1. السلام عليكم جميعا ,,

السلام عليكم جميعا ,,

احب ان اشارك الجميع رحلتي الصيفيه المالديفية الرحلة كانت على الخطوط الجويه الاماراتيه اخذنا باكج شامل تذاكر سفر على الدرجة الاولى + الاقامة في منتجع الفورسيزن لاندا قيرافارو (( الفور سيزن الجديد)) 4 ليالي مع المواصلات الطائرة المائيه + الاقامه في دبي 4 ليالي في فندق الانتركونتيننتال فستيفل ستي
اقمت ليلتين منفرديتن في المالديف في فندق خارج الباكج وهو بنيان تري لكن تقلصت المده الى ليله وحده و الاسباب سوف اذكرها فالتقرير
اوقات الرحلة الى المالديف كانت صعبه شوي يعني كان لابد يكون فيها تعب مع ان الرحلة قصيره يعني لازم يصير في الساعه 3 الفجر مثلا كان في خيار ان نطلع من البحرين الى دبي 3:50 فجرا و بعدين10:20 دبي مالي او تطلع من البحرين 5:50 دقيقه مساء و تطلع من دبي 3:25 يعني فالحالتين مافي نوم فقررت اطلع من بيتي هالوقت ارحم
طلعنا للمطار الساعه 2:30 بعد ما طرشنا الشناط قبلنا عشان نرتاح اكبر وقت ممكن فالبيت
على عادتها طيران الامارات طارت على موعدها و عندهم نظام جديد مسوينه عشان رحلات المتابعه البوابه تغلق قبل 35 دقيقه و لا يقبل الصعود للطائره قبل 15 دقيقه من موعدها عشان تطير في موعدها ورحلات المتابعه ما يتبهدلون و الصراحه هالشي عجبني
صعدنا على الطائرة و كنت كل شوي اطالع الشباك و اشوف الشمس وهي تطلع شوي شوي و الصراحه كان منظر حلو

وبما ان الرحله مدتها قصيره ما ان اقلعت الطياره الا قدمو لنا وجبة الريوق (( الافطار بما تسمونه))

وصلنا دبي و توجهنا لقاعه الدرجة الاولى و النوده ضاربه حدها لكن بعد ما نمت تمسكت عشان ماحب انام الا بالطقوس يعني اكون مرتاحه ههه و مستقره
القاعه حلوة و كبيره و مرتبه و موجوده في مبنى خاص لطيران الامارات في مطار دبي الدولي فيها جميع انواع الجلسات و الاطعمه غير المطاعم والكوفي شوبات تحس كانه مجمع ماهي قاعه

و بعد انتظار نادونا للصعود الى الطائرة ,,, اووف ما بغينا بصراحه تعبت و اول ما طلعنا من القاعه ,, قمت ادور البوردنغ كارد ما لقيته اسال زوجي وينه يقول مادري بغينا نجن اتاريه نساه يوم ينسدح بالكرسي قبل لا يروح للبزنس سنتر و يقعد على النت ورجعنا ندوره ما لقيناه قلبت جد الطياره عقب دقايق و البوابه بعيده ,, قلنا لموظفة الاستقبال كلمت الطياره عشان تخبرهم اننا جايين و طلعت لنا بدالهم و قالت لي هالمره حطيهم في شنطتج
ركبنا الطياره بعد طول عناء و ضغط اعصاب وقلت الله يستر بس
بعد ما طارت الطياره نمت و ما قدرت اكابر بس للاسف نمت الا ساعتين بس احسن ما ماميش ,, بعد شوي بدأت الطائرة الهبوط التدريجي و ابتديت اشوف الجزر و الماايا و الهوى

اخيرا حطت الطائرة وكانت درجة الحراره 28 ,, بصراحه اول مره اسافر منطقه شرق العالم تعودت اصيف في ديره ابرد من كذا بس هالمره حبيت اسويها ديرة استجمام و راحه يعني ابي شي غيرنزلنا المطار وشفت النرسات متلثمين و يعطونا ورقة و هذه آثار فلونزا الخنازير ذبحونا ههه حتى فالمالديف و هذا اللي خلانا نتوجه للمالديف عشان مكان مفتوح وما فيه مشاكل صحيه ولا فلونزا و لاوجع قلب
بس كان كل اللي يبونه ورقة تمليها اذا حد يكح او حد فيه مشكله صحيه و رقم الرحله و خلاص يعني دقايق و طلعنا من المطار البسيط و لقينا مندوب الفندق ينتظرنا واخذنا فالسيارة الى مطار الطيارات المائيه اللي يبعد بالسياره دقايق عن مطار طيارات الهوا
و للتقرير بقية ,,,,,,,,