:smile002:
السلام عليكم ورحمة الله وبركاته ..
اعتذر لزوار موضوعي الأول في ساحة التقارير المصورة لبريطانيا في التأخر بكتابة تقرير رحلتي إلى فرنسا
والتي كانت بسبب انشغالي في الفترة الأخيرة ..
البدايه ..
علشان يكون الجميع في الصورة .. هذا التقرير تكمله لرحلتي التي كانت في اغسطس 2008 حيث سبق ان عرضت
الجزء الأول من التقرير في الساحة الخاصة بالتقارير المصورة لبريطانيا ويشرفني مرور من لم يقرأه على هذا الرابط
https://artravelers.com/p/re/221313
ومن هنا سأبدأ بسرد بقية التقرير لرحلتي إلى فرنسا
أتمنى أن اوفق في كتابة التقرير على الوجه اللي يحمسكم إلى آخر حته .. واعذروني ان نسيت شيء ماكتبته لاني بديت انسى بعض الأشياء
ونصيحتي للي ناوي يكتب تقرير يكتبه اول مايرجع لانه يكون ذاكر أدق التفاصيل زي تقريري اللي بساحة بريطانيا كتبته باول اسبوع تقريبا
مالكم بطولة السالفة

• * الحجوزات وطريقة استخراج الشنقن تم ذكرها في التقرير الأول ولكن يتبقى الجزء الخاص بحجز الاوتيل اللي بباريس

صرف العملة : فيه في البطحاء محلين مشهورات مرره للصرافه صرفت منهم وعطوني اليورو ب 5.68 ريال علما ان فيه ناس اعرفهم صرفوا اليورو
بسعر 6 ريال قبلي باسبوعين تقريباً فالسعر متذبذب .
حجوزات الفنادق : حجزت عن طريق موقع http://www.Expedia.com
والجميل في هالموقع انك تقدر تحجز وتلغي على كيف كيفك بس انتبهوا بعض الغرف تلقى مكتوب جنبها غير مستردة وهذي قليل
انا حجزت Best Western Plaza Elysees Hotel في باريس

الواجهة ماصورتها لكم بس بجيبها لكم من أحد المواقع

موقعه من اقمار قوقل

من اهم المزايا اللي شجعتني على حجزه
انه كان يبعد 200 متر عن الشانزلزيه
واللي يبي نصيحتي يبعد عن الشانز لانه الفنادق القريبة منه تصير غاليه .. فالشانز تاصل له بالمترو من أي مكان
فبقيمة ثلاث نجوم في الشانز تلقالك فنادق خمس نجوم بمنطقه ابعد شوي .
بس اهم شي يصير جنب الفندق مترو وبدقيقه وانت شاخط ( شاخط = مشوت بسرعه:bounce8: ) للشانز وواصل
السعر : 555 يورو للخمس أيام أي بمعدل 630 ريال لليله
" هذا الجزء خاص بمن قرأ تقرير لندن " عن طريق محطة البادنقتون اتجهنا إلى محطة كنق كروس بسعر 4 باوند للشخص الواحد ثم اتجهنا منها عبر اليوروستار إلى محطة جاردينورد
ومنها إلى الاوتيل
" انتهى الجزء الخاص بمن قرأ تقرير لندن " إليكم صور متواضعه من الاوتيل اللي الصراحه مااعجبني مره وانصدمت فيه لان صوره في النت كانت مفخمته شوي
هذي لوحة على الجدار

وهذا السرير حق الاكل قصدي النوم :36_1_50:

