رسالة ود
14-04-2022 - 11:35 pm
عزيزتي نجلاء مارأيك في محلات الملابس الموجودة في شارع بغداد وهل هي نفسها الموجودة في شارع الاستقلال
لأني حأسكن في تكسيم وشارع بغداد بعيد عن تكسيم,هل تنصحيني أروح لشارع بغداد أو اكتفي بالاستقلال
وبالنسبة لمحلات المناشف في القراند بازار هل في بوابة معينة أدخل منها لأن السوق كبير وأخاف ماألاقي المحلات
الفخمة.
وإذاممكن تدليني على محلات تبيع بلايز أو فساتين مطرزة بالصوف شغل الأتراك اليدوي.
وسؤال أخير عن أماكن بيع الشنط تقليد الماركات.
وشكرا ياعسل
اهلا وسهلا فيك .. والاخت نجلاء تتشرف بالرد على استفساراتك : )
اولا : محلات شارع بغداد تختلف نهائيا عن محلات شارع تقسيم ..
شارع بغداد اغلب محلاته ( ماركات عالميه ) ... عكس شارع تقسيم اغلب محلاته ( ماركات عاديه ) واغلبها ماركات بصناعة تركيه .. وهي فعلا ممتازه بس اغلبها ( كاجول )
وماأنصحك تروحين شارع بغداد ( للتسوق ) لانه غالي مع الضرائب يعني تدخلين محل بيربري تشوفين الشنطة ب 5 الاف ريال .. وتجين عندنا تلاقينها بنفسها عند المحل بالفين ونص او 3 الاف .. ( فيه فرق ) ,,
وطبعا شي معروف ان الماركات الاصليه في تركيا غاليه جدا مقارنه بالماركات عندنا ..
لكن اذا كنتي حابه تروحين له للتمشيه والجلوس بالمقاهي بيكون حلو : )
واذا كنتي حابة تشترين الملابس اليوميه وبأسعار مناسبه فطبعا الافضل شارع الاستقلال او المولات الثانيه
وللمعلوميه : شارع بغداد بالقسم الاسيوي من اسطنبول .. اما شارع الاستقلال فهو بالقسم الاوروبي بمنطقة تقسيم ..
ثانيا : بالنسبة لمحلات المناشف .. صراحه ماعرف لهم بوابه معينه لانهم موجودين بأماكن متفرقه من القراند بازار ..
وانا بنصحك نصيحه بما انك تبين مناشف وشنط تقليد ماركات درجة اولى ,,
بهالحاله الافضل تروحين للسوق المصري بتلاقين الشنط والمناشف .. والسوق المصري اصغر وافضل ( برأيي )
طبعا المحلات اللي تبيع شنط تقليد الماركات وممتازه قليل جدا .. يمكن 2 او 3 .. اما الباقي رديئين ..
بحاول اوصف لك وان شاء الله يضبط معي الوصف ..
ادخلي السوق المصري من البوابه الرئيسية .. وامشي سيدا واول لفه عاليسار لفيها وامشي سيدا .. بيجيك محل على يدك اليمين يبيع شنط ( ومقابله بوفيه تبيع شاورما ) .. هذا من افضل المحلات اللي تبيع شنط تقليد ماركات وتقليدهم ممتاز جدا جدا .. طبعا انتي اذا دخلتيه قولي له وديني للمستودع .. بيوديكم لعماره ( مشي وراء السوق ) وتطلعون درج وتدخلون مكتبه مليان تشكيلات وبتشوفين الكتالوج عشان تقارنين بعد ..ومحلات الناشف شفتها بعد بالسوق المصري وبتلاقينها بطريقك وانتي رايحه لهالمحل ..
فيه محلين ديزاينهم من برا خشب .. وعارضين المناشف بالفترينا .. صراحه عندهم اشياء مره حلوه وشغل يدوي وممتازه ..
بالنسبة لبلايز الصوف صراحه ماشفت ومالفت نظري شي .. يمكن لاني ماكنت ابحث عنهم .. لفت نظري الجلود بس اغلبها رجاليهاتمنى اكون جاوبتك على استفساراتك .. واذا حابه تسألين عن شي ثاني تفضلي : )