وعليكم السلام ورحمة الله وبركاته
أول شي أخوي المده ساعتين بين الرحلتين غير كافيه
أقل مده هي ثلاث ساعات .
الفيزه الألكترونيّه مضمونه بإذن الله ومجرّبه وسهله
أهم شيئ عند إدخال المعلومات التأكد من صحة أرقام الجوازات وأسماء المسافرين
قبل لا تظغط زر السداد .
تحتفظ بنسخه من الفيزه الألكترونيّه لاستخدامها في حال الطلب عند الجوازات
أو دخول الطائره قبل العوده للوطن .. قليلا ما يطلبونها ولكن الإحتياط واجب .
والدفع للفيزا على حسب عدد الجوازات يعني ثلاث جوازات ب 60 دولار المجموع .
أنصح يا خوي تبحث عن رحله أخرى من ثلاث ساعات فما فوق للطيران الداخلي
حتى لو معاك فيزه الكترونيّه
تأخير العفش وطوابير التسليم على حسب وقتكم وقد يكون المطار مزدحم .. الله أعلم .
أتمنى لكم رحله سعيده

الله يجزاك خير أخوي القيصر على الرد السريع
أخوي المشكله طاح الفاس بالراس
حجزنا ودفعنا وتذاكر غير مسترجعه بعد
وهذي غلطة اللي مايسأل قبل
عمومآ صار اللي صار
أنا قلت يمكن الرحلات الداخليه المطلوب وقت أقل وانا حقيقه إذا فيه اقتراحات لتوفير الوقت علي علشان ماتروح على الرحله
؟؟
ياليت تنفعوني فيها

طيب اخوي
أبو انس
إن شاء الله راح تلحق
بس لا تعوّدها مره ثانيه

• *

شف حبيّبي
ما دمت أنك دفعت وخلاص
أتبع اللي راح أقول لك عليه :
أولا : إستخرج الفيزا الألكترونيّه ضروري ويكون معاك نسخه لإبرازها لموظّف
الجوازات إن طلبها .
ثانيا :
أول ما توصل تركيا بإذن الله لا تتوتّر وثق ثقه تامّه إن الله ما أخّرك عن شيئ الّا وأراد لك الأفضل
ونقول خيره إن شاء الله ..
وليس معنى كلامي إنها بتفوتك الرحله ولكن كن مستعدا لذلك
ولا تحرم من معك متعة الرحله حتى لو بتغيير ملامح وجهك لو لا قدّر الله وفاتتك .
نرجع للمفيد
وأكمل من كلمة لا تتوتر
ولا تستعجل في عملية الخروج من الطائره كن هادئا ولا تحبس أنفاسك
في النهايه كلّكم ستنتضرون عند سير العفش .
كما ذكرت لي أنكم ثلاثه كبار وأطفال
ممكن شخص كبير منكم يذهب الى منطقة قص البوردينج
ويمسك سرا عند رحلة طرابزون وتقول له يبقي دائما أمامه ثلاث أشخاص
بمعنى لو السرا وصله يقدّم اللي خلفه حتى تأتون بالعفش وتنهون الإجراءات .
إنشاء الله ستلحقون بالرحله
لا تخاف .
في حال لو ما لحقتوا الرحله
يعتمد إذا كنت قاص من قبل رحلة ذهاب وعوده
هنا الذهاب فاتك ويلزم تبحث في المطار عن أقرب رحله خط واحد ذهاب فقط
وأيضا يكون لديك فندق من قبل بحثت عنه مسبقا وعرفت إن سعره مناسب للمبيت فقط
لا قدر الله ما لقيت الّا رحله أكثر من 12 ساعه تروحون الفندق تريحون
ويكون قريب من المطار .
ويارب يارب تتيسر أموركم
إن شاء الله .
بالتوفيق أخوي

حياك يا غالي
نعم تقدر توفر بالوقت
صحيح إنه ساعتين مو كثير
لكن ربك يعين
خصوصا إنه فيه ربع ساعة راح تروح على بالك ما تنزل الطيارة
وهي كالتالي :
1. إنتم مجموعة ، فحاول تنزل لوحدك وتروح مباشرة للجوازات بسرعة وخلي ربعك ينزلون على راحتهم والوعد ما يطلعون من الجمارك تجي تاخذهم بعد ما تخلص.
2. سوي التأشيرة الإلكترونية ، لثلاث جوازات فقط ، وهي مضمونة ، أنا سويتها قبل 3 شهور ، وأعدت إستخدمها الأسبوع الماضي بدون ما أسوي وحدة جديدة.
3. على بال ما يدخلون ربعك في الجوازات ، تكون إنت على سير الشنط وتحاول تستلم الشنط بأسرع وقت ، وقبل ذلك ، خلي معاك صرف ( معدن ) عشان تقدر تاخذ معاك عربة تنقل فيها العفش.
4. حاول تسوي البوردينق قبل ما تسافر من الكويت ، عشان توفر في الوقت ، ويبقى عليك فقط إدخال العفش.
5. المطار الداخلي فوق ، يعني لما تطلع من الجمارك ، روح يمين آخر شيء راح تحصل مصعد ، خذه واطلع للدور الاول ، ومباشرة على بيقاسوس
لحسن حظكم بإذن الله إنه صبيحة أقل زحمة
وكمان الصباح في العادة ما فيه ضغط كبيرعلى الطيران الدولي
بس حاول ، تستعجل ربعك بالنزول وإذا تاخروا روح وإسبقهم
بس أنا خايف من شغلتين
تأخير الطيارة وهذا ممكن ،
والثاني إنه الشنط والعفش ما ينزلون السير بسرعة
وإذا طلعت فوق وسألوك عن جوازات بقية الأفراد ( أعني طيران بيقاسوس )
قولهم هذاهم بالطريق عند الجوازات هالحين اناديهم
وربنا يسهل أمورك ويوفقك
تساهيل بحول الله

أبشركم
قدرت أغير توقيت الرحله على الرحله اللي وراها اللي هو 1230 الظهر
دفعت بس 67 دينار كويتي
حق تغيير التوقيت
أنا في البدايه توقعت ال nonrefundable انك ماتقدر تغير الوقت
بس الحمد لله عدت سليمه
الله يجزاكم خير جميعآ على مشاركتي مشكلتي
وهذي عادتكم دائمآ المسانده والتعاون الله لايحرمكم الأجر
بس درس واستفدت منه

أبوأنس1970
حلو
الله يبشّرك بالخير
كذا تمام أمورك
الله ييسر لكم باقي الرحله .

هكذا افضل بكثير و أأمن من ان يتضيع كل التذاكر وعندك وقت كافي جدا ايضا بالمطار ومو مستعجلين تقدر تخلي الفيزا بعد الوصول لو تريد وهي 20 دولار لكل جواز وليس كل شخص ولازم تدفع دولار او يورو او استرليني و الافضل دولار كاش
او من النت وريح رأسك
ورحله سعيده

الله يسعدكم وجزاكم الله خير