هـواوي
09-12-2022 - 02:57 am
بسم الله الرحمن الرحيم
قبل أن ابد في موضوعي هذا
أتقدم بالشكر الجزيل لموقع المسافرون العرب
على ما حصلت عليه من معلومات كانت جدا قيمة
ومفيدة وصحيحة 100%
مما كان لها الأثر الكبير لي للاستمتاع برحلتي الأولى إلي باريس
باريس
كان قراري بالتوجه الي العاصمة الفرنسية باريس قرارسريع جدا
قررت السفر قبل شهر تقريبا من تاريخ السفر الفعلي
ارسلت جوازي الي السفارة الفرنسية بالرياض وجلس حوالي اسبوعين
وطلعت الفيزة الشنقن بعد شروط اعتبرها وبصراحة تطفيشية
بدات البحث بالانترنت عن مواقع تتكلم عن باريس وعن فرنسا
دخلت على مواقع كثيرة وكان اهمها دخولي الي موقع المسافرون العرب
والذي كان يحتوي على تجارب العديد من المسافرين الي جميع دول العالم
ولا اخفيكم سرا استفدت من معلومات كثيرة من الشبكة العنكبوتية
والتي اعطت لي تصوراً مبدئياً واضحا لباريس
.
في الطائرة كنت اوسوس لروحي وش ابسوي وين ابروح لو اهجموا على حراميه
وش اسوي اعطيهم الي معي والا اعطي اكبر واحد فيهم بقس على خشمة واهج
والا استسلم واعطيهم كل الي معي واروح اصيح عند باب السفارة
.
وصلت الطائرة الي مطار شار دي جول C. D. G
ونزلت من الطائرة وختمت جوازي ... الصراحة المطار الي نزلنا فيه
مخيس جداً
بعكس الي شفته بالانتر نت واكتشفت انه الصالات القديمة للمطار
توجهت الي مقر السكن والصراحة كان جداً مريح واكثر مما توقعت
نمت لي ساعتين وقمت ولبست ونزلت للشانز لزيه لانه كان جدا قريب
من مقر السكن يبعد حوالي 50 متر
أول وقفه لي هي الي بالصورة ادناه ...... ( قوس النصر ) arc-triomphe
او كما يحب ان يطلق عليه اهل باريس منطقة ETOILE
الجوكان جداً بارد ومطر خفيف يعني الجو بأختصار خنفشاري
أو على قوله واحد من الشباب طيب الله ذكره .... جو مذاكره
أنطلقت بعدة للشانز حاملاً في بالي الكثر من الفضول حول
هذا الشارع الي سمعته مرتبطة بالطبقه الغنية أو المخملية
أو الشخصيات الهامة خاصة اذا قاموا يسولفون عنه .
هو بداية الشارع من قوس النصر وينتهى بالمسلة المصرية
بدات من بدايته .... منظر عجيب أمة محمد كلها هناك
جميع الجنسيات .... صخب في كل مكان ... مقاهي ومحلات
ومعارض سيارات و قاعات سينما في كل مكان شارع عجيب وممتع
يكفيك بأن تجلس في أحد المقاهي وتتفرج على الرايح والجاي
وهذه مشهد من هجوله هالناس بالشارع
وتبدا الحياة بالشارع من الساعة 8.30 صباحاً وتنتهي الساعة 12.00مساء
حيث ان الشمس تشرق في باريس الساعة 6.30 وتغيب الساعة 10.15
النهار جدا طويل وهذا ما يميز الديرة يمديك تروح أكثر من مشوار في يوم واحد
شارع الشانز عجيب جدا وممتع للغاية
زرت في باريس العديد من المواقع السياحية منها المميز ومنها المعفن
وكان من أهم المواقع واميزها على الاطلاع وانصح كل من توجه الي
عاصمة العطوروالازياء والاضواء باريس
شارع الشانزلزيه وقد تكلمت عنه سابقاً وهذه صورة جوية له
وفي الاسفل صورة بغيت ادفع ثمنها غالي لاني
وقفت بنص شارع الشانز وطقيت صورة من نهايته
