معقوله مافيه حد راح لوكرانيا

حياج الله يا اختي اوكرانيا بلد جميل وكبيرا وتختلف المدن بها ..
وانا الان في اوكرانيا وبسال ربعي من كيف وارد عليك باسرع وقت .

اي ياليت الله يوفقك حيل انا متوهقه

كويتاوي انا ابي اعرف العوائل الكويتيه والخليخيه في وين يسكنون لاني لين الحين ماحجزت السكن كل الي اعرفه ان علاجي في كييف ولا اعرف اي شي هناك ياليت تفيدني جزاك الله الف خير

هلابك والله
المفروض ماتروحين الا عندك معلومات كامله وسكن محجوز ومعرفه تامه عن البلد .

1. الأخت صرخة

الأخت صرخة

سبق وزرت كيف بس اقامتي فيها كانت لبضعة أيام فمعلوماتي عنها محدودة وبعد مب كلش حديثة، بس حبيت أشاركج اياها على وعسى تفيدج، خاصة أن موعد سفرج قريب.
أرجح أن العوائل الخليجية في كيف عددها محدود، ومن خلال مشاهداتي يبدو ان أكثر العوائل الي تزور كيف هي عوائل كويتية صغيرة فربما الأخوة يفيدونج (من خلال الخاص) باسماء المكاتب التي تستخدمها العوائل الكويتية في حجوزاتها حق تكونين معاهم في نفس المنطقة أو السكن. ولكن اذا انتي رايحة حق العلاج في مصحة علاجية، أنصحج بالسكن في نفس المصحة، كثير من المصحات فيها بعض الغرف أو السويتات المحدثة ويكون ديكورها واثاثها مناسبين نوعا ما للخليجيين، كما أن المصحة تكون عادة آمنة وتتوافر فيها الحراسة بصورة دائمة والأهم من كل هذا هو الاسترخاء بين أشجاء الغابة والبحيرات، واللي عادة ما يقل أهمية عن العلاج نفسه.
رغم أن عدد الناس اللي يعرفون انجليزي في كيف أكثر من باقي المدن الاكرانية، إلا أن من الأكيد بتواجهج مشكلة شوي في التواصل مع الناس لان كثير منهم يتكلم اللغة الاوكرانية والروسية فقط. مادري شلون ترتيباتج بالنسبة للعلاج، بس اذا مب متأكدين ان الدكتور اللي بيكون مسئول عنكم يعرف انجليزي (أو أحد موجود في المستشفى يعرف انجليزي بيساعده في الترجمة) ربما ترتبون لاحد يترجم لكم بالروسي، مع التشديد على النصيحة اللي عادة ما يأكدون عليها الشباب في هالمنتدى الرائع بالحذر ثم الحذر من الثقة العمياء في بعض الأخوة العرب اللي في أكرانيا. اذا كنتي بالسوق أو المطعم وتوهقتي في اللغة وحبيتي تستعيني بأحد يترجم لج كم كلمة، استعيني بالبنات الاوكرانيات اللي أعمارهم في بداية العشرينيات لان بعضهم يعرفون شوية انجليزي.
من ناحية الأمان كيف تشابه المدن الغربية الكبيرة وربما تصنف من قبل البعض على أنها أكثر أمننا من بعضها أو أقل منها، ولكن أنصحج تاخذين حذرج من خلال تجنب السير في بعض الأزقة المظلمة والأماكن اللي يتجمع فيها بعض الشباب من حليقي الرؤوس (أتصور أن هالظاهرة موجودة في معظم العواصم الغربية الأخرى). حوادث النشل في كيف ربما تكون أقل من بعض الدول العربية، ولكنها قد تحدث أحيانا وخاصة في محطات الميترو. بتواجهكم مواقف مع الشرطة انهم بيطلبون منكم إبراز الجواز وبطاقة الدخول، فاحرصي دايما (أكرر دايما) ان يكون الجواز وبطاقة الدخول الاصلية معاج وين ما تروحين، في مرة شرطي خبرني انه يكفي يكون مع السايح نسخة من الجواز بشرط تكون دايما معاه النسخة الأصلية من بطاقة الدخول، بس آنه عادة أحمل معاي الجواز الأصلي احتياطاً لان حتى شرطتهم ما يتكلمون انجليزي الا شوي.
