السلام عليكم ورحمة الله وبركاته أعضاء منتدى العرب المسافرون المحترمين
أثناء جولتي في الاحساء حبيت آخذ فكره عن بعض الاستراحات وكيف مستواها
لأني افكر في طلعة عائلية في القريب العاجل ويساعدني على ذلك ( الجو المعتدل )
في هذه الأيام ، بطبيعة الحال الأحساء تعتبر أكبر واحة في المملكة ولا أبالغ إذا
قلت أن محافظة الاحساء هي الأولى على مستوى المملكة في كثرة الاستراحات
وجودتها ، واللي زار الاحساء كثير يمكن لاحظ هالشيء ، نرجع لمحور حديثنا
( عاش برنامج صادوه ) ، إسم هذه الاستراحة فايف ستار ، ولو أني
عندي تحفظ على هذا الأسم ولكن تبقى حريّة شخصية لمالك الإستراحة ، توكلنا
على الله نروح نشوف 5star
طريقنا للإستراحة ، ونصيحة اللي عنده وانيت هذا وقته لأن أغلب
الإستراحات اللي في الحسا تكون داخل وسط النخيل ، الله يعين سيارتي
طبعاً اتبعنا اللوحات الارشادية للإستراحة وبعدها وصلنا
بسم الله الرحمن الرحيم ، يا جماعة الخير ترى دخلنا
بعد الدخول تشوف أول شي هالمكان على يمينك ، ترى بنروح نشوفه
أها طلعت جلسة خارجية ، ياسلام خوش جلسة بين النخيل
لا وبعد إذا صارت الجلسة من الصبح مع صوت العصافير والبلابيل الحساوية
آخر حلاوة ، ولاتنسى الحليب مع البخصم
وجهة نظري ، ما أنصح بتشغيل التلفزيون بتاتاً على الأقل كسر روتين
البيت الممل ، بس إذا في مبارة كرة قدم ما عليه
نروح ألحين نشوف مبنى الإستراحة من الداخل
وهذه لقطة للمبنى من الخارج
جاهزين يا جماعة للدخول ترى الباب مفتوح
هذا مجلس الرجال كبير ما شاء الله وفيه مراوح شفط إذا كانوا
فيه أشخاص مدخنين وبعد فيه تلفزيون
مجلس النساء أصغر من مجلس الرجال
بس ولا يهمكم يا نون النسوة فيه لكم تلفزيون
نجي حق زبدة الإستراحة (زبدة ؟؟ أجل وين الخبز؟؟)
بطبيعة الحال إذا الأستراحة ما فيها مسبح يمكن تكون
غير مرغوبة وأكثر ما عجبني في المسبح إنه فيه باب
خاص بالمسبح علشان يتم قفله حتى لا تكون فيه حوادث
مأساويه وهي غرق وموت الأطفال فيه وهذه حدثت
في الأحساء كثير واللي ما عجبني في المسبح ما فيه
بركة صغيره حق الأطفال ، لأن فيه بعض الإستراحات
يسونها ، بصراحة عميق
غرفة تبديل الملابس بالمسبح ودورة المياه ( الله يكرمكم)
ترى هذا الباب اللي بنطلع منه الحين مو نفس الباب اللي دخلنا منه
يعني المبنى فيه مدخلين واحد للرجال والثاني للنساء وهذه نقطة ممتازه
أوه نسيت عن أوريكم المطبخ الله يهديكم ما ذكرتوني
يالله قبل من نطلع نروح نشوف المطبخ
طلعنا من المطبخ ومن المبنى بعد ، وقلنا نروح نشوف لون الحياة
لون الطبيعة بالفعل الأخضر هو لون الحياة
وأثناء تجولي داخل الإستراحة شفت شي من بعيد
هناك ، أكيد شفتوه أو ما بعد؟
شرايكم نقرب من عنده ونشوفه عدل ، يالله مشينا
أها خيمة ، بعد ما راحت أيام سعد الذابح
بس ما يمنع نشوفها من داخل علشان السنة الجاية في البرد
نقدر ناخذها
ما شاء الله تبارك الرحمن ، ما توقعت إنها بالحجم هذا؟؟
إذا كنت في الحسا ولا تسوي لك مندي على جذوع النخيل
راح نص عمرك
الحفرة الأولى مندي لحم والحفرة الثانية مندي دجاج
واللي عنده خبره في المشويات يطّلعها هنا
بنطلع من الإستراحة مع هالبوابة
التقييم العام للإستراحة 8.5 /10
ربما التقييم يرتفع أو ينخفض إذا عرفنا
سعر الإيجار وبصراحة لم أستفسر عنه
وما يعيب الإستراحة لا يوجد بقربها
خدمات كثيره مثل مراكز التموين
وبعض الخدمات الأخرى ، و في حاجة
بعد ما سألت عنها حارس الإستراحة
اللي هي درجة حرارة ماء المسبح ، لأن بعض
العيون في الأحساء تكون حارة والأخرى
باردة فعلى حسب الجو يمكن ما تستخدم المسبح
حبيت أسرد هالمعلومة علشان اللي
يبي يستأجر تكون عنده خلفية عن ذلك.
ولكم يا أعضاء منتدى العرب المسافرون الورود الأحسائية
مغلفة بتقدير واحترام النوخذة