وعليكم السلام ورحمة الله وبركاته
أخي الله يعينك في سفرتك، ما شاء الله عليكم
إن شاء الله تتهنون في سفرتكم
وأهم الوالد والوالدة الله يحفظهم جميعا يا رب
أخوي قطري لا تشيل هم من الرحلة
إذا بتشيل أطفال أكيد أنهم يريدوا ينبسطوا ويلعبوا ويسبحوا
البرنامج المقترح
2 يومين سلنجور
3 أيام لنكاوي
3 أيام بينانج
5 أيام كوالا (وخذلك يوم من كوالا عشان تروح جنتنج اللي هي مدينة الألعاب الباردة، ذهاب وعودة في نفس اليوم)
فيه شقق سعرها جيد في كوالا اسمها سويس جاردن
وباقي الأعضاء يفيدوك بباقي الشقق أو الفلل
طريقة التنقلات
من مطار كوالا إلى سلنجور تاكسي ب (80) رنجت
من سلنجور إلى لنكاوي طيران إما إير آسيا أو الماليزية
وإذا تريد اقتصادية خذلك إير آسيا
من لنكاوي إلى بينانج إما العبارة أو الطيران
من بينانج إلى كوالا باص أو الطيران
من كوالا لجنتنج إما باص أو تاكسي شوف اللي يناسبك
بالتوفيق أخوي

الله يجزاك خير تكفون عاونوني شوي ابي اعرف كم التكلفه اللي اخذها لسكن ولصرف
وخصوصن معي صغار
هل اقدر استقر في كوالا لمبور واروح بسياره لمناطق اوبس انتقل لمنطقتين لاني خايف من شيل العفش والحط لان العدد كبير
هل اقدر استاجر باص في التنقل ؟؟
كم تكلفته ؟؟

أخوي قطري بالنسبة للصرف ما نقدر نحدده
لأن عددكم كبير ما شاء الله تبارك الرحمن ، الله يزيدكم الذرية الصالحة يا رب
لكن أنت حدد ميزانيتك، هل تريد فنادق اقتصادية ولو اشوفها صعبة، بل تحتاج لشقق
وأفضل شي نشوف اللي جرب الذهاب لماليزيا مع عائلة كبيرة ، فيا ليت أحد من الأعضاء من اللي جربوا الذهاب مع عوائلهم كيف رتبوا رحلتهم وخاصة للفنادق.
أخوي صعب تجلس في مكان أو اثنين فمدتك 13 يوم.
انزين بعد اقتراح بما أن عددكم كبير ، ليش ما تنقسموا لجروبات عشان الحجز وسهولة التنقل
3 مجموعات
أو مجموعتين على الأقل
وممكن كذا تشوف لك حجز في فنادق اقتصادية مو لازم فاخرة، وفي كوالا شقق سويس جاردن معاهم شقة بأربع غرف ويمكن تناسبكم
أرجو مساعدة الأخ قطري للي عنده أي معلومة أو حل في سفرته

الغالي قطري ،
أهنئك على برّك بوالديك وحرصك على محاولة إسعادهم
وأدخل السرور والبهجة على قلوبهم
وربي يعينك على ترتيب سفرة وتحمّل تبعاتها
لعدد كبير مثل هذا
لكن ،
تبي تتسهل بحول الله وقوّته
كنت أتمنى فقط أن تكون الأيام أكثر من 10
لإنه بصراحة ما يمديك تمرّ كل المناطق اللي ذكرتها خلال هالمدّة
وراح تكون تعب عليك
لكن إذا أصريت وبناء على طلباتك الخاصة
بخصوص التعري وخلافه
فأنا أنصحك بهذا البرنامج
مع التحية والتقدير طبعا لأخينا الأبراج الذي قام مشكورا بتقديم ما لديه
الفكرة راح تكون في تأجير باص من المطار
تطلع فيه مدينة إيبوه
تجلس فيها 3 ليال
والفعاليات اللي فيها
مدينة ألعاب مائية ممتازة وأقل زحمة من سيلانقور
مغامرة التجديف
زيارة مرتفعات الكاميرون الباردة ومزارع الشاي لمدة يوم
تنزلون بعدها على بينانق
( حتّى ترتاحوا من الطيران والحجز إلى لنكاوي )
والبقاء فيها ليلتين أو 3 بحسب إختياركم
الختام في شقق ممتازة وراح اكتب عنها بحول الله
قريبة من محطة مونوريل وراح تكفيكم هم التنقل
لمدة 4 ليال
تقومون فيها بالتسوق
وكذلك زيارة جنتنق لمدة يوم واحد
والبرجين وركوب الباص المفتوح وخلافه
التكلفة
عددكم 16
ولو أفترضنا أن كل 3 في غرفة
تحتاجون من 5 إلى 6 غرف
والتكلفة اليومية لفنادق أقتصادية
في إيبوه وبينانق
لكل غرفة من 300 ريال إلى 500
وفي كوالا
الشقق اللي أتحدث عنها
غرفتين وصالة راح تكلفكم 1500 فقط لكامل المدّة
وطبعا راح تحتاجون شقتين أو 3 بالكثير
وهو سعر مناسب للغاية
هذا رأيي المبدئي
وأكيد رأي الخبراء مهم
شوف رأيهم
وأنا راح أحاول أمر على الموضوع
كل فترة من شان نشوف شو قررت
بالتوفيق

