Ivan
18-04-2022 - 07:01 pm
السلام عليكم ورحمة الله وبركاته
اخواني واخواتي ..
انا توي جاية من ايطاليا .. وطبعا الرحلة ولله
الحمد حلوة ولو انها ما خلت من الاخطاء
بس طبعا في شغلات كرهتها مرة برحلتي
وانا مؤمنة ان مافيها رحلات تكون كاملة مكملة
لابد يحصل شي ينكد علينا لو بسيط حتى .. عشان
كذا فتحت هالموضوع عشان كل واحد فينا يقول
وش اكثر شي نكد عليه برحلته لاي دولة ايطاليا او غيرها
راح ابدا بنفسي
اول شي : الاكل
صدمة عمري .. ما اعجبني اكلهم ابدا ابدا !!
ابد ما تخيلت المطبخ الايطالي بهالصورة !!
لا تقولون انتي ما رحتي المطاعم السنعة
انا جربت اكل الفنادق الي انا فيها .. وجربت المطاعم
لكن !! شي ما توقعته .. البيتزا مثلا !! يا يجيبونها
يابسة زي خبز التميس الي من الوسط يكون قاسي !
وان تكرمو جابوها لينة !! تجيكم من تحت في اجزاء محروقة !!
ناس تقدر الحامض واليابس والمحترق !!
ثاني شي : التعامل ..
طبعا بما اني محجبة ( لثمة ) كان لي من سوء التعامل نصيب
مر علي ناس حبوبين الله حق .. بس برضو مر ناس
اخلاقهم زفت وخياس كني اشحذ منهم !
المشكلة انهم مو بس من عامة الشعب !!
المشكلة انهم من الموظفين الي المفروض يكونون بخدمة الناس
اتذكر يوم كنت بمحطة القطار بسال عن مسار رحلتي
وجيت عند واحد من الي واقفين عند المسارات .. اساله !!
اخينا في الله يرد من غير ما يرفع راسه كلمتين وبس !!
كنه مغصوب يكلمني .. وارجع اساله عشان يوضح لي ما يرد علي
ولا يرفع راسه حتى !! ولا هذاك الي عند برج بيزا !!
ما تصدقون .. جيت بساله من وين اقص تذاكر عشان ادخل
( طبعا هالحكي كله بالانقلش ) قعد يرطن علي .. يوم قلت
له بالانقليزي تكلم انا ما اتكلم ايطالي ورجعت اسال نفس السؤال
مرة ثانية بالانقلش قام يلقط عيونه يمين ويسار كنه ما يسمعني
كنه يقول مابي اكلمك !! هذي قمة القهر صراحة انها توصل
اني ما اقدر ادخل البرج عشان حضرته ما يبي يساعدني ولا يكلمني !
صراحة انقهرت لدرجة اني كان ودي اعطيه كلمتين بالعظم ولا اسوي
حركة افهمه فيها انه قليل ادب وما يستحي .. بس خفت لا يجون
البوليزيا حقتهم يكلبشوني ( polizia هذي الكلمة الي اشوفه على سيارة
الدوريات حقتهم وطبعا معناها راعين الكلبشات :109
قهر لا تذكرت معاملتهم احزن على حالتنا حنا السياح الي
نروح ما نلقى جهة تحمينا من الاستغلال او العنصرية في التعامل :112:
ثالث واخر شي : اللغة
ناس طبعا ما يتكلمون انقلش !! والي راح فيها من !
حنا يالسياح !! تشيب روحي لمن ادخل صيدلية ولا اسال عن مكان
يعني يا يطلع لي واحد حبيب بس ما يعرف انقلش ! ولا يطلع
الي يعرف انقلش ونفسه شينة انا لله بس !!
بس النقطة هذي تهون عن الي قبل اكيد
الحين دوركم اتمنى تشاركوني
دمتم بود
اللغة هي الاساس بكل صراحة ...
يعني عندك اسبانيا نفس الشيء ما يتكلمون انجليزي وفرنسا ما عدا شارع الشانز وما جاوره والمانيا وحتى اليابان
مثلاُ : في احدى سفراتي لايطاليا كان مع واحد يتكلم الايطالية بطلاقة وحسيت بالفرق الكبير في التعامل والتفاهم معهم
والشعب الايطالي حتى في تعامله مع بعض فيها جفاسه ...