الحمد لله على السلامة , والله يعوض عليك للجوال
بانتظار التقرير والتفاصيل عن الرحلة ,,,

الحمدالله عالسلمة الوصول
كو بانجان -Ko Pha ngan
طولت بهذة الجزيرة
شو عجبتك الاحتفالات
الظاهر التلفون انتحر طلع مايعرف يسبح ...
الله يعوضك الخير كلة
صعبة تفقد تلفون بالسفر
مرت علي
ننتظر . Full Moon Party
تحياتي

حمد الله على سلامتكاتمنى تكون استمتعت برحلتك
بإنتضار تقريرك على أحر من الجمر ،،،،

تسلم الله يسلمك
يالحبيب
Usas

الله يسلمك مشرفنا الغالي تاي بن تاي
اش اقول واش اعيد
تعرف بعد الرجوع واسترجاع اللي صار في الرحلة
كل ما افتكر شي بس اضحك
كو بانجان شي تاني
تاني مرة اروحها
بس طولت فيها ارتحت فيها نفسيا
مناظر طبيعية
شاطئ بحر
والايفون غرق وابى التشغيل
ال full moon party
6 نوفمبر 2014
اول مرة احضرها في حياتي
شي مو معقول
شاكر سؤالك
تاي بن تاي

علينا وعليك السلامة
موه لوف تعرف تايلاند كم هيا رائعة
استمتعت الين اخر لحظة
الين قبل ما اروح المطار وفي المطار
ومازلت مستمتع بذكريات جميلة
mohluv

بسم الله
الجزء الاول
البداية من جدة حبيبتي
يوم السفرة
مشوار للحلاق
وتظبيط الراس
وبعدها البقالة وشراء بعض الاغراض
مجلة قلم لبان شوكولاتات لزوم الدلع
والذهاب الى المطار
الوقوف في طابور القطرية
والمتجهة للدوحة
ختم الجواز والمزح مع الموظف
ركوب الطائرةالطيارة صغيرو 3 كراسي 3 كراسي
كانها باص سابتكو
المهم الوصول للدوحة مع اشراقة يوم جديد
والترانزيت ساعه في مطار الدوحة
مطار كبير وجديد وحلو
مبروك على القطريين
وبعدها التوجه الى بوابة بانكوك
و 6 ساعات 20 دقيقة للوصول الى
سوانَابوم (مطار بانكوك الدولي)
هنا بدء الدم في التدفق في عروقي والادرينالين علي
والعرق بدء يتصبب
الوصول كان الساعة 7 مساء
وطابور طويل عند الجوازات
ناس من كل شكل ولون
وحينها قلت لنفسي
شايف تايلاند مغرية ناس كتير مو انتا بس
المهم
ختمت الجواز مع ابتسامة للموظفة
خرجت مع البوابة الخضراء
ونزلت تحت لباص باتايا
لقيت الباص عند بوابة 8
اشتريت تذكرة 134 بات
دخلت الحمام ونتم بكرامة
غيرت البطلون
لبست برمودا
وخرجت اشم ريحة بانكوك
ليا سنتين ما رحت
ركبت الباص
(ليش باص لباتايا)
انا لوحدي ولا ابا اي بداية تعكر مزاجي مع سايق
يسويلي هبالة
ماابغا
المهم ساعة واربعين دقيقة وصلت للحلم
باتايا
نزلني السواق في محطة جومتين
عديت الشارع للجهة التانية
وقفت سنجتاو
0بات
نزلني قدام vc hotel
طبعا كل شي زي ماهوا
فتح ماكدونالز جنب ال vc hotel
والباقي زي ما هوا
المهم
لفيت يمين من جنب ال في سي
الين وصلت للفندق
iris residence
الليلة ب 800 بات
ايداع 1000 بات
واخذو الجواز
طلعت الغرفة
اخدت دش
بارد
ولبست ونزلت اشوف باتايا بعد غياب سنتين
هيا هيا نفس اللعب
المهم
مشيت الى الووكنج ستريت
نفس البنات اللي يصرخو سواتي كب
وشويا لادي بوي يحاول يسحبني الى احد المحلات
(تعرفو لما الواحد يكون لوحدو في تايلاند
يكون مرغوب اكتر بمعنا انو هدف لاي احد)
مشيت الين بعد بعد الهلتون
تعبت
دخلت محل من المحلات
وجلست
وطبعا جاتني وحدة تقول
وير يو فروم
المهم
جلست قالتلي جبلي شي اشربو
قلت نو
سولي سولي
(سوري سوري)
رجعت الفندق للانخراط في نوم عميق
الحمدلله صحيت الصباح
وقلت يلا انزل
نزلت وخرجت من الفندق مشيت عشرين متر
قلت لنفسي اش راح اخدها مشي
رجعت الفندق
قلت للرسبشن ابا موتوساي
جديد
اليوم ب 200 بات
اخدتو ونطلقت
هيا هيا
اول مكان رحت
mum aroi
nakula road
قلت اتغدا ما دري ولا فطور
لقتيو زحمة
شفت المنيو
قلت بس اروح لسوق السمك
اللي عند الشجرة
اخر شارع ناخولا
دخلت لفيت
اخدتلي كيلو جمبري وكيلو استاكوزا حبات صغيرة
دفعت حوالي 1680 بات
خرجت برا السوق
في محلات فحم
يلا اعطيتو الاكل
سواه عل فحم
اختو رجعت الفندق فرمتو مع ليمون وسلطة حارة تايلندية
وحدة كولا باردة
(اعلان مجاني)
الحمد لله
يلا نزلت الف الف بالدباب
من سوي ال كيه مترو
الى سوي سكس
الى سوي بونكوت
الى الفيو بونت
دمرت الدباب
بس مافي غير عبي بنزين ونطلق
اجنب في اي مكان انزل اجلس اريح
وقول استراحة محارب
اتفرج تعرف المحلات عندها شاشات كبيرة
وكدا مرت ايام باتايا نفس النمط اكل شرب
سهر نوم متاخر صحيان متاخر
الحياة اتغيرت تماما
طبعا محلات ابو عرب نفس الشغل
صوت عالي وازعاج
امر من جنب المحلات ماني عارف كيف الناس جالسين
والا محمد عبده بصوت عالي مع دي جي
كل واحد ينبسط بطريقتو يا حلو
ومن هنا الى هناك
الى الفندق اطلع خد دش انزل
اعتقد ايام باتايا نفس النمط
الين رابع ليلة
سهران الين 10 الصباح
وجيت انام
قلت لنفسي
اذا نمت حتصحا في الليل ضاع اليوم
اش رايك تسوي تشك اوت
وتطلع على كو بانجان
اقولك لا روح كو ساموي لا لا لا
بي بي ايلاند
قلت اول شي اسوي تشك اوت وبعدين اشوف
وبافعل سويت تشك اوت وروحت صالة باتايا الشمالية
وعند الصالة
قلت اذا ارحت صالة مور شيت رايح اروح المطار دون موانج واطلع على ساموي
اذا رحت صالة ساي تاي رايح يروح على يوم واروح على بانجان اوصل الصباح
دورت رحلات على ساموي نفس اليوم
لقيت رحلة وحدة تطلع 3:30 الظهر
وانا لسه في باتايا والساعة حدود 12 الظهر
اوب
راحت الرحلة عليا
وكدا ضاع اليوم
اجلس في باتايا واطلع بكرا الصباح
قلت لا
اروح الصالو ساي تاي واطلع باص الى كو بانجان
بما انو اليوم ضاع
و اوصل الفجر بانجان
وبالفعل
اشتريت تذكرة الى
Ekkamai
(اشتريتها بالغلط)
المفروض اشتريت تذكرة الى
sai tai station
المهم وصلت ايكاماي
لما وصلت
قلت انا اش جابني هنا
ودور في الجوال المسافة بين ايكاماي ومحطة الساي تاي ستاشن
لقيتها اربعين دقيقة
اش اسوي اش اسوي
لقيت محطة مترو ايكاماي
طلعت وقلت للموظف ابا اروح ساي تاي ستاشن
قلي انزل اخر محطة وانج بو
واركب تاكسي
وبالفعل
2بات الى وانج بو
و 75 بات تاكسي الى ساي تاي ستاشن
وصلت المحطة
اشتريت تذكرة الى كو بانجان
ب 950 بات
وطلعت الباص الساعة 8 ينطلق
ومطرت مطر غزير
الين المطويا سارت تخرج من سقف الباص
قبل ما ننطلق
غيرو الباص ركبونا باص تاني
شكلو في اي بي
الكرسي اكبر
والحمد لله

سردك حلو ومختصر
بسأل عن محطة وانغ بو على اي قطار
اعتقد مسافة طويلة ممكن مسافة 1000 كم اكثر من 10 ساعات
لاني جيت من الجنوب الى بانكوك المسافة بتكون اكثر من 10 ساعات
اكيد طلعت بالعبارة من مرفأ شومفون اولا لجزيرة كوه تاو ثم طلعت لجزيرة كو بانجان
هذا الطريق اقصر من طريق كوساموي
اسمحلي
حبيت اذكر الطريق اشوف هل توقعاتي صحيحة اولا

السلام عليكم
لا عمو ممكن وصلت المعلومة غلط
انا ركبت من ekkami bts station
الى wang bo
على نفس الخط ب 52 بات
هدا القطار المعلق
sky metro
وطلعنا بلباص الى سورات تاني
الى دون ساك بير
ومنه عبارة سياترن فيري
دفعت 200 للعبارة
ونزلنا في كو بانجان
تون سالا بير
Tong sala pier
معاك صحبح في عبارات تطلع من شمفون الى بانجان مرورا ب كو تاو
تاي بن تاي