وهذي الصورة الأخيرة

وفيه دورتين مياه وانتم بكرامه ؟؟؟
الأولى : فيها كبانيه ( حمام افرنجي ) فقط بدون شطاف مويا
الثاني : مغسله وبانيو واستشوار وعلوم سنعه
السؤال اللي في بالي .. ليش الكلافه ليه ماخلوا الحمام واحد .. وش معنى الحمام الأول ممنوعه عنه المويا نهائيا
بس ماعليكم يقولون آخر ذيب بالدنيا كان ذاك الوقت بباريس ( اللي هو انا ) .. كنت آخذ المويا بجيك واهربها للحمام الثاني .. معاناه والله :36_1_5:
الحين نجي للزبده .. وصلنا وريحنا شوي وعلى طول للشانزلزيه ..
خلوا قبل مانروح للشانز نعطيكم بعض الكلمات اللي يمكن تحتاجونها
صباح الخير : بونجور ، مساء الخير : بونسوار ، كيف حالك : كومون سافا ، بخير : تخغيبيان ، الى اللقاء : اوروفوار ، تصبح على خير : بون وي
1 : اون ، 2 : دو ، 3 : تروا ، 4 : كاتر ، 5 : سانك ، 6 : سيس ، 7 : سيت ، 8 : ويت ، 9 : نوف ، 10 : ديس
انا : موا ، انت : توا ، هو : ايل
أيام الاسبوع من السبت للجمعه : سامودي ، ديمانش ، ليندي ، ماردي ، ميركودي ، جودي ، فانترودي
((الراء تنطق عندهم غين ))
ويمدحون هزة الراس ان ماعرفت شي :36_1_21: ..
خريطة المترو
الصرحة روعة ومنظمة مرره .. مافيه أمل تضيع .. انا اعتبره افضل من ماب تيوب لندن
السعر
انا الصراحه اخذت كرت من محطة جاردينورد اسمه Visit Paris ومدة صلاحيته خمس ايام تركب المترو انشالله مية مره في اليوم
ويجي مع الكرت خمس ايام مجاناً لل B BUS وهو نوع من انواع الباصات المغلقة يدور بالشوارع برضه على اماكن سياحيه بس
ماركبت ولامره معاه لاني قصيت تذكرة للباص الأحمر المكشوف أحلى .. وكان سعر تذكرة Visit Paris ب 27.50 يورو للشخص الواحد
أي بمايعادل 155 ريال للخمس ايام للشخص الواحد .

شارع الشانزلزية
معلومات لمن لم يسمع بالشانزلزيه ( مع انه لايخفى على الجميع )
من اجمل جادات العالم هي جادة الشانزلزيه التي تغمرها الحياة ليلا ونهاراً حيث يوجد بها العديد من المحلات التجارية والمقاهي الكبيرة والمطاعم ودور العرض
كما يوجد ايضاً أكبر محل للعطور في العاصمة ( سيفورا ) اللي صورته لكم , وتبدأ جادة الشانزلزيه من ميدان الكونكورد وتنتهي عند ميدان شارل ديغول عند قوس النصر .
كيفية الوصول إلى الشانزلزيه
يمكن الوصول إلى الشانزلزيه عن طريق الوصول لأحد المحطات التالية التي توجد كلها على هذا الشارع
Charles de Gaulle Etoile
Chams Elysées Clemenceau
Franklin D Roosevelt
George V وهذي جنب الفندق اللي حجزته , باينه على الماب اللي فوق
رسوم الدخول
شارع اكيد ببلاش
مقتطفات مصورة
هذي اول صورة من الشانز

وهذا محل سيفورا من اكبر محلات تجمع العطور في العالم

الحلو بالشارع تلقى فيه كل ماهب ودب
شوفوا هالسيارة المعروضة

وهذي بغيت اشتريها بس ماهي للبيع

وكمان من زاويه ثانيه

ريحنا شوي في الشانز اللي باتجاه الكونكورد ومرت من قدامي حمامه فكتبت هالقصيده
قصدي صورتها .. اتحداكم اذا احد قد صور حمامه تتمشى بالشانز

