افضل طريق الرياض الهفوف سلوى البطحاء, المسافه حدود 1100 كيلو
لازم تغيرين العمله

1. كم ميزآنية البنزين بآلطريق .. يعني تقريبآَ كم تكون ؟؟

و عليكم السلام و رحمة الله و بركاته
هلا غرامي دبي .... عسى إن شاء الله أقدر أفيدك و تلاقين الإجابات الشافية لإسئلتك بحكم إني توني راجع من دبي و كنت رايح عن طريق البر بالسيارة من الرياض:

كم ميزآنية البنزين بآلطريق .. يعني تقريبآَ كم تكون ؟؟

الميزانية تعتمد على نوع السيارة .. و موديلها .. فالسيارة الجديدة بالتأكيد إستهلاكها للوقود أقل من السيارة القديمة
بس بالتحديد مثلاً أنا سيارتي جمس و كلفني البنزين حوالي ال 180 ريال تقريباً من الرياض لين دخلت دبي و طبعاً لا تنسون البنزين غالي في الإمارات يعني أنا أعبئ الجمس بالكامل بنزين 91 ب 45 ريال هنا بالسعودية وفي دبي كنت أعبئ ب 110 درهم..... و يكفني من 3-4 أيام
واللي فهمته إن فيه آكثر من طريق ... ودي أعرف المسآفه بين الريآض ودبي وكم نآخذ وإحنآ نمشي
صحيح في أكثر من طريق واحد عن طريق الخرج - حرض - منفذ البطحاء ... و هذا ما أنصحكم فيه نهائياً طريق خطير لإنه طريق سايد واحد و كله تريلات ... و رمال متحركة و كل اللى سلكوه ما يمدحونه أبداً ... فتجنبوه
أما الطريق الثاني فهو عن طريق الهفوف .. يعني تطلعون من الرياض ... و تأخذون طريق خريص و منها للهفوف .. منفذ البطحاء الحدودي السعودي و بعدين تدخلون الإمارات ..... الطريق من الرياض إلى الإمارات سايدين و ممتاز
طبعاً المسافة أنا حاسبها من بيتي بالرياض إلى موقف الشقة بدبي بالضبط 1080 كلم أما المدة بالساعات فهذا يعتمد على الممشى بس تقريباً 10 ساعات ... و الأفضل تقسيم الرحلة على مرحلتين و أنا مجرب هالشئ
أمشى مثل العصر أو المغرب من الرياض و أبات في الإحساء و الفجر أمشي للحدود و أوصل دبي على الظهر أفضل وقت للوصول علشان الواحد يرتاح و يستمتع بباقي اليوم في دبي ...
ألحين نآس رآحو لدبي يقولون الريآل نفس الدرهم
لا فيه إختلاف بسيط في الصرف ... يعني ال 100 ريال سعودي تساوي 98 درهم .. تقريباً و تغيير العملة لابد منه و هالشئ سهل محلات الصرافة منتشرة في كل مراكز التسوق في دبي ....
و نحنا بالخدمة لأي سؤال أو إستفسار عن دبي ....
تمنياتي لكم برحلة سعيدة ...... الراهي

السلام عليكم اولا الطريق الامثل الهفوف-سلوى-البطحاء-الحدود الغويفات-الى دبي1400كم
العملة 1ريال 80فلس اماراتي
بالنسبة للبنزين ماله خوف عبي 200ريال ويكفيك لدبي

كل يوم دبي
هلا أخوي كل يوم دبي ... معليش بس فيه ملاحظة :
الى دبي1400كم !! أنا قبل 3 أسابيع كنت بدبي أخذ مني الطريق بالضبط من بيتي بالرياض إلى موقف الشقة بالمرينا 1080 كيلو بالضبط و الرجعة فرقت 20 كيلو متر فقط موقف بالبيت و كان العداد 1100كلم
العملة 1ريال 80فلس اماراتي !! كثير سعر الصرف السعر بالضبط 975. فلس لإني كنت أصرف ال 1000 ريال ب 975 درهم بس لو 80 فلس كان رحنا فيها بيصير ال 1000 ريال ب 800 درهم ,,,الفرق 200 درهم كثير !!

أولا الشهر مبارك على الجميع سواء صاحبة الأستفسار ام من عقب عليه من الأخوان !!!!
ثانيا : انى ارى ان اخي الراهي ما قصر عطاك الحلول الأمثل و ارهى عليك بالمعلومات
انا عني من وجهة نظري الخاصه و روحاتي ورداتي الي آخرها قبل رمضان ب 10 ايام تقريبا !!!
اجيب عليك كالتالي :
بخصوص البنزين في السعوديه مافيه مشااكل كل ما خلص عب وماشاء الله كأنه ببلاش
مقارنه بدبي الي دبل السعر وفوقها حبتين بعد :5rm6z:
وانتم و حبكم للفررفره انا على كثر فرفرتي وما اتوقع مافيه كاميره ما اخذت لي صوره بدبي
ما تتعدى ميزانية البنزين 900 ريال من الرياض حتى ارجع لها وعلى حسب جلوسكم هنااك ....
أما الطرق فأنا ما اخذ الأ طريق الريااض - الخرج - حرض وصولا الى منفذ البطحاء تقريبا الى دبي 1000 كيلو..
وهو سيد واحد ومليان شاحنات و احيان فيه رمال تغطي الخط لكن اذا بتمشوون نهار عادي بس ليل لا !!!
روحو على طريق اخوي الراهي .....
بخصوص الصرف!!!
ماراح ازيد لكن اصرفو من محلات الصرافه الي بالبنوك بعد ما تأخذون كاش من هنا افضل لكم !!
ولا تصرفون من المنفذ لأنه اقل من محلات الصرف ......
غير كذا ترى الدنيا تساهيل شغلوا وكأنكم رايحين ل جده يعني مافيه مشاكل ان شاء الله ....

