بسم الله الرحمن الرحيم
السلام عليكم ورحمة الله
الاخوة والاخوات الاعضاء كل عام وانتم بخير بعد الزحمه طبعا وعندي ذكريات جميله عن اول سفره لي الى المغرب
حبيت انكم تشاركوني الذكريات الجميله في رحلتي الى بلد الجمال والسحر والخيال وتشاركوني التجارب والخبرات
وكل مافي سفرتي من معاني جميله!!!!!
اولا (كيف نويت السفر)
كان يوما عاديا كأي يوم يمر على شاب في السعوديه!!! صحيت الصباح ورحت للدوام طفشان!!!!!!!!!!!!!!
تدرون ليه؟؟؟؟؟؟
لأني قدمت على اجازه 30 يوم وتوهقت ماأدري وين أسافر وين أروح وين أهرب من الحر والأجواء اللي تخلي الواحد
يمل من نفسه درجة الحراره 50 يادافع البلا.
دخلت الدوام اسحب اذيال الملل كأني رايح لحرب ماهو دوام فيه شايب زكرت من اخويانا بالعمل ماسك قسم كامل
واللي يطفش من الشباب يروح عنده نكتي وزكرتي اسمه ابوسعد ويوسع الصدر المهم رحت عنده خذيت كوفي
حس ابوسعد اني طفشان وضايق صدري .. قام يلطف الجو ويغني ياضايق الصدر بالله وسع الخاطر دنياك يافلان
ماتستاهل الضيقه,,,,قلت والله انك صادق يابوسعد,, قال وش فيك؟؟؟ قلت عندي اجازه 30 يوم وقربت ولا ادري
وين الروح!!!!!!
قال وبس. قلت ايه,,, قال مشيتي المغرريب قلت نعم؟ قال رحت للمغرب؟ قلت لا,,, قال معك أحد قلت واحد من
الشباب.
وحقيقة قال لي سوالف وعطاني صوره كامله عن المغرب الزكرت والله انا كبر واحد من عياله ذاك الوقت,,قلت له
يقولون المغرب سحر (تعدل الرجال في جلسته )
قال ماعليك من كلام الناس وسرد لي قصص ومغامرات له بالمغرب وقال رح ولايهمك احد واذا ما انبسطت
ما اكون ابوسعد!!!!! بس انا خايف عليك لانك صغير بالعمر. الرجال يسولف وانا فاتح فمي!!!!!!!
باللحظه هذي دخل علينا واحد من الشباب ,,,,قال وش فيكم؟؟قال ابوسعد فلان عنده أجازه ومحتار وأقول له
رح المغرب وهو متردد!!!!!!!
قال اللي دخل علينا أنا عندي أجازه بنفس توقيت أجازتك ومتفق مع الشباب بالاستراحه نطلع الفلبين تخاوينا؟؟
قلت معكم الرحمن عقب كلام ابو سعد نويت المغرب خلاص واللي يصير يصير ,,,بتوكل على الله بس اذا رجعنا كل واحد
يسرد مشاهداته ونشوف الافضل.
قال اتفقنا وطلع الرجال من عندنا وبقيت انا والزكرت يكمل مغامراته (طلع خبير بطنجه) قال تكفى يافلان رح طنجه
واسكن بالأنتير قلت ايش؟؟ قال انتركونتنتنال بطنجه,, يسمونه الانتير بشارع البوليفار والله عيشني جو قبل لا اروح.
وسلم على فلان وفلان تلقاه بالمكان الفلاني قلت ابشر.
طلعت من ابو سعد الزكرت وانا افكر وأهوجس وأسال نفسي وش هالمغرب ؟ وش فيها؟وليش الناس اللي راحوا لها ينهبلون فيها ويحبون اي واحد يتكلم او يسولف فيها؟؟
ركبت السياره بعد الدوام متوجه للبيت وانا أفكر وأفكر وأفكر لين عورني راسي وخذيت بندول!!!!!!!!!!!!
كلمت صاحبي بالسفره ابوخالد (والله الى اليوم نجتمع ونسولف باول سفره مع اننا سافرنا كثير بعدها) بس الاولى لها طعم
قلت شرايك نروح المغرب؟؟؟ قال اللي تشوفه بس ماهي سحر؟؟؟؟ قلت والله يقولون بس خلنا نجرب.
رحنا نقص تذاكر من الخطوط السعوديه وما ادراك ما الخطوط السعوديه؟؟؟والله من شين الخدمه وشين النفوس
والتذكره نار ب4000 ريال ولافيه حجز بعد من زين العلوم!!!!!!!!!!!
قلت لابوخالد نروح للمغربيه بشارع الاربعين بالملز قال مشينا.
دخلنا الخطوط وحنا فاتحين كشرنا نضحك مبسوطين موظف الكاونتر يقول لي بغيتي طذكره وانا مهوجس شاف ما فيني
فايده التفت لابوخالد قال بغيتي طذكره الا وخويي مهوجس قلت امحق هوجست يافلان وانا شاد الظهر فيك؟؟
عزيلنا (كلمه يعرفونها اهل نجد بس) قلت للموظف بكم التذكره قال ب 2700 ريال قصينا التذاكر وبعدين وصلت
ابوخالد لبيتهم,, رحت بنام ما قدرت شوي الا ويدق علي ابوخالد يسألني مانمت؟؟؟؟؟؟؟؟؟ قلت لا وانت؟؟؟؟؟؟؟؟؟؟؟
قال ما قدرت.
السفره كانت في عام 1998 بعد احداث كينيا وتنزانيا ب3 ايام
تعبت من الكتابه انتظروني مع الشاب اللي بغى يخطف الطياره وحنا عليها,,,,تابعوني.