اخذنا الباص ابو دورين اللي يجي مكشوف راسه من الشانز وهذا الباص طريقته كالتالي :
تدفع 24 يورو أي مايقارب ال 140 ريال للشخص الواحد وذلك مقابل انه يفر فيك لتسع اماكن سياحية
والأطفال ( بين 4 و 12 ) للي معاه اطفال نصف السعر 12 يورو
ويمكنك الحصول على التذاكر من نفس الحافلة .. تطلبها من السائق
كل محطة وقوف تمثل مكان سياحي تتناوب عليه باصات متعدده يمكنك الركوب لحظة وصول أي باص لها
ولكن كل محطه في الغالب من 10 دقايق إلى ربع ساعه لازم باص على الأقل يمر فيها
ويعطونك خريطه تبين كل الاوقات اللي بتمر فيها كل الباصات على هالمكان بالساعه والدقيقه
مدة التذكرة يومين متتاليين .. تبدأ من الساعه التاسعه صباحاً
الأماكن السياحية التسعة اللي ياقف عندها هي :
1 - Tour Eiffel
2 - Champs De Mars
3 - Musee Du Louvre
4 - Notre Dame
5 - Musee D'orsay
6 - Opera-Galeries Lafayette
7 - Champs Elysees - Etoile
8 -Grand Palais
9 -Trocadero
وراح نمر انشالله عليها بالتفصيل لاحقاً .
قوس النصر
معلومات لمن لم يسمع بقوس النصر
يبلغ ارتفاع قوس النصر 49,50 متر ويحمل القوس على واجهاته عدد من المنحوتات ويحيط بأعلاه نحت لمئات الجنود بارتفاع مترين
يمكنك الصعود إلى السطح لالقاء نظرة تتبين لك من خلالها مدى جمال الساحات المحيطة به وكذلك ستتمكن من رؤية المنظور الكامل
لشارع الشانزلزيه الممتد حتى ميدان الكونكورد .
كيفية الوصول إلى قوس النصر
يمكن الوصول إلى قوس النصر عن طريق
Charles de Gaulle Etoile
رسوم رؤية القوس
Free ( مجاناً )
مقتطفات مصورة
في البداية ركبنا الباص المكشوف

قربنا اكثر

وصورة جانبية لعيونكم

وهذي آخر صورة ..

الآن حنا رايحين لميدان الكونكورد
فتحوا عيونكم بصور لكم مطعم أخذ سمعه غير طبيعيه بالنت مع اني اشوف انه جدا عادي
طبعا لازلنا على شارع الشانزلزيه

وعلشان تسلسل الأفكار بالعرض راح اطلب لكم سفري منه بيتزا .. تاكلونها بالطريق :36_11_15:

تجون نفتح محل فطاير عندهم .. تراهم من الزحمه ماهم قادرين يغطون
بس المشكله وين نلقى فتحه فاضيه في الشانز .. لازم نقل قدم

طيب وصلنا لميدان الكونكورد والا باقي ..
ميدان الكونكورد
معلومات لمن لم يسمع بميدان الكونكورد
في هذا الميدان تم تنفيذ حكم الإعدام بقطع الرأس في الملك ( لويس ) لوي السادس عشر وفي الملكة ماري انطوانيت .. وش كانوا مسوين انا مالي دخل بالسياسه
الكونكورد تعني الألفة أو الود والوفاق ,, تزين الميدان نافورتين جميلتين على طراز نافورات الفاتيكان بالإضافة إلى ثمانية تماثيل ترمز لمدن فرنسية .
كيفية الوصول إلى ميدان الكونكورد
يمكن الوصول إلى ميدان الكونكورد عن طريق
Concorde
رسوم رؤية ميدان الكونكورد
Free ( مجاناً )
مقتطفات مصورة
انقهروا ماراح اوريكم وجهي الا بآخر صوره بالتقرير والا حتى مايحتاج ..

هذي صوره أحلى

التصوير ببلاش

الصورة الجاية لو كان عندنا التمثال اللي فيها كان البنقاليه مابقوه يوم واحد
لانهم ماقصروا باسلاك الكهرب .. فبيتوقعون انه ذهب
وهنا تجدر الاشارة إلى مثل ألماني .. لاتصدقون عاد يقول - ليس كل مايلمع ذهباً
:36_9_2:

نوافير حركات وبركات ..

