انا مثلك بالضبط رايح شهر عسل بشهر 7 انجليزي وحجزت كل شي من النت
وترا ابيض اول مره اسافر
بس حطيت 3. ايام فيينا و 3 سالزبورغ و4 زيلامسي ويومين في بلدة اسمها Walchsee في النمسا فيها بحيرة وبعدها يومين ميونخ
يعني 14 ليله 15 يوم
وبالنسبه للسيارة لايكون عمرك تحت 25 لان هالموضوع مسبب لي مشكله بالحجوزات ومخليني حزين*

صحيح من جدك انت تزل في ميونخ وتروح فينا وترجع ميونخ مال امها داعي ههه

الف مبروك مقدما والله يوفقكم
لازم تستاجر سياره طبعا عشان تقلل المصاريف وتستمتعون وتاخذون راحتكم
عندك 4 1 ليليه يعني 15 يوم
اذا مجبر الذهاب والعوده من ميونخ معناته ما عندك الا هالمخطط
ميونخ وصول فقط - 3ليالي سالزبورغ - 7 ليالي زيلامسي او كابرون- 4ليالي ميونخ
او
تخلي الذهاب فيينا والعوده ميونخ
ليلتين فيينا - 3ليالي سالزبورغ - 6 ليالي زيلامسي - 4ليالي ميونخ
هذي 15 ليله يعني 16 يوم
قارمش تقدر تزورها يوم من ميونخ الصباح وترجعون قبل المغرب اما انترلاكن بعيده جدا هي و زيورخ خلوها مره ثانيه
بالنسبه للعبايه يفضل تلبس عبايه على الكتف وعادي بنقابها انا واخواتي وامي بنقاباتنا بس لازم تاكل من تحت النقاب
او انك تروح للمطاعم بوقت ما يكون فيه زحمه يعني مو وقت غدا وتجلسون على طرف بحيث تقدر تكشف وتاكل
طبعا ما اتوقع فيه بارتيشن بالمطاعم الا اذا كان بالمطاعم العربيه انا بصراحه ما قد جربتها بس ما اتوقع
بصراحه انا واهلي غالبا نطبخ بالشقه وناكل بس انتوا عرسان عندك هالحل اللي قلت لك عليه وحاولوا تختارون الفنادق
اللي داخل بسعرها الفطور عشان تشبعون نفسكم زين وتاكلون ثاني مره على العصر لان اذان المغرب الساعه 8 تقريبا
وممكن تمشون نفسكم الوقت اللي بين الفطور والغدا بايسكريم او شيبسات ومن هالشغلات انا واهلي نسوي كذا
نفطر بالشقه غالبا او اذا كنا حاجزين شي مع فطور ونطلع من الساعه 8 الصباح ومعانا القهوه والشاهي والشيبسات
ونتمشى الين يقرب المغرب يعني على الساعه 6 تقريبا نرجع الشقه ونطبخ وناكل وجبه غدا عشا ونصلي المغرب
والعشاء جمع وقصر وننام عشان نصحى بدري ونشتغل اليوم زين
نصيحتي لك انت احجز بنفسك افضل وترى الموضوع سهل واحنا راح نساعدك لاتشيل هم

هلا بك اخوي احمد
ناوي افرفر هناك
يعطيك العافية بنت حواء
الله يبارك فيك ويحلي ايامك
فكرة ممتازة اني انزل في فيينا وارجع من ميونيخ ممكن تكون اريح وتوفر علي مشاوير
مع ان احتمال تزيد علي قرابة ثلاثة الاف ريال في التذاكر
بس الان مو يقولون استئجار السيارات في ميونيخ ارخص من غيره .. ؟
بعدين برضه من ناحية الشنقن ما احد رد علي ..
الامور واضحة تقريبا من ناحية الحجاب الله يستر كل بنات المسلمين
شاكر لك بنت حواء مرة ثانية

اذا تبغى تزور فيينا لازم تخليها احد المحطات
واذا عادي عندك تكنسلها خلي الذهاب والعوده على ميونخ
واذا ودك تضيف العاب اليورب بارك
ميونخ وصول فقط - ليلتين سالزبورغ - 6 ليالي زيلامسي او كابرون- 3ليالي ميونخ- ليلتين رست - ليله فرانكفورت

فيينا ممكن تتكنسل
بس عندي زيوريخ وفينيسيا امنية اني ازورها من زماان
خصوصا فينيسيا عندي البوم صور لها كل ما طفشت قعدت اقلب بس ..
وش رايكم لو قلنا
ميونيخ اربع ايام - زيوريخ ثلاث ايام - قرية هايدي يوم - زيلامسي ثلاث ايام - فينيسيا ثلاث ايام والعودة من هناك
هو صحيح ان المشاوير بين المدن تتراوح بين الساعة والساعتين والثلاث .. بس باستاجر سيارة من ميونيخ وباسلمها في فينيسيا وكذا كذا لازم ارفع البدجت تكتين فوق .. الله يعين
وش رايكم .؟ وش تشورون .؟
فيه مشكلة ثانية يقولون دام بانزل ميونيخ لازم اطلع التاشيرة من السفارة الالمانية والالمانية تقول لازم احضر يسوون مقابلة .. وانا من ابها وموب فاضي لهالمقابلة اذا فيها دبرة كذا او كذا ..