من ناحية المطاعم متوافرة على الشارع الرئيسي بوسط المدينة، وأكلها نظيف وتتواجد منها المطاعم الراقية، بس لاتتوقعين تلقين تنوع كبير في جنسيات المطاعم (يعني المطاعم الشرقية مب كلش متوافرة) ... اذا تحبون الوجبات السريعة ماكدونالز موجود بس عادة يكون زحمة. اذا انتي بتسكنين في مصحة علاجية، في بعض المصحات يوفرون وجبات بواسطة قائمة الطعام، ولكن معظم المصحات يلزمونج بثلاث وجبات في مواعيد معينة، وعادة يكون الاكل مخصص لكبار السن وطبعا مادام في مصحة لازم الأكل يكون صحي فتقدرين تتوقعين أن الوجبات مالت المصحات عادة ما تناسب ذوق الشباب.
من ناحية طبيعة الناس، الأوكرانيين شعب ودود وطيب (خاصة في المناطق الريفية خارج العاصمة كيف) وراقي في التعامل وينفرون من الأشخاص اللي ما يلتزمون بالطابور واللي يرفعون صوتهم أثناء الحديث في الأماكن العامة. بالمستشفى أو المصحة اللي راح تروحينها بتلاقين من الموظفين الترحاب والتعامل الجيد فلا تحاتين من هالناحية، واذا تعرفتي على بعض الناس ربما يعزمونكم على البيت أو طلعة شواء لانهم شعب كريم بطبعه (بس طبعا مهما كان مب مثل كرم العرب !!). فحاولي تتعرفين على الناس هناك لانهم اجتماعيين ويحبون التعرف على الثقافات الأخرى رغم ان اللغة راح تكون بالنسبة لج عائق كبير بس ما يمنع تتعلمين كم كلمة روسي لانهم يحترمون الشخص اللي يحاول يتكلم بلغتهم. من ناحية النظافة، فبصورة عامة يهتم الأكرانيين بنظافتهم الشخصية وخاصة النساء، والمرأة الأوكرانية مشهورة -بالإضافة إلى جمالها- باهتمامها الفائق بأناقتها وخاصة في المدن الكبيرة.
بالنسبة للأسواق موجودة بعض المحلات الراقية وبعض المجمعات اللي فيها الماركات العالمية، بس أتصور أن اسعارها مبالغ فيها شوي وقد تكون أغلى من نفس البضايع اللي عندنا. تتواجد بعض التحف الأوكرانية والألبسة اللي تمثل زيهم الوطني وهي قد تكون مناسبة لذوق الخليجيات، بس لا تتوقعين تكون أسعارها رخيصة مثل أسعار بعض الدول العربية. وبصورة عامة، من ناحية الغلاء كيف قد تقارب غلاء دولنا الخليجية (في بضايع أرخص وفي بضايع أغلى) بس فنادقهم تميل تكون غالية وأسعارها عادة ما تناسب مستواها.
أتمنى اني وفقت في عرض المعلومات اللي عندي، وربما يفيدونج الشباب -وخاصة الأخ كويتاوي- بمعلومات أكثر دقة ومحدثة أكثر من المعلومات اللي عرضتها.
أمنياتي بسفرة موفقة وسعيدة.

مرحبا اخوي ماقصرت والله كفيت وفيت يعطيك العافيه
انا ماراح السكن في مصحه وهاذا الي مضايقني انا لين الحين متورطه وين بسكن انا ابي العوائل الكويتيه او الاماراتيه او السعوديه او اي احد من عوائل الخليج

مادري ادا نظام المنتدى يسمح اني اكتب اسماء مكاتب سياحيه او لا .؟ لان الي اعرفه ممنوع ..
وحتى الخاص ماعرف ارسل عليه ههه

اخي كويتاوي مابي اسماء مكتب للسياحه ابي اعرف العوائل الخليجيه وين يسكنونون في اي شارع او شنو اس عمايرهم