اهلين انا بالنسبه لي اروح دايم من الرياض الى دبي بالسياره ولا استخدم الا طريق حرض لانوه اقرب صح هو خطير شوي بس يعتمد على الوقت اللي تمشي فيه انامشيت فيه بكل الاوقات ومالقيت الا احسن وقت بعد الساعه وحده مافيه تريلات ابد وتقطع كل الطريق الخطر قبل الفجر وتوصل علي الساعه اربع ونصف الحدود ولاهو الطريق بالخطوره اللي ياصفونها الناس وبالنسبه لبنزين حسب نوع السياره لماتعبي فل بالرياض ولازم تعبي بالمحطة اللي قبل الحدود بمتين كيلو وبعد كذا عبي بالحدود لانوه السعر البنزين ارخص بالسعوديه وانا كان معي جيب باترول كنت اعبيه كا ثلاث او اربع ايام

مشاء الله الاخوان ما قصرو بالردود عليج اختي
بس بالنسبه للصرف تراه مب فرق كبير ال100 ريال عن 99 او 98 ردهم
ومايحتاي انج تخافين من الصرف لان محلات الصرافه الكبيره موجوده في المولات ,,,مثل الانصاري للصرافه ورضا الانصاري للصرافه وبعض البنوك المعتمده موجودين في اغلب مولات دبي

1. س-ألحين نآس رآحو لدبي يقولون الريآل نفس الدرهم

حياك الله ياعزيزتي راح اجاوب عن جميع الاسئلة ولا يهون اخي الفاضل الراهي كفا ووفا لكن زيادة الخير خيرين
س-كم ميزآنية البنزين بآلطريق .. يعني تقريبآَ كم تكون ؟؟
ج-ما ازود عن كلام الراهي الا حبتين يكلف البنزين من 100 الى 200 واكثر من 200 مافيه
س-واللي فهمته إن فيه آكثر من طريق ... ودي أعرف المسآفه بين الريآض ودبي وكم نآخذ وإحنآ نمشي
ج- نعم هناك طريقين واحد اسمه طريق الخرج وواحد اسمه طريق الدمام الهفوف البطحاء وبمجرد التفكير في طريق الخرج ممنوع تفكرون فيه فما بالك تروحون معه وطريق الخرج مره خطر ولا ينفع للاشخاص الي معهم عائلة ميزتة واحده فقط وهو انه يفرق 100 كيلو عن طريق الدمام الهفوف ... وطريق الدمام الهفوف سهل وميسر سيديين يعني الطريق جديد وفيه محطات علمنانا من الرياض الى دبي 1100كيلو فقط فا اختي الغالية انا اصحكم تمشون مع طريق الدمام الساعه 12 ليلا يعني تطلعون من الرياض 12 توصلون باذن الله مفرق الامارات على 2ونص يعني قبل الدمام 150 اطلعوا مع المخرج وقبل المخرج عبو بانزين لنو فيه قطعه مافيها محطات تقريبا 250-280 كيلو وعقب كذا الطريق ميسر الين توصلون الحدود مع الامارات على الساعه 6 الصبح بمشية الله عقب ما تخلصون من الحدود فيه سوبرماركت على اليسار يصرفون فلوس السعودية يعني اختي تعطيهم 500 ريال يعطونك 485درهم طباع اصرفوا 500 فقط للطريق وعقب كذا كان ما تعبتوا واصلو الطريق الى دبي من الحدود الى دبي تقريبا 450 او فيه شقق عند الحدود ريحو الى العصر وامشو لانو طريق الامارات مره ميسر ورائع وفيه خدمات

س-ألحين نآس رآحو لدبي يقولون الريآل نفس الدرهم

ج- اختلاف بسيط يعني ياخذون منكم 15 فايدة من كل 500 ريال وانا اصحك فيه سوداني شغال في مصرف في مول الامارات طبعا المصرف ما فيه الا هو في المركز اصرفو فلوسكم من هناك لا نو الفايدة ما يخذ كثير واسلامي يعتبر من افضل المصارف الموجودة واصرفوا كل فلوسكم من عنده علشان ما ترجعون مره ثانية لمه
اتمنا اني افدتك طبعا التجربة هذاي كلها سويتها حرفيا مرتين انا وعايلتي ولا زلنا نتذكر روعتها هاذهي السفره وشكرا