السلام عليكم ورحمة الله
طبعاً قبل لا اسافر إلى اوزباكستان بحثت هنا عنها ولقيت موضوعين او ثلاثه ولكن نفس الصور
وشاهدت اعضاء تسأل عنها وعن كيفية السفر لها وبعض المعلومات عنها
حبيت اذكرها لكم باختصار واي استفسار انا حاضر وبالخدمه
طبعا عندي صور ولا اعلم كيف انزلها ولكن بالغالب هي نفس مواضيع الاخوان .. يعني صور الفندق .. مركازي اللي هو الشيراتون وبعض صور الفواكه والطريق إلى سمر قند ووصولاً إلى قبر البخاري وبعض الحدائق والنوافير
المفيد في السفر :
استخراج الفيزا ... من الكويت
هناك عدة طرق للفيزا ... والطريقة الوحيده حالياً او للي ما يعرف احد هناك
هو شخص هنا بالكويت يستخرج لك بطاقة دعوه + سكن في الشيراتون 3 ايام
الدعوه = 60 دينار كويتي
السكن 3 ايام = 75 دينار كويتي
هذا لازم اذا اخذت الكرت مال الدعوه من الشخص بالكويت ... يعني اجباري تسكن في الفندق ثلاث ايام .. طبعا السكن للشخص الواحد
بعد ما توصل التأشيرة ... تاخذها وتروح السفاره في منطقة مشرف .. وتعمل فيزا بنفس اليوم
الفيزا = 25 دينار كويتي
طبعا اللي يعرف احد هناك ,. اهو يطلبك بكرت زياره وهذي من غير المصاريف الي فوق ..
بعد هذا تضبط رحلتك إلى الامارات
الجمعة والاثنين من دبي ( الذهاب إلى طشقند )
الاحد والخميس من الشارقة ( الذهاب إلى طشقند )
طبعا انا اخذتها الروحه من دبي والرجعة إلى الشارقه .. حسب ظروف اجازتك
سعر التذكره من الامارات إلى طشقند = 2750 درهم ... طبعا بالمطار تحجز قبل الرحلة بثلاث ساعات من كاونتر الاوزبكية
يعني بالعربي
تحجز إلى الامارات قبلها بيوم او ساعات عشان يمديك تحجز حق طشقند ... يعني لازم تكون في المطار في دبي او الشارقه قبل الساعه 9 صباحاً بتوقيت الامارات ... احسبها ومخمخها على كيفك
الصرف :
0دولار = 185 الف سوم ويصل احياناً إلى 190 الف سوم ... طبعا بالفندق والبنوك 150 الف سوم
الوجهة
0- 7 لغاية 12 - 8 - 2009
الكويت - دبي - طشقند - الشارقه - الكويت
وصلت دبي في الليل ومن بكرا الصباح ذهبت إلى المطار وحجزت تذكره على طشقند والرده تكون على الشارقه
وصلت طشقند العصر تقريبا ...
ذهبنا إلى الفندق ... والتاكسي اوصلنا إلى الفندق ب 10 آلاف سوم وللأسف لا مطارهم فيه بنك يصرف ولا خارج المطار واضطريت إلى البنك داخل الفندق وكان الصرف بوقتها 151 الف سوم
سكنت ثلاث ايام ... في الشيراتون فندق حلو ونظيف وكويس لكن فيه عيب الله يعينك على التكييف .. لأني غيرت ثلاث غرف وبالموت حصلت غرفة بارده
الجو هناك معتدل لكن تحتاج تكييف بالنهار
3 ايام في الفندق وبعدها ذهبت إلى سمر قند التاريخية يومان ورجعت إلى طشقند لانها الافضل على الاطلاق وسكنت في شقة في ارقى منطقة عندهم واسمها الاستقلال ... يسمونها في الاوزبكية --- مستقليك او مستقلي
كنا على موعد للذهاب إلى تشرواك ... نطلق عليه نحن شرواك
هو منتجع في الجبل فوق حلو وفيه فندقين وهناك شقق وفلل لكن الوقت ضيق عندنا وما رحنا .. ان شاء الله الرحله القادمة
وايضا منطقة بخارا وخوارزم جميلة وتاريخية .. ولكن انا انصح في العاصمة لأنها هي الافضل
للعلم الدولة متخلفه عن العالم .. يعني لا ماكدونالدز ولا كنتاكي ولا هارديز كله شغل محلي
المباني من الخارج قديمة ولكن من الداخل جميلة جدا
المدينة تشبه سوريا في المباني ويمكن سوريا افضل منها بعد
هناك مطاعم عربية .. واشهرها الدولفين .. لصاحبه سوري وعراقي وفيه كبسات على كيفك وشيشه
اهم شي بالديرة شي واحد
الامان ... امينه لدرجة كبيرة والله انه نطلع بالليل والصبح والفجر ولا احد يكلمنا
وهذا اهم شي عندهم
دولة مسلمه بالغالب والتحية الرسمية عندهم هي السلام عليكم
السكن
السكن حنا بعد الفندق سكنا في شقة بحدود 110 دولار لليوم .. طبعا حنا اربعه يعني قسم على 4
غرفتين وصالة ومطبخ وحمام
وهناك شقق 3 غرف وصاله ولكن الاغلبية مافيها تكييف ...
