الاخت خواطر1
امريني انا موجود وحاضر اي استفسار؟

مرحبا أخوي بالنسبة لإستفساراتي هي :
1- أنا حابة أروح لتيلند في منتصف أغسطس يعني من 15 الشهر وطبعا أبي طيران أوكي من بوظبي
2- رحلتي بتكون تسوق بس حق البيت اليديد باذن الله يعني أغلب شي أثاث وشغلات ديكور
3- وهي إسبوع بالكثير وآخر يومين تجديد شهر عسل مثل ما يقولون
3- طبعا أنا وبوعيالي ( هو خبير تايلند بس سياحة مب تسوق )
بغيت منك الأشياء التالية :
1- فنادق في بانكوك
2- أسواق الأثاث ومحلات الديكور
3- أحسن طيران داخلي لفوكيت
4- أحلى منتجع في فوكيت
واذا تذكرت أي شي برد وبكتبه أهني
وتسلم مقدما ولك باقة جوري حلوة مني

خواطر 1
اختي العزيزة اسبوع واحد مايكفي لشراء الاثاث وبعد بتروحين بوكيت يباله 10 ايام خليها 4 ايام تشترين فيها الاثاث مع ترتيب الشحن وبعدين 4 بوكيت وبعدين 2 بانكوك حتى تكون رحلتك مرتبة.
1- بخصوص الفنادق في بانكوك وايده وعديده ويعتمد على الميزانية وانتي وين تبين يكون الفندق في منطقة سوكمفيت .
2- بخصوص محلات الاثاث والديكور اتصلت في واحد اللحينه في بانكوك وقالي بيطرش لي اسم كم محل وطريقة الشحن للبضايع وتقريبا بيكون 20 فوت كونتينر بيكون 1200 دولار مايعادل 4416 درهم وبيكون الشحن عن طريق البحر ارخص.
3-احسن طيران داخلي طبعا التايلاندية طبعا سعرها دبل عن الطيران الداخلي التجاري تقريبا 5000 بات
4-منتجع لاجونا بوكيت Laguna Beach Resort
متابع

أوكي
اذا عشرة أيام
بس أباك توزع لي هالأيام حسب ما تشوف وبطريقتك يعني اذا شي مولات وأسواق حلوة ترتب لي كيف التوقيت لها يعني ما أبا سياحة بس تسوق حق البيت حتى أطقم السفرة و كفرات السرير وإلخ ...... اللي تشوفه مناسب وموجود هناك ومميز
وبالنسبة للشحن البحري كم يباله وكيف يكون التوصيل و الدفع هو بس على الكونتينر ولا الشحن بعد يباله بيزات
أدري صدعتك بس تحملني وأنا اختك
سلام

خواطر 1
بانكوك 4 ليالي + بوكيت 3 ليالي + بانكوك ليلتان المجموع = 9 ليالي 10 ايام
بخصوص اطقم السفرة والشراشف وكذلك بعض الاثاث المنزلي وغيرها موجود ه في معظم المراكز والشي الراقي موجود في مركز سيام باراغون وسنترال ورلد
الشحن البحري يوم تاخذين الكونتينر تقدرين تخلين فيه كل شي اثاث ومفروشات وشراشف وغيرها علشان مايطلع عليكم شحن بالطيارة وبياخذ عنكم تقريبا 4410 مايعادل 1200 دولار امريكي وهذا السعر لشحن البضاعة كاملة