اولا بالتوفيق يارب وبالرفاه والبنين
لا تحجز من هنا ولا شي اطلع مباشره لجاكرتا واحجز من مكتب كاها او غيره من الترافل ايقنت
المهم متي موعد سفرك اتمني ما تقول 17 اغسطس مثلا حتي نعرف لا يكون سفرك يوافق يوم اجازه كمثل يوم 17 اغسطس اذ يوافق يوم الاستقلال للدوله
بخصوص سوالك الثاني نعم ستجد باذن الله واكثر مافي جاكرتا تحديدا 3 امور الفنادق+ البنوك+ الاسواق ...ولا انسي الزحمه ههه
قراءه موضوعك الاول
للعرسان باذن الله في نهايه الويك اند ساضع لهم برنامج يتوافق مع عده شرائح حسب ميزانيات مختلفه
ان كنت من الاحياء باذن الله

jaka
كلام خبيرنا JAKA كافي ووافي ..
وأشارك في أن 300 ريال تأخذ افضل فندق وخمس نجوم بعد !!
أغلب فنادق ال4 نجوم ب 500 الى 600 الف روبية ..( أقل من 200 ريال حسب صرف اليوم).
والحجز من أندونيسيا أفضل بلا شك ولا مقارنة ..

بيض الله وجيهكم والله انكم ماقصرتو
طيب وش افضل الخطوط السعوديه والا اي خطوط وماعندي مشكله في الترانزيت

طيب ممكن تسوونلي برنامج سياحي
يعني كل مدينه كم اقعد فيها وكم الوقت بين كل مدينه والأخرى يعني المسافه بينهم
والبرنامج مدته عشر ايام واذا العشر الاف اللي هي ميزانيتي كفت انشالله راح امدد

وممكن ايضا ولو فيها كلافه
الفنادق اللي تنصحون فيها وياليت فنادق يكون فيها انترنت
واهم شي انها تصلح لواحد معاه زوجته زي حلاتي

او بعد الوصول اخي الكريم فيه خيارين امامك
يا تقعد لك ليله بجاكرتا مثلا ثم ثاني يوم الصباح تتوجه للبونشاك
او تذهب مباشره الي بونشاك
الافضل طبعا بقا ليله في جاكرتا للراحه بعد السفر الطويل
بخصوص الفنادق
شف واناخوك جاكا مدينه الفنادق بالعربي بين كل فندق وفندق بتلقي فندق
مثلا فندق سعره رخيص نسبيا واربع نجوم وقريب من سوق تمان انقريك يوجد فندق اسمه سنتيكا
طبعا الفندق مجدد الاثاث وليس جديد لكنه جيد ويتميز بقربه من سوق تمان انقريك
لانك اذا وصلت اول يوم وطار النوم وودك تفتر مع الاهل تقمز تمان انقريك وتتسلي لين تتعب وترجع تدبها نومه
صباحي ثاني يوم تتوجه للبونشاك وعلي طول ترمي عفشك في سيروني 2 ومنه تطلع للتمان سفاري
طبعا بتطلع بدري للبونشاك عشان تحجز الفندق وتذهب للتماان سفاري بكير من 10/11 صباحا
تفتر بالحديقه وتمر العروض وغيرها من فعاليات تنهي يومك العصر او بعده بقليل هناك ومنه تطلع للمطل علي شيبا ناس تاكل ذره يحبها قلبك او تتوجه لرندوا عالم وتضرب سمك يعني بقيه البرامج والمواقع بالتقارير توزعها علي 3 او اربع ايام برحلتك
وخلال تجولك بالجبل تتمشي بالفلل اللي منصوح فيها للعوائل اذا حاب تغير من الفندق لفيلا للشوي والطبخ والمناظر اجمل
بعد هالايام تتوجه الي باندونج ومنها مباشره الي البركان والمياه الكبريتيه هناك وتاخذ لك سكن يناسبك هناك مثل المجمع اللي بتقريري الاخير
هلمنطقه منطقه هدوء منها تتمشي في الشلالات والمياه البركانيه حولها وتطمر ليله اذا حبيت لباندونج تتمشي في المدينه وتتقضي بعض ملابس الجينز اذا حاب
او تعكس الايه تروح لباندونج مباشره وتبقي ليله فيها وثاني يوم تطلع للبركان
وبعدها بيكون باقي لك بحدود 3 ايام تتوجه الي جاكرتا
اول يوم في دنيا فنتازيا ..سي وورلد ومنطقه انشول البحريه وجنبك مطعم بندر جاكرتا اكل بحري ولا اروع وجلسه تشرح الصدر
واذا حاب فيه فنادق في المنطقه نفسها تسكن فيها ليله اذا احببت
جاكرتا التمشيات فيها بين المولات وبعض المتاحف وخلافه مما هو مذكور بكثره في تقارير الاخوان في البوابه
فقط مر وفتش وشف وش يعجبك منها ويناسب طباعك وارجع اسالنا عنها وبنجاويك باذن الواحد الاحد
هذا موقع للفنادق
الموقع مليان شروحات عن فنادق متعدده لكن للتسهيل عليك بعطيك رابط للفنادق
ابحث عن مجموعه تناسب المبلغ اللي بتحدده للفندق في الليله وخلها مجموعه اربع او خمس فنادق مثلا
ثم قلنا وش اخترت وبنوجهك للافضل فيهم
هذاالرابط
http://www.hotelscombined.com/City.aspx?fileName=Jakarta&pageIndex=0&sort=Rating-desc&tabId=Details
فيه كلمه فوق مكتوب sort
امامها عده خيارات مثلا تختار الفندق حسب السعر او الاسم الخ
انت حدد النجوم وتمش بين هلفنادق لين تختار مجموعه وطبعا السعر باليوروا هنا
اليوروا اعتقد الان يساوي5.5 ريالالمسافه بين جاكرتا والبونشاك 80 كيلو تقريبا
المسافه بين بونشاك وبوقور 35 كيلو تقريبا
المسافه بين باندونج والبونشاك بحدود ال 3 ساعات المسافه غير مهمه هنا لانك بتقطعها بمرورك بالغابات والقري
والمسافه بين باندونج وجاكرتا 3 ساعات تقريبا

تسلم والله أخوي جاكا والله كفيت ووفيت وانا تعبتك معاي
الف الف الف الف شكر

جاكا عزالله ونعم....صراحه اخوي الموسيقار88 عرف ينتخي بمن.
تحياتي

شكرا على مرورك اخوي ابو فهد