اولا وقبل ابدأ موضوعي ... احب اشكر كل الي رحبو فيني واقولهم ارحبو عدد ماهل المطر واثاري السلام والترحيب يتعب وربي رحمت الشخصيات المهمه استقبل وودع.واقول لكم ترى الغداء عندي والذايح والقعدان على اخوي ايوب يعني انا علي القهوة والشاهي والقدوع لاتنسون ولا تفطرون حلو الذبايح
مالكم بالطويله اذكر اول سفرة والله لايعيدها من سفرة افتت علينا وحدة من جارات امي ان مصر مايبيعون فيها رز سعودي ووصت امي تأخذ لنا قطمتين رزالمهيدب حددت الله يسامحها .. لا ومن زين الطبايع قالت لامي تكفين ان كان ماعليتس امر ابي قطمة لي جيبيها معكشكيت ان واحد من مطاعم المندي الي بمصر لها.. وياليتها جت عالرز قالت لامي ترى مايبيعون جبن سايل جيبو معكم وترى سكرهم ماله طعم تقول لامي والله يالبريق احط فيه عشر فناجيل سكر ولايبين يام فلان وخبزهم كله عجين فرزني بالفريزر خبز عربي وقبل السفرة حطيه بكرتون ولزقيه والله مايتغير يام فلان ينفعكم للفطور انتي وشايبتس والله ان تدعيلي مادرت ان ابوي دعى عليها وبتجيكم السالفه ليه دعى عليها احنا سالفتنا سالفه مع ذا الارزاق كن محد سافر الا احنا .. المهم امي خذت الوصاة وثاني يوم راحت وشرت الشنطه القديمه الكاروهات الاسود والاحمر قلنا لها ليه قالت عشانها قاسيه وتتحمل المقاضي وجا الليل والله واكبر ياذيك الليله مابقى لزقه ولاشطرطون الا ماشريناه وسرى ليلنا واحنا نلزق نلف بهالجرايد ونلزق بهارات سكر رز جبن سايل طبعا كلها بالكميه يعني كرتون جبن ابشركم والخبز بالفريزر وامي حاطه ساعتها باليمين عشان الى شافت الساعه كم تتذكر ليه حاطه الساعه باليمين وبعدين تتذكر الخبز ونرجع للشنطه طبعا صايرة الشنطه سبيل فاتحينها طول الليل وكل ماتذكرنا شي لفيناه ولزقناه وحطيناه بهالشنطه....وغير كراتين التمر الي امي مواعده فيها اهل الحارة كلهم والقهوة والهيل والزعفران تونا باقي قايله لكم قصتنا قصه ووحده من خواتي فطورها وغداها وعشاها كورن فليكس لين صارت يابسه اللهم ياكافي من الكورن فليكس وابوي نايم مسيكين ياغافلين لكم الله وامي ترجف منه وقت السفر لانه حريص ويروح قبل الرحله وربي باربع ساعات مادري وش السر شكله يفكر الطيارة زي الباص الى امتلت بتمشي وتخليه المهم ابوي يروح قبلنا مع السواقين والشناط طبعا احنا ركبنا الشناط من الليل واول وحده شنطة جدتي اقصد شنطة الارزاق وحطينا فوقها شناطنا .. مادقق ابوي الله يحفظه وكالعادة وحرصه الزايد يالله يافلان ن فلان وفلان والحقوني المطار .. ووصلو المطار والله يسامح ابوي دائما انا الي بوجه المدفع .. ماعلينا الحين احنا ركبنا السيارة وابوي غريبه مادق علينا واحنا يارض انهدي ماعليكي أدي مابقى احد من قريب وبعيد الا علمناه اننا بروح مصر لا وازيدكم من الشعر بيت اقول لصديقاتي بقولكم شي بس امانه قبل ماقوله قولو ماشالله .. خايفه من عينهم من جد هبال المهم وصلنا المطار واول مادخلنا لقينا عاليمين سوبرماركت مفجرة اقصد شنطة جدتي يوم نزلوها السواقين من ثقلها انكسرت وتبعثرت البقاله في جميع انحاء المطار والله لايوريكم وجه ابوي طبعا في ناس بالمطار يعرفون ابوي ويعرفون وقت الرحله فالله يجزاهم بالخير جايين يعني فزعه غرض والا حاجه يابو فلان تامر على شي وابوي ابض وتعرفون الابيض مع الاحراج يقلب وجهه احمر ابوي لا وحياتكم قلب اسود اتوقع هذي اخر درجه بالاحراج والفشيله طبعا اول من جاء بوجهه انا قال من الي مرتب الاغراض الي بالشنطه قلت انا وامي لعنبوكم رايحين الصومال اتفوه عليكم وعلى الي يسفركم انا غلطان يوم اني اقولكم بنسافر انتو حدكم البر على هالمقاضي.....خلااص طولت عليكم الباقي بعدين واستروا على ماواجهتوا مو بكرة تقولون لي يالقرويه يام الرز والخبز.... ايه نسيت اقولكم رجعت امي ساعتها باليسار لانها خذت كرتون الخبز المثلج ونسيت بعد اقولكم غير التمر فيه رطب مفرزن ههه ولنا لقاء واحداث وبلاوي اخرى