fahad31
14-12-2022 - 05:08 am
تحياتي للجميع .... ( اليوم انا ابغى فزعتكم )
كل من يملك المعلومه .. ( بنوتة الامارات او اليازي او مزوون ) او اي عضو اخر ..
ارجو المشاركه وخاصه اخواني اهل الامارات والمشرفين في البوابه ...
نتيجة الزيارات المتكرره لدبي افكر في شراء شقه ( اربع غرف ) بدبي طبعا اعرف ان الشقق غاليه
وخاصه بشارع الشيخ زايد او الجميره ..
وين ممكن احصل شقق اربع غرف وبسعر معقول ..
اسمع عن شقق تمليك وممكن المالك يؤجرها ( اسبوعي او شهري ) عن طريق وكلاء تاجير وهناك
شركات للصيانه او النظافه بين فتره والاخرى . وفي نفس الوقت يسكنها اذا نزل لدبي
هل ممكن معلومات اكثر عن هالنوع من الشقق ( هاتف او موقع نت )
ارجو المشاركه ... زيارتي القادمه في 6 / 5 / 2008 خلال معرض السفر والسياحه بدبي
والسكن كالعاده ... ( تقرير جديد )
تحياتي لكم .....
شوف ياطويل العمر
اذا تبي تشتري شقة في دبي
بتلاقيها في أحد المواقع اللي حكومة دبي حاطتها انها free hold
يعني ممكن يتملكها شخص من اي جنسية
وهاي المواقع شوي بعيدة عن دبي
أقربهم برج دبي في شارع الشيخ زايد
وبعدها يجي مارينا
وفي مناطق ثانية مثل جميرا فيلج وجميرا ليكس (بحيرات جميرا) ودبي لاند والمدينة العالمية وواحة السيليكون
المهم اماكن كثيرة جدا
بس بشكل عام صعب تلقى 4 غرف
اغلب الشقق ستوديو وغرفة وغرفتين
حتى 3 غرف شوي صعب
وكم تقصد سعر معقول؟
انا ارخص شقة لقيتها 3 غرف مليون و 300 ألف
بس فيها عيوب
مثلا مافي موقف للسيارات والغرف وايد ضيقة
(على فكرة .. الموقف ينباع .. يعني سعر موقف السيارة يوصل 80 ألف)
في عدة نقاط لازم تعرفها:
1- في ثلاث شركات فقط في دبي مسموح لها تكون مطور رئيسي (master developer)
وهي شركة إعمار وشركة نخيل http://www.nakheel.com/
ومجموعة شركات دبي القابضة http://www.dubaiholding.com/(مثل دبي للعقارات وسما دبي وتطوير وغيرهم)
هالشركات تاخذ أراضي من الحكومة وتخططها وتبنيها وتبيعها
وفي شركات ثانية صغيرة .. تتفق مع هالشركات وتاخذ اراضي منها وهم يبنونها ويبيعونها
طبعا انت لما تشتري شقة من الشركة الصغيرة (اللي غالبا تكون اسعارها ارخص) لازم تسجلها بعد عند المطور الرئيسي
وحتى اذا جيت تبيعها .. المطور الرئيسي ياخذ عمولة
يعني المطور الرئيسي صاير مثل البلدية او حكومة في المنطقة اللي انت شاري فيها
2- لما تشتري شقة .. حط في بالك ان في رسوم صيانة سنوية .. يحسبونها حسب مساحة الشقة
انا لما حسبتها طلعلي اني بدفع تقريبا 10 آلاف درهم سنويا
فاسأل عنه
3- الشركات اللي ممكن تشتري منها لازم تكون مسجلة في مؤسسة التنظيم العقاري http://www.rpdubai.com/rpdubai/home.jsp?lang=1في دبي، ولازم المشروع بعد يكون مسجل
اسأل عنهم قبل ماتشتري عشان مايطلعون حرامية ولا شي
طبعا هالشي بس في دبي .. اذا فكرت تشتري في الشارقة او عجمان محد يضمنلك الشركة او المشروع
4- الافضل انك تشتري الشقة من الشركة اللي بتبنيها .. مش من وسيط عقاري .. بتوفر وايد
وبخصوص انك اذا اشتريت شقة تعطيها شركة وتأجرها ولما تجي تقدر تسكن فيها
في طريقتين
اما انك تشتري في فندق
مثل فندق دبي مول اللي كان معروض للبيع من فترة وفندق بحيرة برج دبي
بس انك تشتري شقة في فندق وايد غالية
الشقة غرفتين في فندق دبي مول سعرها يبدأ من 4 ملايين ونص
بس الحلو ان يكون عليها خدمة 5 نجوم
الطريقة الثانية
انك تشتري شقة في اي مكان وتأثثها وتعطيها شركة تأجرها
هذي بعض الشركات
http://www.dubaifurnishedapartments.com/
وفي غيرها وايد
بس شخصيا ماجربتهم
اتمنى اكون أفدتك بشي
واذا عندك اي سؤال انا حاضر