بسم الله الرحمن الرحيم
الأخت الغالية "دموع الوجد" ...
أدري والله اني ثقلت عليك بزياده ... بس ان شاء الله كله في ميزان حسناتك ...
مثل مانتي خابره ... رحلتنا ليلة في جنيف و8 ليالي في انترلاكن ...
بعدين ليلتين في رست و 3 ليالي في شوانجو ...
وبعد شوانجو نروح زيل آم سي 6 ليالي وسالزبورج 3 ليالي ...
آخر شي نرجع ميونخ ليلتين ...
موضوعي هو بخصوص ترتيب الجدول اليومي ..
من قراءتي لمواضيع الأعضاء في المنتدى طلعت بترتيب أعتقد انه كافي ...
بس مالنا غناة عن شورك ... فأتمنى تشوفي ترتيبي وتعطيني رايك ولك كل الشكر وخالص الدعاء ...
1- جنيف :
عشان بنوصلها الظهر وما بنجلس فيها إلا ليلة وحدة بس راح نعمل تشك ان في الفندق
ونطلع مباشرة لبحيرة جنيف ... نتمشى عندها ونصور ويمكن المدام تعمل شوية شوبنق على حسب الجو ...
ونغزي لنا مطعم ونرجع للسكن ...
يوم ثاني قبل صياح الديك أجلس أروح سكست أجيب الموتر وأرجع للعيال ونعمل تشك آوت ...
ومنها على انترلاكن.
2- انترلاكن :
طبعاً أنا ما أعرف وش بنشوف في الطريق من جنيف لانترلاكن من مناظر ومواقع سياحية يمكن نوقف عندها ...
أكيد راح تفيديني فيها مثل العادة ... وعشان كذا راح أبدأ من انترلاكن على طول :
اليوم الأول : الوصول إلى انترلاكن - جريندل فالد ... وعمل التشك ان في السكن ...
بنطلع مباشرة نستكشف فرية جريندل فالد ومنها ننزل على انترلاكن في رحلة استكشافية ...
بنفرها فر شبر شبر ... بيت بيت ... دار دار ... زنقه زنقه ...
واذا جعنا طبينا على مطعم "شاليمار" أو "تاج محل" أو "سبايسي" اللي أتصور انهم بيكونوا ربعنا على طول في انترلاكن ...
وبنرجع السكن للراحة وننهي يومنا الأول...
اليوم الثاني : زيارة قمة Jungfraujoch ... عن طريق قريتنا جريندل فالد ...
ومثل ما فهمت من تقارير الأعضا الرحلة هذي راح تاخذ نص يوم ويمكن اليوم كله ...
وإذا باقي معنا وقت بنتوجه للزحليقة الصيفية في كندرستيج ...
ونرجع للعشاء والمبيت في جريندل فالد ...
اليوم الثالث : زيارات شلالات تروميل باخ وشلالات جيسباخ وشلالات ريخن باخ وخوانق نهر الآر ...
اليوم الرابع : زيارة لوزيرن وجسرها الخشبي ونهرها وبحيرتها وما حواليها والانطلاق منها لقرية هايدي ...
اليوم الخامس : زيارة بحيرة البلوسي والأوشن سي ومنها سنتوجه إلى قشتاد ...
اليوم السادس : زيارة مصنع الجبنة في غريير ... كأني فهمت انو مصنع كالير نستله للشوكولاته قريب منه!!
اذا كان قريب فرايحينه رايحينه وما راح نعتقه ...
ونرجع لانترلاكن نقضي فيها باقي اليوم عند وحده من البحيرتين نتمشى فيها بالقارب ونلاعب الطيور ...
اليوم السابع : هذا عاد يوم المغامرات ... الهبوط بالباراشوت والطيران الشراعي ... وزيارة بعض القرى المجاورة مثل وينجن وشبيتز ويمكن نرجع للزحليقة الصيفية Heimwehfluh ...
اليوم الثامن : قمة تتلس وكهوف سينت بيتوس ...
ملاحظة: في أحد تقارير الأعضاء قرأت عن بلدة متخصصة في صناعة ساعات الكوكو كلوكز ...
