قهوة عربية
27-08-2022 - 06:40 am
السلام عليكم
يامسلمين ياالطيبين ....العنوان واضح وين ألقى مطاعم حلال في ادنبره
أمس وقبل أمس طلعت عيوننا واحنا نفتر وندور ....وآخرتها بيتزا هت ( مارغريتا ) اللي هي جبن وطماط فقط
كل شي يخرع عندهم مو مثل لندن تلقون ألف مطعم حلال
حتى البرغر كنج والماكدونالدز ينخاف منهم
أمس شفنا خوش مطعم وشكله راقي ...قلنا خل ندخل ونسأل
سألت القرسونة قلت لها مانبي أي نوع من اللحوم ....وحتى الأكلات والشوربات ...مانبي فيها أي نوع من البورك والهام والبيك ....الخ
اشرت على صنف وقالت هذا سي فوود ( أكل بحري) .....استانسنا وقلنا خووش شي
يللا نقعد ونطلب ...فجأة سألتها حتى الكحول مانبي ...جان ترد على وتقول هذا السمك حاطين فيه قليل من الكحول حتى يعطيه طعم حلو :112:
سيدا طلعنا من المطعم وآخرتها مثل ماقلت لكم بينزا مارغريتا
صار لنا اليوم ثالث ناكل بيتزا مارغريتا ...طبعا معاها سلطات وبطاط ودجز
بس نبي أماكن ثانية
رحنا أمس الستيشن وأخذنا توست وأجبان وخيار وطماط ...من ماركس سبنسر وسوينا العشا معكرونية
واللي يعافيكم اللي يعرف أماكن ومطاعم يدلينا وله كل الأجر
واللي يعافيكم عقبها بنروح البحيرات ( وندرمير ) ...اللي يعرف بعد مطاعم يقولنا بارك الله فيكم كلكم
غريبة ثلاث أيام في ادنبرة ولا شفت Central Mosque مسجد الملك فهد في الستي سنتر !!
المسجد واضح ومعروف قريب من الرويال مايل وستجد عند المسجد المطاعم الحلال وكذلك المحلات التي تبيع اللحم الحلال
رحلة موفقه ..