1. 6-كيف طاردني العسكري المسلح بالسفاره


2. والان التفاصيل:


3. السؤال الاول: وش تبي تدرس ؟؟


4. يعني : ابي وظيفه زينه وراتب زين بالمستقبل

اخواني واخواتي الاعزاء ..........
احببت ان اشارككم بتجربتي بالسفاره الامريكيه لتعم الفائده ..
سأضع بعض الملاحظات والنقاط واعلق واحدة تلو الاخرى ليرى كل شخص مايمكن ان يفيد دون ان يقرا الموضوع كامل حفاظا على وقته.
ملاحظاتي:
1- اول مره اشوف حقين البشوت ماسكين سرا مع الناس
2-اول مره اشوف شباب لابسين لبس غريب جدا كأن الفيزا يعطونها على اللبس
3-صحيح صدق اللي قال بعض الناس مايصدقون انهم يمسكون سلطه على خلق الله
4-مقابلتي مع موظفة تشييك الاوراق والسيفيس ولخمتها فيني
5-مقابلتي وماهي الاجابه التي اجبتها وحصلت على الموافقه على الفيزا بعد مقابله لمدة خمس دقائق فقط

6-كيف طاردني العسكري المسلح بالسفاره

والان التفاصيل:

1- العادة ياشباب اللي نعرفه ان الناس حقين البشوت ماشاء الله اصحاب نفوذ قوي جداو واسطات تكسر الصخر ولا لا ...ماعلينا ...المهم انا ماسك سرا مع خلق لله والظاهر ان اول واحد دخل حي السفارات ذاك اليوم هو انا (نايم قدام البوابه من اساعه ثلاثه) المهم دخلت اول واحد وياله وينك يالسفاره واول دوار والثاني والثالث وطق وانا بالمواقف ...المواقف فاضيه الا من كم سياره ..رايح وانا عارف ان ماقدامي احد قمة الثقه ...... واروح للسفاره امشي 3 سم بالساعه (واثق) ويوم وصلت واشوف بياض وسواد وزراق من بعيد وادعس قلت مابدهاش الدعوه فيها ان (يعني في شي) اروح والقى امه مجتمعه مدري من وين دخلوا الكلام هذا الساعه 6.15دقيقه صباحا حسب توقيت السعوديه قلت افا بس الحي انا اول واحد داخل مع البوابه ومستانس لقيت الامه قدامي متكيه وماسكين سرا المهم وقفت مع الناس وبدأت الركبان تتافد لسرانا وكل ماله السرا يمط لين وصل للمواقف رجالا ونساءا كبارا وصغارا بينما نحن ننتظ واذا بي التفت واجد شخص باين عليه انه من حقين الادوار العليا ( يعني علية القوم ) وواقف على جنب ويمشي بكل ثقه ومعه مرافق له الى ان وصل الى الرسيبشن قلت حتى هينا في واسطات (بغيت اهون ولاادور اسطه يرسلون لي الشهاده من هناك بدون ماروح) المهم وانا اسولف على نفسي هالسوالف واسمع الرجال يشر على السرا اللي حظرتي واقف فيه ويتكلم مع الموظف واذا به يعود منكسر الخاطر (يعني ردوه وقالوا له امسك سرا مع الناس )انا توقعت ان يبي يعصب وانا وانا وانا تمسكوني سرا وبيطلب قوات التدخل السريع يفزعون له لكن ....لكن .......لكن ..هذا اللي يسوه علينا حنا بس اما غيرنا لهم الاحترام والنظام (عقدة الخواجه ماكلتنا اكل ) المهم ويرجع الرجال ماوقف مع السرا وقف عند الشجره البعيده هو والي معه وانا دخلت ويوم طلعت ماشفته وش صار ماصار مادري .
2-انا ماسك السرا وجايب معاي جريده اقطع الوقت فيها (مسوي مثقف وحق جرايد)وكل شوي اتلفت (من اللقافه) يمين ويسار اشوف العالم وهالامه المجتمعه شكيت اني برا السعوديه او برا الكره الارضيه لولا بعض الشباب اللي ماشاء الله عليهم بثياب وعاقلين ولا ببدل محترمه وملابس انيقه ماشاء الله كل ماتلفت اشوف ناس اقول انا بالمريخ وبعدين اشوف الانيقين اقول لا انا بالرياض وبالارض ...ياناس بعضهم لبسهم غريب والله ماتشوفه حتى بالام تي في لا الهنديه ولا الانجليزيه يمكن لو نزلوا ام تي في مريخيه نشوفه... ملابس كنها خيام ملابس كنها تلزيق ومفتحه من فوق وتحت ويمين ويسار حتى الاجانب مايلبسونها(تراي رايح وشايف )والشعر حاجه غريبه كن الواحد منهم مطلع راسه مع شباك السياره وماشي 2000 ك م بالساعه ومار على شحمه قبل مايجي وماخذ واحد سوبر شل عالي اللزاجه وكابه على راسه مع السيفون ...لكن قلت يمكن انت ماتدري هذي الموضه
3-اه ه ه من حقين الرسبشن (نفوسهم ليش خايسه كيذا ) تكلم الواحد ولا يشوفك انا اقترح يحطون مجاهر الكترونيه عند حقين الرسبشن اللي برا علشان يشوفونا يمكن حنا الكترونات بعيونه رقمها الذري ماينس 80000 ........علشان كيذا انصح كل زاحديروح معه اواقه كامله ومعاه موعد ولايتكلم معاهم ابدا يروح يقول رقم الموعد ويمشي بس ولايحتك معاهم (علشان مايجي واحد عربجي ويسوي معاهم مشكله بعدين ينتفونه بمدافعهم اللي هناك)
4- والله وانا ادخل واخذ رقم والقى ذاك الهندي المحترم (لازم سوف اوراق كويس ولا مافي كويس شوف هزا سوداني شوف اوراق انتى يالله سرعه ) والله وانا اوراقي ضامنها ومعبيها ومكلم الكونجرس مشيك معاهم خايف بعد هالتعب يردوني (قوي) المهم ويجي رقمي واروح للشباك حق التشييك وتقابلني ذيك المملوحه السمرا واعطيها الاوراق وتشيك والله واخذ واعطي معاها بالانجليزي اللي اعرفه (وتنلخم فيني وتقول هذا شكل سره مقطوع بلاس فيغاس اعلمكم بعد شوي وشلون )وعطتني رقم وقالت رح شخلل جيبك وعط الصندوق الدراهم ...قلت بس اللي تامرون عليه انتم تدللوا بس وش تبون دراهم - سياره - توصيله صورة 10في 10 ماعندي مانع بس خلصوني..... وادفع الدراهم واخذ رقم المقابله النهائيه (المصير المحتوم) .......نشوف كيف ؟؟ملاحظه (اللخمه بالنقطه الخامسه تتضح)
5- والله وانا اروح لصالة المقابلات واحتري رقمي واتلفت يمين ويسار كالعاده واناظر ولا في مجلات قلت افا ابي اروح اشري لي وحده مو نتفت ابو الجريده حتى ارقام الصفحات قريتها والله وارقوم ادور اللي يبيع يمين يسار وينهو قلت يمكن اشتريها بطريقه تكنولوجيه يمكنهم لافينها بخط ليزر تحط الفلوس يفتح تاخذ وحده وتمشي المهم مالكم بالطويله طلعت مجانا (بغيت اخذ للشباب ولحارتنا وشباب الدوام وشغالتنا اللي بتسافر ) والله واخذ واتصفح ابي موضوع مهم مالقيت ويجي دوري (مسوي قوي ولاعندي مشكله ولا فيه اي توتر وقالبها تنكيت مع الامه اللي بالانتظار ..كلوا شاد اعصابه قلت خلنا نقلبها تريقه وضحك علشان الناس تهدا)واله واروح للشباك علشان المقابله (عندهم يمكن حول تسع شبابيك التاسع للي يرطنون انجليزي ماعنده مترجم وامريكي حمر طيب وابتسامته حلوه وجدا متعاون وحبيب ...وش السالفه ابي اناسبه انا)المهم هذي اللخمه اللي كنت اقولكم عليها مو اللي قابلتني اول شافتني اسولف قالت بس هذا معاه التوفل والجيمات والسينات وكل الشهادات وارسلتني للشباك اللي بدون مترجم (من متابعتي للشبابيك وانا جالس هذا اطول واحد يسولف مع الناس واغلب اللي يطلعون من عنده باوراق صفر ونكلمكم ايه افلقني ) والله ويجي رقمي عنده واروح له وانا فاق هالابتسامه اللي تتطيح الطير من السما ويرد بابتسامه ودي اسلم عليه وابوسه مثل سلامنا يالسعوديين لكن الشباك المهم قالي وش تبي تدرس ؟(قلبتها براسي قلت مافي ياني انشب بحلقه ولا تراه بينشب بحلقي )وتمحور الخطه في مخي مباشره اسمعوا الاجابات :

