موعد الذهاب يوم 8 /6 2010 جدة - سيريلانكا على الساعه 8 اقلاع والوصول 4 فجراً
والعودة يوم 18/ 06/2010 سيريلانكا - جدة على الساعه 3 اقلاع والوصول 6.30 مساءً
عشان موضوع وقت الوصول فكرت احجز يوم قبل تاريخ الرحله لأني سمعت إنو الدخول للفنادق الساعه 12 ظهرأ ايش رايكم ولا ممكن ادخل قبل 12 وبكذا مايحتاج احجز يوم قبلها؟
كم تتوقعو الميزانيه للرحله انا وزوجتي وطفله عمرها سنتين و خمسة شهور (فنادق 4 نجوم ومصاريف لنا)؟
وايش رايكم يكون معاي سواق طول الرحله ولا كل ما احتجت اروح منطقه اخذ تاكسي واتوكل على الله؟
السؤال الاخير والأهم انا عارف اني غثيتكم بكثر الاسئله لكن معليش تحملوني ايش رايكم اتفق مع مكاتب السياحه والسفر اللي فجدة على الرحله بفنادقها والسواق ولا من هناك افضل؟
انا بصراحه متخوف من حاجتين موعد وصولي سيريلانكا الساعه 4 اخاف يمكن تكون المكاتب مقفله والشي الثاني اذا قلي سعر غالي وكاسرت معاه لكن لازال غالي معناتو حنجبر اني اخذ من عندهم لأنو ما في اي حل ثاني؟
و اليوم رحت سويت الفيز في القنصلية السيريلانكية صراحه تعاماهم معايا كان جدأً راقي وفوق المحترم ببساطه تحس انهم مدلعينك اخر دلع، غلطت فتعبئة الاستمارة عندهم اخذتها الحرمه اللي عندها الفيز وعبتها لي من اول وجديد هي تسأل وانا اجاوب الين ماخلصت صكت الختومات على الجوازات في ظرف 6 الى 7 دقايق لا وبعدين أسألها ايش الأماكن الحلوه في كولومبو فقالتلي كم اسم عاد انا قلت بجاملها واكتب معاها اسامي الاماكن اللي ماني عارف اكتبها معاها لأن نطقها للأماكن صعب شوي قامت اخذت الورقه اللي كنت احاول اكتب فيها وهاتك ياكتابه وبعد ما كتبت جاها تلفون هرجت شوي الا واتذكرت مكان قالت للشخص الي في التلفون جست مومينت الا وهي تقول لا تنسى تروح حديقة الحيوانات وكتبة اسمها بعدين جانا الرجال اللي كان في المكتب الثاني وعطاني دليل لسيريلنكا بالعربي وبالصور صراحه الله يجزاهم خير على تعاملهم الحلو ، انا دخلت وكان على بالي تعامل القنصلية الايطاليه مع المسافرين قبل ثلاث سنوات اللي شوي وينزل يتضارب معاك برا لكن شفت العكس تمامً قلباً وقالباً.
عساهم يارب كذا حتى فبلدهم