اخي ابو لين امل ان هذا الرابط يفيدك.
http://www.expedia.it/pub/agent.dll?qscr=dspv&&itid=&itdx=&itty=new&from=m

شكرا اخي saud00 وماقصرت لكن لم اجد ماابحث عنه مثل المسافه والموقع وكم يبعد عن الشانزليزيه وهذه طبعا محتاجه شخص يكون عارف المنطقه
شكرا لتواصلك و تحياتي لك

حبيبي أبو لين ..
أبشر يالغالي ..
عطني شوية وقت .. وأجيبلك خبره الليله ..
بس أنتهي من إللي بيدّي .. وماتنام عينك الليله إلا والمعلومات اللي تبيها عندك بإذن الله ..
أخوك .. اللندني ..

شكرا اخوي اللندني وهذا هو العشم
وعلى اقل من مهلك كفايه اني في بالك يالغالي
تحياتي

بو لين ....
تريد الصراحة ؟؟؟
الفندق دون المستوى ... نجمتين والمكان لك عليه ....
اذا تريد الأحساس بأنك في باريس خل السكن قريب من منطقة الاوبرا ... الكونكورد .... مادلين ... متحف ريفولي ... أو الشانز .....
هذه المناطق اذا سكنت فيها بتحس انك صدق في باريس .... بالنسبة لي ادفع زيادة و خذ لك مكان ممتاز .... لأن السفر مب كل يوم .
مجرد رأي ...

شوف يا عسل ..
هالفندق موجود بمنطقة 19 .. شمال شرق باريس .. بحي مرتّب إسمه Belleville .. وفيه طابع الشوارع الباريسية التقليدية .. (وهذا الشي يخبّلني) ..
بس ترى ماحولك أحد .. لا الشانز .. ولا أي معلم من المعالم المشهوره .. ولا عربنا .. وهذا أزين مافيه ..
لكن .. إن بغيت نصيحتي .. (فيما يخص الموقع) .. توكل على الله وأسكن فيه .. أنا مع أي سكن يكون بعيد عن عربنا .. يعني بعيد عن الشانز .. ياخوي لامنك سكنت عند ربعنا .. تصبح وتمسي على وجيههم .. ولا كأنك سافرت ..
وخلها فبالك دايم .. كل مابعدت عن الشانز .. كل ما صار كل شي أرخص .. السكن والأكل .. وكلش ..
أنا تراني مانيب بعيد عنك .. سكنت في المنطقه إللي شمال شوي من منطقتك .. يعني بالعربي .. بعيد عن الشانز وعن كل شي بعد .. بس يعلم الله إني كنت مستانس ومرتاح ..
المترو ياحبيبي ماهو مقصّر .. يربط لك كل أطراف باريس .. من شمالها لجنوبها .. ومن شرقها لغربها .. ورخيص .. بس يبيلك تتحمل بعض الغثا ..
وإن بغيت تستخدم التاكسي .. ماراح تزيد تكلفة التوصيل للشانز عن 10 او 12 يورو .. انا كنت ادفع حول 16 يورو من اوتيلي للشانز ..
سويتك لك سكان لخريطه عندي .. وحاولت قد ما أقدر إني أبين لك موقع فندقك في باريس .. وبعده عن قلب باريس .. الشانزيليزيه ..
الخريطة الأولى ..
تبيّن لك موقع أوتيلك (بالسهم الأحمر) وبعده عن الشانز (بالسهم الأخضر) ..
الخريطة الثانية ..
نفس مغزى الأولى .. بس مقرّبه أكثر ..
الخريطة الثالثة ..
هذي طال عمرك المنطقة اللي فيها أوتيلك .. مقرّبه جدا ..
وإذا حبّيت تستخدم المترو للوصول من أوتيلك للشانز ..
إركب المترو رقم 11 من محطة Jourdain أو من محطة Place des Fetes بإتجاه Chatelet
وخلك فيه إلين توصل محطة Hotel de Ville ، إنزل من هالمترو وأركب مترو رقم 1 بإتجاه La Defence
وخلك معهم لين توصل وحده من عدة محطات (كلهن بالشانز .. الشانز طويل) ..
بس أفضل محطة تنزل فيها .. يا Franklin D. Rosvelt أو George V
بالنسبة للمترو .. أنا قد وعدت إني أكتب شرح تفصيلي وبالصور لكيفية إستخدام المترو في باريس ..
وأنا إن شاء الله عند وعدي .. بس ألقالي وقت ..
وإذا مازال عندك أي إستفسار .. أسأل .. وأنا حاضر ..
أخوك .. ومحبك .. اللندني ..

اختي العزيزه الأخت سفريات شكرا لك المرور والافاده وماقصرتي
بالنسبه للفندق هو ثلاثه نجوم وهو عباره عن غرفتين وصاله وحمام ومطبخ متكامل وهومن الانترفال ب5000 ريال للاسبوع وانا لم اجد معهم سوى واحد في ديزني لاند وهذا هو الثاني000ولان الاول نصحوني به ان الاسبوع كله اخذه علشان يوم للديزني لاند حرام,،، ولكن دا معقول وجديد وقريب بحوالي 10 دقائق من كل معلم من المعالم 00ويوجد تحته سوبرماركت وكل المتطلبات اليوميه بناء على كلامهم000
والحياه تجارب
شكرا لتواصلك ولاعدمتك
تحياتي ابو لين

اخي وصديقي وعزيزي اللندني يعجز اللسان عن التعبير لك عن كل ماقدمته لي من افادات ومن نصائح
ومن ارشادات
ياأخي قلي ايش اقول اوايش اسوي ادخلك من النت علشان بس امسكك واهريك بوس
بصراحه كده خلاص مافي اي سؤال بعد كده لانك اعطيت ووفيك جزاك الله كل خير (خايف اقول زياده تقول قلبها شحاته) يالله ياعبدالله ويا هلا وليان ولين اشكروا عمكم اللندني :x1: :x1:
تحياتي لك من الاعماق وتم طباعة ليس الخرائط فقط بل جميع كلماتك الرقيقه والمفيده
ولم يبقى لي سوى اكمال الدروس الفرنسيه

يا حبيبي يابولين ..
أنا أعطي كل ماعندي .. لكل الأحبه بهالمنتدى .. وأخلص في البحث عن المعلومه المفيده ..
وهذا ديدن الجميع هنا ..
وإذا حبّيت تاخذ تفاصيل أكثر عن أي شي .. أنا بالخدمه ..
وهذا الكلام لك .. ولأي أخ وأخت بالمنتدى .. ما راح أقصّر بأي معلومه لأي بلد زرتها .. مو بس باريس ..
الله يحفظلك اولادك وبناتك .. وأمهم .. وأسأل الله لكم رحله حلوه وسعيده وموفقّه ..
أختي الغاليه .. سفريات ..
كلامك مليون بالميه صحيح .. وبمكانه ..
ولي تعليق عليه .. بس مايسعفني الوقت هالحين .. تعبت .. أبي أنام ..
بس الليله إن شاء الله .. راح أوضح لك .. وللجميع .. وجهة نظري بكلامك .. الرائع ..
أخوكم .. وحبكم .. اللندني ..