بس مع الأسف ضيعتها ... أكيد تعرفيها؟؟؟
3- رست :
مادري في شي مهم في الطريق من انترلاكن الى رست؟؟
رست بنجلس فيها يومين وأظن انها كلها لليوروب بارك ... وش رايك؟؟
4- شوانجو :
نفس الحكاية ... من رست إلى شوانجو في شي يستاهل العنوه؟؟
شوانجو هذي عاد خليتها لك ... والله ما عرفت فيها شي ...
ودي أروح فوشن وقارميش واحوس في الغابات السوداء ... ومادري وين بعد ... التفصيل عندك ...
5- زيل آم سي :
في الطريق من شوانجو إلى زيل آم سي ... تنصحينا نمر على مكان معين؟؟
اليوم الأول: الوصول إلى السكن في كابرون والتعرف على المنطقة المحيطة والنزول والفرفرة
في زيلامسي لا شغله ولا مشغله ... حواسه بس ...
الجلوس أو المشي حول البحيرة واستئجار وركوب القارب ... أو الصعود إلى قمة شميتن بالتلفريك ...
اليوم الثاني : زيارة قمة كابرون (جبل شتاين هورن) ... وحضور العروض التاريخية في قلعة
كابرون القديمة ...
اليوم الثالث : زيارة شلالات كريمل ... ومنتجع فيرلايتن ...
اليوم الرابع : الذهاب للزحليقة الصيفية بالقرب من قرية سيلفدين ... وزيارة بلدة بادقاستن ...
اليوم الخامس : زيارة الخوانق المائية "كْلام" ... واستئجار طائرة شراعية من ساحة الطيران ...
اليوم السادس : زيارة بحيرة جروندل سي و بحيرة آلتوس سي والبلدات المحيطة فيها ...
6- سالزبورغ :
بعد مادري وش راح يقابلنا من مناظر ونقاط تستاهل الوقوف عندها في الطريق بين زيلامسي وسالزبورغ؟؟
اليوم الأول : الوصول للفندق وزيارة حديقة الميرابل ومنزل موزارت...
وعبور نهر السالزاك عبر جسر المشاة ... والتوجه إلى شارع المشاة في سالزبورغ القديمة
وأكيد بنكون هلكانين من الجوع ... فما قدامنا غير المطعم الهندي في شارع المشاة ...
اليوم الثاني : التوجه إلى قرية وبحيرة وولف قانق ... بنركب القطار البخاري للطلوع للقمه ...
وإذا رجعنا ان شاء الله لبحيرة وولف قانق راح نتمشى على الشاطئ جنب البط ونستأجر قارب
وبعدين يمكن نتجول في البلدة نفسها مشي طبعاً ... واذا باقي عندنا وقت بنزور قصر هلبرون...
اليوم الثالث : زيارة هالشتات والبحيرات السبع (ترى مضيع أساميها) ...
7- ميونخ :
في شي يستاهل العنوه في الطريق بين سالزبورغ وميونخ؟؟
اليوم الأول: الوصول للسكن ثم التوجه لشارع المارين بلاتز والماكسيميليان عشان الشوبنق
لوزارة الداخلية طبعاً ...
ملاحظة: سمعت عن سوق يقال له "انجلشتيد" تقريباً ... يقولون يبيع الماركات بخصومات رهيبة!!
اليوم الثاني : زيارة بافاريا فيلم شتات ... والحديقة الأولومبية وعالم بي ام دبليو ...
طبعاً إذا وافقت وزار الداخلية وما أصدرت قرارها النهائي بجعل اليومين للشوبنق حصرياً..
اليوم الثالث : بما أن رحلتنا راح تكون على الساعه 4:30 العصر ...
وش رايك نستفيد من فترة النهار إلى الظهر في أي نشاط تقترحيه اختي "دموع الوجد"؟؟
وبكذا نكون انتهينا من المخطط وتنتهي رحلتنا ونرجع بالسلامة إن شاء الله ...
ونوافيكم بالتقرير على طول ...
يعطيك أل1000ف عافية ...
أخوك ... ساموراي