الي قوس النصر وتشوف فيها بعد المسافة
برج أيفل Eiffel Tower
وهو من اهم وابرز معالم باريس
وهو يرتفع حوالي 276 م ويببدا باستقبال الجمهور من الصباح
وحتى الساعة 12.00 مساء
البرج تحفة فنية وزيارته امر لا بد منه ولاكن يعيب عليه الزحمه الغير معقولة
للصعود الي اعلا نقطة فقد جلست حوالي 2.5 ساعة للصعود الي اعلا
عن طريق المصعد البطئ والزحمة والطوابير واحلا شئ فيه الجلسه تحته
سعة صدر وخصوصا انه بقرب نهر السين
وهذه لقطة اخذتها للبرج وهم توهم طاقين الزر حق عقود اللمبات الي حوله
وهذه لقطة تحت البرج
وتنطلق بالقرب من برج ايفل الرحلات البحرية على نهر السين
وهي من الرحلات الممتعة حيث ترا على جوانب النهر القصور
الباريسية القديمة والمتاحف وهالبشر الي على ضفاف النهر
وهذه احدى اللقطات لاحد المراكب ملبق عند البرج
وهذه لقطة جوية لنهر السين
متحف اللوفرLOUVRE
وهو متحف غني عن التعريف
وهو اهم واشهر متحف في العالم ويحتوي على العديد
من الاقسام الخاصة بالتراث الغربي والاسلامي و
اللوحات الفنية والتي اهمها لوحة الموناليزا الشهيرة
وهذه لقطة لمقدمة المتحف العملاق
ويوجد بالقرب من المتحف حديقة ترد الروح وفيها ملاهي صغيرة
وهذه لقطة من داخل الحديقة وكنت جالس اقرا جريدة الشرق الاوسط
يتبع ... أسفل
رحلتي الى فرنسا
وهي عبارة عن ساحة كبيرة وكانها تحفة فنية من روعة التصميم
منطقة اسواق راقيه ومنطقة مطاعم وشركات ورسامين نصابين
وهذه مجموعة من اللقطات للساحة
..
برج مونباغناس montparnasse
وهو مطل اخر على باريس وتعتبر هي اطول بناية عندهم
وارتفاعه حوالي 210 م ويفتح من 9.30 ص وحتى 10.00م
ويوجد فيه مطعم واستراحة بسيطة وسوق صغير
مجمع القالري لافيت GALERIES LAFAYETTE
وهذا المجمع عجيب جداً يدوخك 7 ادوار من جميع ما يخطر في بالك
معروضة بشكل انيق جداً ومرتب وفيهم ميزة حلوة مخلينك على راحتك
مهوب عندنا اول ما تدخل محل يا يجيك........يعل قلبك
تقل انك اعمى ما تشوف والا يجيك هندي يقولك اهلا صديق هذا خمسين ريال
وفيه منه الوان .
ومن مميزات هالسوق الخرافي انه يحتوي على مطعم ومطل على باريس
ويحتوى ايضا على المهم الا وهو التاكس فري TAXE FREE
وهو انهم يرجعون لك قيمة الضريبة المفروضة على البضائع مباشرة
وهذه لقطه داخلية للسوق
........
مركز العطور والمكياج والاشهرفي باريس
سيفورا SEPHORA
وهذا محل خيالي للعطور والمكياج
......
هناك الكثير من الأسواق الباريسية مثل
لو بون ماغشية LE BON MARCHE
لا غودوت LA RODOUTE
ليه كاتغ توه LES QUATRE TEMPS
وغيرها كثير
......
جينا عاد لسعة الصدر الحقيقة
الا وهي الملاهي
باريس فيها أشهر ملاهي باوروبا كلها الا وهي ملاهي يورو ديزني لاند
وهي ما تفرق عن الحكير لاند الا بالجو
الملاهي عملاقة مدينة متكاملة تحتوي على مدينةو ملاهي واستديوهات
وقرية صغير فيها مطاعم وسينما وفندق عالمي
يعيب على ملاهي الديزني انها تهتم بالعاب الاطفال وانا اعتبرها
انها ملاهي اطفال لا يوجد شئ مميز للكبار والصراحة
ندمت اني زرتها وضيعت وقتي فيها
......
