السلام عليكم و رحمة الله و بركاتهاولا انا سعودي و كنت في رحلة سياحية لدولة قطر مع زوجتي.
كنا في فلاجيو مول امام مكاتب بيع تذاكر السينما و بعد قص التذاكر جانا واحد مصري الجنسية و قاعد يتكلم انو تفضل معانا يا باشا انتو واضح متزوجين قريب و حبيت اعملكو هدية و احنا العادة نسال كم سوال و اذا جاوبتو صح بتاخذو جائزة بس انا حبيتك يا استاز و حديك الجائزة على طول و كتب رقم تذكرة السينما و معلوماتي و قعد يسال وين بتحب تسافر و المدام وين تحب تسافر و يدينا كلام معسول و كذا.
و بعدها قالنا خلاص انتو تشرفونا بكرا مكتب شركة جولدن جيت احنا عاملين حفل افتتاح و هيا شركة كبيرة و بالمناسبة دي منزيلين جوائز على رحلات سياحية و اجهزة كهربائية و كوبونات خصومات لفنادق و مطاعم ...الخ
انا صراحة انبسطت من الكلام اللي قاله يعني وضعي المادي جيد تقريبا لكن عندي التزامات الزواج و اقساط بنك و اقساط سيارة و جاتي فرصة رحلة مجانية !!! صراحة كنت مبسوط جدا و زوجتي كمان نفس الوضع.
المهم كان الموعد في مبنى الخليج للتأمين مقابل البنك العربي في شارع حمد الكبير الساعة 1 ظهرا يوم السبت 25/4/2015 .
رحنا ع الموعد و بعد تقريبا خمس اتصالات من نفس الشركة تصر على الحضور.
لما وصلت كتبو بياناتي من جديد و قالي انتا حتشرفنا لمدة 90 دقيقة !!! ما كان الاتفاق كذا في المول ؟؟
قلت ف نفسي نسمع ايش يقول ما ورايا شيء ونا جاي اتفسح اصلا.
طبعا اللي كانو موجودين تقريبا 12 شخص كلهم نفس وضعي و كل عائلة معاهم واحد بيتكلم معاهم عن عروض الشركة (جولدين جيت للعقار).
بدا الاستاذ بيتعرف عليا وين اشتغل و كم عمري و الهواية و شوية مزح و من الكلام ذا.
المهم دخلنا في الجد بدا يعرض ليا عروض الشركة انو اتملك شالية في قرية سافانا شرم الشيخ لمدة 50 سنة بمبلغ بسيط و يكون ليا اسبوع كل سنة مجانا يكون حجز الشالية قبلها ب 45 يوم
و عندي 6 اسابيع غير الاسبوع ذا اقدر احجز فيها بمبلغ بين 500 دولار الى 1500 دولار في 100 دولة.
و قعدنيا تقريبا ساعتين لحد ما اقنعني جدا باللي يقوله و تم بيننا العقد على التمليك و ب مبلغ 44500 ريال قطري تدفع منه مقدم 12500 و الباقي يكون اقساط ميسرة لمدة 4 سنين.
قلت له انا ما املك الان المبلغ ذا قال مش مشكلة ادفع اللي تقدر عليه و كمل الباقي اقساط على 5 اشهر لحد ما تكمل المقدم و بعدها بتدفع باقي الاقساط الميسرة.
و دفعت له مبلغ 4000 ريال قطري و وقعت على كمبيلات ب باقي المقدم.
و طلعت من عندهم و معايا تذكرة لشرم الشيخ اللي هيا الجائزة و نا مبسوط
وصلت السعودية قلت خليني اسال و اشوف ايش وضع الشركة دي و طبعا زي ما شفت للاسف اغلب الناس في المنتديات يقولون اهم نصابين.
و الان ابغى انفذ بجلدي لكن للاسف في بند في العقد بيقول اذا جيت افسخ العقد لازم ادفع 35% من مبلغ العقد كامل.
و هنا انا تورطت ولا اعرف وش اسوي و قلت اطلب فزعتكم يا رجال.
و اسف على الاطالة لكن والله محروق من اللي صار و النصبه اللي اكلتها.
و شكرا على مروركم و ارجو المساعدة.