السؤال الاول: وش تبي تدرس ؟؟

ابي ادرس ماستر ومعاي شهادة الجامعه ومعاي الجواز القديم ومعاي تعريف من الشغل السابق ومعاي شهادة الثانويه مترجمه ومعاي شهادة حسن السيره حقة المدرسه والجامعه مترجمه ومعاي كل الاوراق ( وكل ماقول عن ورقه اعطيه اياه من الشباك ) وكل هذا وانا ماني معطيه فرصه ورا بعض .
السؤال الثاني: ليش تبي تدرس؟
والله واقوله كلمتين بس بعدها عطاني الكرت وقال الاسبوع الجاي تاخذ الفيزا ... وشي الكلمتين؟
الكلمتين : اي نيد جود بوزيشن اند قود سالوري ان فيوتشر

يعني : ابي وظيفه زينه وراتب زين بالمستقبل

خمس دقايق المقابله كلها والناس الي قبلي ابو ثلث ساعه ونص ساعه وانا لاستخدامي اسلوب اللخمه العالميه اللي لاتستطيع اي قوه مقابلتته او التحصن ضدة انتصرت (لايسحبون الفيزا بس )
6- والله وانا اطلع وانا ماشي بممر السفاره واخذ كاسة شاي لاني اجهدت مخي كثير علشان اعيد له قواه وتركيزه المهم والله واطلع مع الباب الداخلي لساحة السفاره وامشي وانا اهوجس بلحالي (الدعوه صارت جد )مادريت الا واحد وراي يصيح ويركض وراي ولا هو العسكري( بغيت انحاش ..متعودين على النحشه الشباب) والله ويصيح وانا اجمد بمكاني يوم شفت ذاك الرشاش اللي بيده ومعشقه وعلى اتم الاستعداد ..يوم جاني قالي وين رايح الباب من هناك (طلع صديقكم مع الهواجيس مديور من ورا السفاره )
ملاحظه : تم عرض الموضوع بشكل ساخر حتى لايكون ثقيلا عليكم والمقصد الاساسي هو الفائده من عرض تجربتي بالسفاره ........