين شوبينق و قلنا نطلع شارع العرب و تعشينا عشا لذيذ في مطعم بيروت اكسبريس .. نبي نرجع الفندقPremier Inn في Earl's Court
رجعنا .. دخلنا.. حطيت الكرت (المفتاح) على الباب مافتح ! جربنا كرت ثاني مافتح !
رحت قلت للموظف إنه الكرت ما يشتعل معاي قال لي كم رقم الغرفة؟ قلت له 123 قال أها للأسف يامدام أنتِ ما دفعتِ باقي الليالي ..
بصراحه أنا وصلت معاي اتش طالعين بدري للقرية و تعبانين و هلكانين ويقول لي كذا..
أنا: كم المتيقي؟
الموظف: 1200باوند
تقريبا 7500ريال !
أنا: متأكدة و متأكدة جدا إني دافعة
الموظف: لا لايظهر شيء عندي في السستم.
أنا : و المطلوب؟
الموظف: ادفعي لنا 1200باوند
أنا: أريد أن أتكلم مع الboss
الموظف: أنا البص !
أنا : أوكي .. نايس.. أبي أكلم المدير العام
الموظف: تلقينه بكرا من س9-لين5
أنا : لو سمحت افنح لي الغرفة نبي نرتاح
الموظف: آسف
أنا: لو سمحت افتح لي الغرفة عشان أوريك الايصال
الموظف بضحك: حسنا
محد دخل الغرفة غيري .. هم واقفين برا حتى الموظف .. و الحمدلله لقيت أوراق كثيرة ايصالات وكذا.. كله للفندق لأن المبلغ كان كبير و الدفع كان على دفعات.
عطيته الايصال .. و جلس يفكر و يشوف بالعربي انهبل الرجال .. قال شلون ومدري ايش .. هذا يثبت انك دافعه و بالنظام مايطلع عندي شي..
خلاص يامدام أباخذ الايصال فيه رقم فوق بسجله و أرجع لك الورقة.
أنا : معصي تاخذه أنا أنزل معاك و أمليك الرقم املاء .. (بصراحه حقير تخيلت يمزق الورقه يضيعها ..الخ)
الموظف: فتح صفحتي .. سجل الرقم.. مدام اسف.
أنا: وين أصرفها سوري؟ لازم تسوي لي خصم أو تعطيني ليالي مجانية .
الموظف: أسف ما اقدر أسوي ولا شي من اللي قلتيه ..ما اقدر أتكلم أكثر من كذا .. لازم ألحق باصي و أنا قلت لك اسف و يطلع.
تصدقون اني مانمت ذيك الليلة .. مشاعري مختلطة محد أخذ لي حقي_أدق علي أمي أقولها السالفة قالت لا أحد ياخذ لك حقك بس المهم لا ياخذون منك حق ههه)
و مافيه أحد بالليل . أنا لو ان الوقت موب متأخر مره كان طلبت المدير و خبيت الايصال ... يشوف التلاعب . تعوذت من ابليس اخذت شور و نمت.
أصبحنا الصباح تقهوينا قهوة يحبها قلبكم بهيل و زعفران .. مع سكري ..
قبل ما أنزل كلمت الريسبشن قلت لهم أبي أقابل المدير العام . ردت علي موظفة قالت أنا أوصل اللي تبين له قلت انا اسفة أبي أكلمه شخصيا شكرا ما احتاج وسطاء بيننا.
قالت بخصوص ايش؟ قلت اذا كلمته بيقولك . قالت مو موجود الحين ..
كل واحد يعتقد انه هو المسؤول .. خ
أسكتنا قلنا نمشي أمورنا لين آخر يوم..
انبسطنا استانسنا في لندن وه ياربي على ذيك الأيام .. مرت 17 يوم ماحسيت .
طبعا خلال هذي الايام لاحظت انه أي وقت و اي موظف يسلم علينا لو هو مشغول لو معه زباين ماكانت كذا طريقتهم .. هاي مدام أر يوم اوكي؟ أر يو أوكي تودي؟ دو يو نيد اني هلب؟ لفلي كيدز . لايك يور سكارف . يعني مجاملات*مجاملات..
أخر يوم .بنسوي تشيك أوت. قلنا نتفاهم معهم بخصوص اللي صار..
.. تطاولت الموظفة مع اخوي .. وقالت له حرفيا: أطلب منك إنط تطلع برا و لا عمرك تجي تسكن عندنا. !
للمعلومية: العام الماضي جربت بريمر ان فرع فكتوريا فرق مره لا النظافة ولا الستاف حقينهم.
يعني يبوني أدفع 7500ريال و أنا دافعتها؟؟
المبلغ ابدا موب بسيط و حتى لو كان بسيط اللي صار غير مرضي.
بصراحه أنا الفندق ما عجبني .. ضيق و مشوار على بال ماناصل غرفتنا مبنيان متصلان بجسر. و كتمة
مره حتى اللوبي مايسوى يسمى لوبي خ عموما سلسة برمير ان تصلح للي شغلهم سريع سريع و أغلب وقتهم برا الفندق.
المهم أنا أكتب لكم تجربة شخصية .. كوننا أصدقاء في المنتدى .. نفيد و نستفيد .
احتفظوا بالايصالات لأنها هي اللي تحفظ لكم حقوقكم.
دمتم بود .
أختكم نور الشمس .
