بسم الله وعليه نتوكل ..
حياكم وبيآكم ، هنا ببدآ تقريرنا المتواضع حول سفرتنا الاولى الى الاراضي الاوروبية ، رجعنا منها الاسبوع اللي فات
فضلت أكتبه بلغتي العامية بعيدا عن التكلف ، بعيدا عن المقدمات الطويلة والبثارة الزآيدة نبدا على بركة الله
الفكرة بدأت قبل اربع شهور تقريبآ ، وكانت النية على دول شرق اسيا بحكم خبرة احد الشباب فيهآ ، بعدها فكرنا شوي قلنا لندن حتى نمارس اللغة شوي ، وبعد جولة على تقارير المنتديات كانت النمسا شي فاتن جدا ومغري حتى فكرنا ان تكون السفرة بين بريطانيا والنمسا ، بعد كذا اكتشفنا موضوع الفيزا وان لكل دولة فيزا غير فاستقرينا على النمسا ، وبنظرة على الخريطة على الدول المجاورة لها كنا في حيرة بين سويسرا وايطاليا ، سويسرا مشابهة للجو النمساوي ف ليش نضيع الجهد والوقت لذلك اخترنا ايطاليا كدولة ثانية ، وعليها بدينا التخطيط وحساب التكاليف بدقة ، ساعدنا بهالموضوع برنامجنا الجميل اكسل ..
الرحلة تتضمن 3 اشخاص مع محدثكم ، وعليها كانت الحسابات التالية :
1- المدن اللي اخترناها والايام المحددة
2- تقديرات تقريبية لتكاليف التنقلات الداخلية هناك
3- الفنادق وحجوزاتها عن طريق البوكينق
4- الطيران كان كالتالي :
من الرياض لفيينا - التركية
من فيينا الى روما - Niki
من روما الى البندقية - Alitalia
من البندقية للرياض - الخطوط السعودية
وسنأتي الى مميزات وعيوب هالخطوط جميعا خلال التقرير
5- المجموع الكلي تقريبا .. لثلاث اشخاص
هنا كانت البداية والتخطيطات والمبالغ التقديرية للتنقلات طابقت الواقع وزيادة وكذلك الاكل على اعتبار ان الفطور مجاني من جميع الفنادق اللي حجزنا فيها ..
هالسفرة كانت الاولى بالنسبة لنا لاوروبا والحمدلله ما احتجنا مكاتب سفريات ولا يحزنون ، اي شي نجهله نبحث بالمنتديات وبتقارير الاعضاء وتجاربهم والحمدلله فادتنا كثير .. فألف شكر لهم .
بالنسبة للتاشيرة ، على الرغم اننا حجزنا الطيران وكل شي قبل السفر بفترة طويلة ، الا ان السفارة النمساوية ما اتاحت مواعيد قريبة حتى نقدر نطلع الشنقن ، كان اقرب موعد قبل السفرة باسبوع ونص ! لذلك بعيدا عن المخاطرة هل تطلع الفيزا او لا وقتها قررنا نطلعها من السفارة الايطالية مع انها ليست بلد الوصول ! لكن تجارب الناس وان الوضع مافي مشاكل ، وبحكم اني من القصيم اضطريت احجز للرياض طيران بسبب نظام التبصيم الجديد
جهزت جميع اوراقي واخذت كل احتياطاتي من متطلباتهم ويوم وصلنا شيك على الاوراق ، طبعا الشنقن تتطلب شغلتين ع حسب كلامهم لذلك تحايلنا بحجز وهمي في ميلان حتى نزيد مدة الاقامة ، قمنا بالغاء هالحجز لاحقا ، لكن مشت امورنا بالسفارة ، الشي اللي نسيته كان كشف حساب بنكي وطلعت خلصته بساعة تقريبا ورجعت لهم ، برضه طلب تعريف من جهة العمل وبحكم اني طالب جامعي م في هالشي ، ومشت امورنا ولله الحمد وطلعت التاشيرة خلال ثلاث ايام فقط ! سعرها كان 300 ومع التامين الطبي كان 400 ، وتكاليف الطيران برا الحسبة
غير التاشيرة مافي شي يذكر يعني تجهيزات السفر العادية من ملابس والكانون وتوصيلة عادية مع الشواحن ما استخدمنا فيش اوروبي ولاغيره ، برضه تحتاجون شطاف المسافر لان وضع الحمامات - وانتم بكرامة - عندهم مزري ، اللابتوب وشنطة خصر صغيرة تحوي جوازاتنا والقطة وغيرها ، ظرف كبير يحوي حجوزات الطيران والفنادق مع وصف دقيق لكل فندق وكيف نوصل له وكذلك حجز السيارة اللي كان من سكست وكذا منشور عن اهم الاماكن السياحية وتخطيط للاماكن اللي بنزورها واحداثياتها ، هذا كل شي اذكره حاليا ..
ولأننا حجزنا سيارة نحتاج رخصة دولية طلعناها من مكتب الطيار اذا ما خانتني الذاكرة بمية وخمس وعشرين طلعت بنفس اليوم ..
ايضا بالنسبة للمبالغ وضعنا اغلبها في الفيزا وكانت فيزا تسوق الراجحي ، خدمتنا في الفنادق والطيران ، الفنادق مثل ما ذكرت عن طريق البوكنق مع انه احرجنا مع احد الفنادق حيث انه بعد شهر من الحجز والتاكيد جتنا رسالة تفيد ان الفيزا غير مقبولة عندهم ! قلنا زين جت من بدري ولا نبلش هناك ونغير الفندق لفندق ثاني والحمدلله مشت الامور ،
وبالنسبة للطيران كانت الحجوزات عن طريق موقع : Cheapoair
كان ياخذ عمولة على الحجز 1 دولار ، جميل جدا هالموقع يبحث لك بشكل اقتصادي ماعليك الا تدخل المغادرة والوصول وهو يتكفل بالباقي وبخصومات حلوة ماتلقاها بموقع شركة الطيران الرسمي !
اعتقد الى هنا كافي بما يخص التجهيزات وماقبل السفر ، مثل ما تلاحظون كنا حريصين على ادق التفاصيل لكن حصل ما حصل خلال السفرة وحاس الموضوع فوق تحت ، بالجزء القادم باذن الله بنعرف وش السالفة ،
أي استفسار او نقطة مش واضحة يسعدني اخدمكم ،