بعد شو تبي أخونا قطري
ما شاء الله ماجد الفهد وفى وكفى
وبرنامجه على راسي، هم أدرى وأخبر
ولكن نحاول قدر الإمكان مساعدة البعض
وباقي الخبراء أكيد بتكون لهم بصمة في الموضوع
بالتوفيق

الله يجزكم خير اللي قالي مجموعات والله ياخوك ماقدر لان انا والوالد المحارم والباقي خواتي \ وعيالهم والوالد مايقدر كبير سن واخاف عليه ينصبون ولايضيع وكله صغار خواني الله يجراكم خير
انا ابي ارتب الجدول هل اكتب الاماكن في وةقه واقول لتكسي المنطقه او اخذ دليل سياحي ؟؟\
هل اقدر استاجر باص وكم بكلف الباص
هل تكفي 40 الف للاكل والالعاب انا السكنت حصل في شقق في سويس قاردن وحجزت مبدائي ب12 الف
اخواني السموحه لعوزتكم
لاكن قري ردودكم للوالده ههه واعجبها مزارع الشاي تبي تزورها ومشال الفراوله
نبي الالعاب الصغار خاطرهم فيها نبي اذا عندهم مدن ثلجيه وشلالات نبي تلفريك نبي طبيعه هل ممكن احصل رحله يوميه على قارب للعائله مع شواي وهالسوالف
ام شورو علي تكفون
اخوي الفهد ولايهونون الباقين الله يجزاك خير اعجبني تخطيطك بس عندي كم سوال
الفكرة راح تكون في تأجير باص من المطار
تطلع فيه مدينة إيبوه
تجلس فيها 3 ليال
والفعاليات اللي فيها
مدينة ألعاب مائية ممتازة وأقل زحمة من سيلانقور
مغامرة التجديف
زيارة مرتفعات الكاميرون الباردة ومزارع الشاي لمدة يوم
تجديف وحريم ههه والله ياخوي ذا ينفع الحريم شي ثاني في هالمنطقه تمام لان اعجبني موضوع المزرعه والمرتفعات والمدينه المائيه للصغار هل اقدر اخليها يومين ؟
تنزلون بعدها على بينانق
بينانق شالموجود فيها ولانكاوي نروحلها بر ولا جو والتكلفه ل 16 شخص
( حتّى ترتاحوا من الطيران والحجز إلى لنكاوي )
والبقاء فيها ليلتين أو 3 بحسب إختياركم
الختام في شقق ممتازة وراح اكتب عنها بحول الله
قريبة من محطة مونوريل وراح تكفيكم هم التنقل
لمدة 4 ليال
تقومون فيها بالتسوق
وكذلك زيارة جنتنق لمدة يوم واحد
والبرجين وركوب الباص المفتوح وخلافه
تمام
الله يجزاكم خير

1) الباص ( قو جنتنغ ) وهذا كل المعلومات عنه
جنتنق العب ب 47 رنقت؟؟
هل هذا العرض موجود شهر 8 اعجبني جدا
هل اروح مكتب سياحي يرتب لي الرحله ؟؟

أخي الكريم
نصائح على الطاير
بهذا العدد الكبير ماشاء الله تبارك الله لاتفكر في المواصلات العامة ولا في الطيران
أنتم يلزمكم باص خاص بسائق من المطار إلى المطار
كامل الرحلة يصبح ويمسي معكم لو ب 1000 ريال في اليوم
مالك عنه بديل
غير كذا بتتبهذل وتطلع عيونك في التنقلات
خذ باص وريح بالك
ومنها سواق ومرشد سياحي
بالنسبة للأطفال فيه أماكن كثير تعجبهم منها
حديقة الألعاب المائية في سلانقور نصف ساعة من كوالا
م\ينة الألعاب في جنتنق والتلفريك 45 دقيقة من كوالا
الملاهي الداخلية في مجمع تايمز سكوير 10 د من شارع العرب
أفاموسا يوم كامل تبعد ساعة ونصف عن كوالا
وفيه حديقة الحيوان وحديقة الطيور وعالم ماتحت البحار
كل هذي الأشياء تعجب الأطفال ويستانسون فيها

قطري 12
الآن ارتفع السعر إلى 58 رنقت بالباص السياحي من محطة الباصات في كوالا
لكن أنتم مايناسبكم لأنه بيكلفكم كثير جدا
الأوفر لكم تروحون بالباص الخاص مالكم وتدفعون هناك حق التكت فقط
علماً بأنه يوجد خصومات للقروبات الكبيرة في الملاهي