مدينة العاب استيركس Parc Asterix
وهي مدينة العاب ممتعة جداً وفيها العاب خطيرة حوالي 3
المدينة حلوة وتستاهل المشوار ولكن يعيب عليها انها غير
مرتبة مثل الديزني يعني حوسة شوي .>>الحدائق والمنتزهات
الصراحة تتميز باريس بالحدائق وأشهرها
غابة بولونيا Bois de Boulogne
وهي عملاقة بكل ما تحملة الكلمه مناطق خضراء وبحيرات قريبة من
نهر السين تستطيع ان تجلس فيها نهار كامل وانت ما درتها
جاردان دو تيليريه Jardin Des Tuileries
وهي الحديقة القريبة من متحف اللوفر والي صورتها فوق
والي بها ملاهي صغيرة
والحدائق بباريس كثيرة وهذه اهمها اعلاه
في باريس مختلف الخيارات لزيارة اغلب معالمها واسواقها
يوجد هناك شركات سياحية تشتري منهم تذاكر وتركب بالباص
مثل الي تحت
يفر فيك اهم مواقع باريس والتذكرة لمدة يوم كامل ولهم محطات
معينة توقف عندها يجي باص الشركة يأخذك .
أو مثلاً تقدر تفر باريس كلها بالمترو والرير
تنزل تحت الارض في محطات معينة وتقطع تذكرة
وتجلس تنتظر قطارك لين ما يجي وهو واضح جداً
فيه لوحة زي منتوا شايفين بالصورة وفيها عدة مواقع وعنوانين
اذا ولعت لمبة المحطة الي تبيها فان القطار الجاي بيروح لمها اركب
وسم بالله وتعوذ من ابليس والله يعينك على الريحة
وفي باريس العديد من المتاحف والقصور التي تستحق الزيارة
مثل قصر فارساي وغيرة
ملامح عامة من باريس
·...............................................
...
· الواحد يسمع عاصمة العطور والازياء يقول الحين بتشوف
اخس وحده فيهم كلوديا شيفر ولاكن تتفاجا بان اغلب اهلهم من أصحاب
الاوزان الثقيلة ................................؟؟؟؟!!!!!
· دخلت محل العاب وحركات والصراحة تفأجات وجود لعبة الكيرم والتي
كنت اتوقع انها خاصة بنا لا وسعرها بعد 430 ريال الله يسلم شارع السويلم .
..............
· ما تدخل حديقة او منتزة الا وتلقا حمام وارانب وبط على كيفهم يروحون
ويجون على راحتهم .... لو عندنا مثل هالصورة بالحدائق الي عندنا كان الناس
ما يحتاج يجيبون مهعم الا جمر ومنقل وكاتشاب ومايونيز وخبز وهاتك يا باربيكيو
· متعة باريس الحقيقة هي شعبهم الودود جداً رغم عدم إلمامهم باللغة الانجليزية
ومحاولة مساعدتك بأي وسيلة وبوجه رحب وابتسامة عريضة.
يعيب على باريس غلها الفاحش حيث ان قارورة الموية ام ريال عندنا عندهم
حوالي عشرة ريال غير الببسي الي بخمس وعشرين ريال وغيره وغيره ...
وفي الختام قد اكون تجاهلت العديد من المواقع والمزارات ولكن
حتى لا اجلب لكم الممل لان الكلام عن باريس قد لا تكفيه المجلدات
والكتب المليئة بالأوراق فحبيت اني اعرض لكم لمحة بسيطة عن
مدينة سطرت أسمها ونقشته على عقول الملايين من البشر
أخوكم
هواوي
تأكد بأنك ستشتاق إلي باريس ..... ولكن باريس لن تشتاق إليك