انتهينا من ميدان الكونكورد ونحن الآن باتجاه برج إيفل
برج إيفل
معلومات لمن لم يسمع ببرج ايفل
اول مايتبادر إلى الذهن عند ذكر اسم باريس هو برج ايفل وهو عباره عن تركيبة هندسية معمارية من الحديد واطلق عليه هذا الاسم
تخليداً لاسم بانيه المهندس الكسندر غوستاف ايفل .. يقع برج ايفل في أجمل ميادين العاصمة ( ميدان تروكاديرو ) .
كيفية الوصول إلى برج ايفل
يمكن الوصول إلى برج ايفل عن طريق
Bir-Hakeim اقرب محطه
Trocadéro بس يبيلك تمشي شوي
رسوم الركوب لبرج ايفل
قالت لي عمرك اكبر من 25 والا اقل .. قلت ليه وش الفرق
قالت اللي اكبر من 25 ب 4 يورو واللي اقل ب 3,20 يورو
قعدت افكر برهه من الزمن .. قلت لا عمري اقل من 25 وحاسبتها على 3,20 مع ان عمري الصدقي 28
عاد تحسفت يوم قصيت التذكرة قلت تتسذب علشان حوالي اربع ريال .. بس اذا حطوا صندوق تبرئة ذمه برسل لهم 8 ريال لاني لعبت عليهم
المهم التذكرة للدور الأول فقط ثم لازم تقص تذكرة للدور الثاني اذا ودك تطلع له ب 3 يورو للشخص الواحد
عاد الدور الثالث ماطلعت له والا له تذكره خاصه فيه لان جتنا هواء قويه بغت تطير البرج
الدور الأول = 57 متر عن الأرض
الدور الثاني = 115 متر عن الأرض
الدور الثالث = 274 متر عن الأرض - فيه متحف يضم مكتب المهندس ايفل
عدد درجات البرج = 1653 درجه تفكك ركبك تفكيك
مقتطفات مصورة
الآن بطريقنا من ميدان الكونكورد لبرج ايفل
والمطر يضرب .. نزلنا تحت بالباص
وهذي صورة تهورت ولقطتها لكم من فوق علشان تصدقون ان فيه مطر .. ترى الجو بدا يعتم شوي من قوة المطر

الآن وصلنا لميدان تروكاديرو

ولقطه ببيعها للي يسوم

صوره طوليه

عاد هذا القمر لازم نوريكم صورته

الآن بنركب الباص علشان نروح للبرج
أنا عارف اني ازعجتكم بالشنطه اللي معاي .. بس تراها مليانه فلوس

وهذي صوره للبرج من تحت

عاد ذا الصورة انواع دوخة الراس :icon_shak

الآن منطقة بيع التذاكر .. توجد عند كل زاوية منطقة بيع

طلعنا الآن فوق .. حط يورو اذا تبي تطل مع الجهاز

من هنا راح تشوف هالساحة الحلوة .. وهذي الساحة اللي تحيط ببرج ايفل

وكمان ( كمان = برضه ) حتشوف منظر للمدينه

أخيراً صورتين لبرج ايفل ليلاً ..

فيه حركه حلوه .. كل بداية ساعه جديده يبدأ البرج ينور إناره سريعه باللون الابيض بشكل عشوائي
يستمر لمدة ربع ساعه .. يعني من الساعه عشر لعشر وربع ومن احد عشر إلى احد عشر وربع وهكذا ...
بوص للمنظر

وبهذا نكون انتهينا من تغطية زيارة برج ايفل .. طبعا ريحنا تحته لين باقي شوي ونشبع منه ثم مشينا
طلعنا ياحبايبي إلى نهر السين ..
نهر السين بجنب برج ايفل وكان الهدف أخذ جوله بحرية على النهر بالليل ..
سعر الرحلة اللي تستغرق ساعه كامله للشخص الواحد 11 يورو أي بمايعادل 65 ريال
يلقطون لك كذا صوره وانت طالع اذا تبي تشتريها فاهلا وسهلا ماتبي أهلا وسهلا بعد
انا اخذت الصوره لانها كانت حلوه وجيده للذكرى ب 10 يورو .
وده المركب بتاعهم

لقطه أخيره

وبعد هذا الجهد الجهيد في اليوم الأول اتجهنا من محطة Trocadéro اللي جنب البرج إلى محطة George V اللي جنب الفندق
وخلدنا للنوم .. :36_1_50:
إلى لقاء قريب مع أحداث اليوم الثاني ..
:36_3_12: تقبلوا تحياتي وإحترامي :36_3_11: