- مدريد ..
- كيف كانت مدريد ؟؟ كيف كانوا الشعب الاسباني ؟؟ ماذا عن ريال مدريد ؟؟
- كل هذا وأكثر سوف يتخلل في تقريري البسيط القادم عن مدريد ..
بسم الله الرحمن الرحيم ..
أتمنى ان يكون الجميع بألف صحة وعافية ..
بعد ان أكملت الحلقة الاولى من التقرير " الحلقة الاولى : باريس .. نقطة توقف !
https://artravelers.com/p/re/389790 "
أعود لكم من جديد في الحلقة الثانية .. والتي باذن الله تنال اجزائها ع اعجابكم ..
مدريد ..
هنا حين تعجز الكلمات عن الوصف ..
هنا حيث يتوقف القلب عن النبض ..
هنا حيث وجدت عشقي .. حيث انهار قلبي .. حيث انشرح صدري ..
مدريد .. كانت الحلم .. ومازالت العشق !
مدريد ..
هي كانت الوجهة الرئيسية في رحلتي .. هي الحلم الاول .. هي العشق الاول .. أول ما طرت في بالي فكرت السفر .. ما احترت في اختياراتي ... دايركت .. ابغى اروح مدريد .. و بحكم تعلقي الشديد بنادي ريال مدريد .. كنت ابغى اروح وقت مباراة تكون قوية .. منها اتنفس هواء مدريد .. ومنها امارس هوايتي في تشجيع مدريد على ارض الواقع ..
مدريد .. كانت حلم يداعبني منذ سنين .. والله ما كتب ليا الفرصة .. ومرت السنين .. وبعد ما توظف الواحد وعين الله خير .. اول ما يجي ع البال .. السفر ... طبعا ما احتجت اضيع وقت في التفكير فين اروح ؟! ..
أول فكرة جدية راودتني .. كانت في شهر اكتوبر .. لحضور مباراة مدريد وميلان .. بس وقتها تعارض مع مناسبة سعيدة لأخ غالي ( بس حقدت عليه ) .. ومن وقتها اترسخت فكرة مدريد بكل جدية في بالي .. ومن وقتها وانا اتصفح في النت واجمع معلومات .. واعيش القصص .. مر شهر وانشغلت في العمل .. وما مرت الايام الى ان تعود فكرت مدريد بكل جدية في راسي .. وبعد تقصي المعلومات .. لم اجد لا اجمل ولا احلى .. الا موعد كلاسيكو أسبانيا .. واقوى واشهر كلاسيكو في العالم ( ريال مدريد وبرشلونة ) .. كان موعدها 10 ابريل ( وقتها كنت في بداية شهر مارس ) .. حددت الموعد والهدف .. بدأت اجمع المعلومات واتابع الحجز .. حتى اني كنت اداوم لله .. كل دوامي وانا مسنتر ع النت في تقصي المعلومات .. ولما لقيت افضل اخ وصديق للسفر .. وحدث ما سبق ان ذكرته في الحلقة الماضية من خلال ادخال باريس في المخطط وزيارتها .. واكمال الرحلة الى مدريد ..
يعني طابع الرحلة الى مدريد .. يغلب عليها الطابع الرياضي .. وعشان أكون أكثر صراحة .. من اللي قرأته في النت عن مدريد .. وعن تجارب المسافرين الى مدريد كان محطم نوعا ما .. بس كنت أقول في راسي .. انها مدريد .. ولتكن كما تكن .. المهم ان احقق امنيتي .. ويكفي أشاهد الملكي .. واحضر ملعب سنتياغو برنابيو ..
والكلام عن الشعب الاسباني .. لايقل تحطيما عن وصف مدريد .. فهو شعب ثقيل دم .. ومتعصب .. ويكره العرب والمسلمين ..... الخ
وانا اقول ايش التحطيم هذا ..
بس ماسكة في راسي مدريد واسبانيا .. بروح بروح .. واللي يصير يصير ..
وصلت مدريد ..
كيف كانت مدريد ؟؟ كيف كانوا الشعب الاسباني ؟؟ ماذا عن ريال مدريد ؟؟
كل هذا وأكثر سوف يتخلل في تقريري البسيط القادم عن مدريد ..
ولا انسى في بداية هذا التقرير عن مدريد .. ان اخص بالشكر العميق لكل القائمين والكاتبين في قسم اسبانيا لا احب ان اخصص بالشكر احد ما .. ولكن هناك من يجبرك على ذلك ..لذا اخص بالشكر الكبير الاخ الليل والنهار .. والاخ زمان .. ع كل كلمة كانت لدي خير دليل في رحلتي .. سائلا المولى ان ارد ولو القليل بما جاد علي هذا القسم .. وكان خير معين في ترتيب رحلتي ..
مدريد - اليوم الاول : عندما يتجلى الحلم الى واقع !
إن تمحور سحر اوروبا في نقطة .. فاعلموا انها مدريد ..
جئتك والشوق اليك يسبقني ..
جئتك وكل فرح الدنيا يسكنني ..
جئتك كي أعانق نسيم الصباح فيك ..
كي أراقص نجوم سماءك .. فوق أرضك ..
جئتك كي أسكر .. وأسكر .. وأسكر .. من النظر اليك ..
مدريد .. يا عشقي .. آن للقاء ..
من حيث ما انتهت حلقتي الاولى .. أستكمل معكم ..
اقلعت الطائرة في صباح يوم السبت .. الموافق 10 ابريل .. الساعة 8 الصباح .. وتستغرق الرحلة تقريبا حول الساعتين .. الرحلة كانت على " ايزي جت " البريطانية ..
الطيران اقتصادي ..وكان سعر التذكرة تقريبا 800 ريال سعودي .. زي اي طيران اقتصادي الخدمات بمقابل مادي .. اماكن المقاعد كانت اجلس فين ما تبغى ..
بعد ما اخذت مقعدي جنب الطاقة
.. اخذت لكم بعض الصور بالقرب من مدريد ..
جبل ثلجي بالقرب من مدريد حوالي 50 كم ..كنت اتمنى ازوره .. يمدحوه ويمدحو القرى الموجودة بالقرب منه
مدريد من الاعلى ..
صورة لشوارع مدريد ليلا ..موجودة في المطار .. عند محطة المترو ..
طبعا ما يحتاج أوصف لكم الشعور اللي ينتابني في كل لحظة في الطيارة .. حتى من قوة الشوق قدرت احدد و أشوف ملعب ريال مدريد من الطيارة
..
وصلنا لمطار مدريد .. واخذنا الشنط ..وبما اننا صرنا خبرة في المترو .. قلنا نروح لشارع "قران فيا " بالمترو .. مشينا الين وصلنا محطة المترو .. وقصينا التذاكر .. اخذنا الخريطة .. حددنا تنقلاتنا الين نوصل محطة " قران فيا " ركبنا المترو .. " طبعا مترو مدريد يخليك تجلس تقطع في مترو باريس ع كيف كيفك ... يعني مترو مدريد انظف واحلى " .. وصلنا محطة القران فيا ..
وهنا بدأت مرحلة جديدة للبحث عن موقع الفندق .. طبعا الفندق حجزناه عن طريق موقع بوكينق .. والحلو اوروبا بشكل عام ..المباني مرقمة .. عشان تقدر بسرعة توصل للمبنى المطلوب .. المهم في اوراق الحجز كان في رقم المبنى .. ويلا اسحب الشنط ودور .. بس يا زين المشي في القران فيا
.. بعد ما لخبطنا وتهنا .. وسألنا .. وصلنا للفندق المطلوب ..
المشكلة فندقنا .. تابع لمجموعة فنادق .. وكنا نسأل باسم المجموعة .. ويوصفو لنا فندق تبع المجموعة .. بنفس الاسم .. وادوشت صديقي .. " بعد كثر قرائتي عن مدريد تكونت عندي فكرة كاملة عن خريطة مدريد .. فكنت متذكر مكان الفندق في الخريطة .. ولما وصلت ارض الواقع .. تهت .. " بس احدى الفنادق وصفوا لنا المكان .. ووصلناه الحمدلله ..حتكلم لكم عن الفندق .. اسم الفندق " Vincci V&" اربع نجوم .. موقع الفندق كان ممتاز .. اضغطو ع اسم الفندق وشوفو صور الغرف في الفندق .. بصراحة تصميم الفندق مررة ممتاز .. ناسي سعر الليلة .. اذا تذكرت كتبت لكم ..
اللي صار لنا .. انو اول ما وصلنا قالو حجز الغرف انلغى .. عشان في مشكلة في بطاقة الفيزا .. بس بما انكم حاجزين وكل شي .. حنسوي لكم اب قريد .. طبعا عاتبنا عليهم انو ما ارسلو لنا ايميل او اي شي " .. اخذنا كرت الغرفة .. وطلعنا لها ..
اول ما ندخل الغرفة .. ممر بسيط .. وتقابلنا الجلسة ..
الحمام وانتو بكرامة .. مقابل للجلسة ..
مقابل للجلسة ومصور الجلسة .. واضح الجزء الثاني من الغرفة .. وبينهم باب سحاب ..
صورة اوضح
السرير موجود في الجزء الثاني من الغرفة .. الصورة من بعد باب السحاب بشوية .. ع يميني دولاب .. ويساري التي في ..
صورة للتي في من السرير .. نظام التي في كان حلو جدا .. التحكم بالريموت .. او بالكيبورد .. وتقدر تطلب الخدمات.. من خلال التي في ..
طبعا ريحنا .. وصلينا .. الوقت كان تقريبا الساعة وحدة الظهر .. وبعد كذا خرجنا من الفندق ع طول .. متوجهين الى ... ولا اقولكم اكمل الجزء الجاي