وهناك فلل وبيوت جميلة وايضا الغالب مافيها تكييف .. يعني تتعب حبتين على ما تحصل فله او بيت بتكييف
لكن بيوتهم والفلل والشقق جميله جدا جدا
يعني انا شفت شقة دورين ... وفيها حمام سباحه وسونا وبخار وغرفة تنس طاولة هذا بالسردان
والدور الاول غرفتين نوم وصالة كبيرة جدا ومطبخ وحمامين
بسعر 150 دولار لليوم
انا انصح بالفله لأن هناك فلل بالتكييف = 200 دولار باليوم مع الشغاله
الشي المهم اللي لازم ما تنساه وتعمله الف حساب
ورقة تسجيل السكن
لازم بكل مكان تسكن .. تعمل رجستريشن ..
يعني تسكن بالفندق .. بعد ما تطلع يعطونك ورقة بالجواز انك ساكن من التاريخ الفلاني إلى الفلاني
وايضا الشقة والفله ... تشرط على صاحب الشقة انه يسجلك بالشرطة .. ويعطيك بالجواز ورقة او ختم انك ساكن بالفترة هذي عنده .. والا سوف تدفع غرامة تصل إلى 500 دولار واكثر
احرص جدا على التسجيل بكل مكان تسكن فيه
لتسكين السكن تقريبا من 30 دولار إلى 50 دولار للشخص
كما ذكرت مطعم الدولفين .. هناك بنفس الشارع مقاهي .. منها مراكش .. وجنبها عدة مقاهي حلوه
الاكل عادي جدا .. يكفي انه حلال يعني اي شي تاكله عادي ..
نحن معانا عزبة طبخ يعني مو محتاجين الاكل منهم
الاسعار رخيصة جداًُ
يعني تذهب من الفندق إلى المقهى ... الفين سوم بالكثير 3 الاف سوم
الالف سوم يعادل تقريبا 180 فلس .. يعني ولا شي
فلوسهم كثيرة جدا .. وتتأذى في حملها معاك لذا حاول تصرف كل يوم 100 دولار لمصروف اليوم فقط
حنا اربعه ... باليوم نصرف 100 دولار .. شامل التاكسي والمطاعم والمقاهي وكل الامور لاننا اربعه
اذا بتروح سمرقند .. تاخذ تاكسي واشرط عليه بالتكييف تقريبا من 80 - 100 ألف سوم
هناك حدائق بسيطة جداً ما ترتقي للسياحه
والعرب هناك قليل جدا جدا يعني بوقتنا حنا يمكن 15 عربي سائح بس
فيها بلياردو في مكان اسمه الدبلومات .. وايضا بولنق
مافيها مولات ومجمعات ترتقي للتسوق ولكن فيها اسواق شعبية كثيرة وانا اشوف ان البضائع هناك ممكن نفس الكويت او اغلى بعد .. يعني شغل تايلندي وهندي وفيه تركي واوزبكي
اشهر شي عندهم الفواكه
واحلاها التوت البري والبطيخ والرقي
هذا اللي عندي واللي يبي اي شي انا حاضر واذا يبيني اضبطه هناك في واحد يضبط له سكن ويستقبله بالمطار ويكون تحت امره انا حاضر